Jovano 11 - I Biblija ki Arli romani čhib

E Lazaresoro meriba

¹ Nesavo manuš palo anav Lazar inele namborme. Ov inele tari Vitanija, taro gav kaj živinde i Marija hem lakiri phen i Marta.

² I Marija inele okoja đuvli koja čhorđa o miris upro e Gospodesere pre hem koslja len ple balencar. O Lazar, kova inele namborme, inele lakoro phral.

³ Adalese o phenja bičhalde lafi e Isusese: “Gospode, ače, nambormei to manglo amal.”

⁴ Kad o Isus šunđa adava, phenđa: “Akava nambormipe naka završini pe meribnaja, nego ka ovel e Devlese ki slava, te šaj prekalo adava proslavini pe o Čhavo e Devlesoro.”

⁵ A o Isus manglja e Marta, lakere phenja hem e Lazare.

⁶ I kad šunđa dai o Lazar namborme, ačhilo pana duj dive adari kaj inele,

⁷ i tegani phenđa ple učenikonenđe: “Hajde palem ki Judeja.”

⁸ A o učenici phende lese: “Učitelju, na li e jevrejengere vođe angleder nekobor dive mangle te mudaren tut barencar, a tu palem mangeja te dža adari?”

⁹ O Isus phenđa lenđe: “Nane li e dive dešu duj saća? Ko phirela diveja, na perela, adalese so dikhela o svetlost akale svetosoro.

¹⁰ Ali, ko phirela raćaja, ka perel, adalese so nane svetlost ano leste.”

¹¹ Palo adala lafija, phenđa hem akava: “Amaro amal o Lazar zasuća, ali me džava te vazdav le.”

¹² A o učenici phende lese: “Gospode, te zasuća, ka sasljol.”

¹³ Ali o Isus vaćerđa lenđe e Lazaresere meribnastar, a on mislinde da vaćeri da o Lazar sovela.

¹⁴ Tegani o Isus phravdeste phenđa lenđe: “O Lazar mulo.

¹⁵ Zbog tumende radujinav man so na injumle adari, te šaj verujinen. Ali, hajde akana koro leste.”

¹⁶ Tegani o Toma vičime Blizanco phenđa avere učenikonenđe: “Hajde hem amen te mera e Isuseja.”

O Isusi o uštiba taro mule hem o dživdipe

¹⁷ Kad o Isus reslja adari, dodžanđa dai o Lazar štar dive već ano grobo.

¹⁸ A i Vitanijai taro Jerusalim dur đi sar trin kilometarija,

¹⁹ i but Jevreja adathar ale ki Marta hem ki Marija te tešinen len zbog lengoro phral.

²⁰ Kad i Marta šunđa da o Isus avela, lelja te džal nakoro leste, a i Marija ačhili čhere.

²¹ Tegani i Marta phenđa e Isusese: “Gospode, te ove ine akate, mlo phral naka merel ine.

²² Ali me hem akana džanav da o Devel ka del tut sa so rodeja lestar.”

²³ O Isus phenđa laće: “To phral ka uštel taro mule!”

²⁴ A i Marta phenđa lese: “Džanav da ka uštel taro mule tegani kad sare ka ušten taro mule ko Poslednjo dive.”

²⁵ O Isus phenđa laće: “Me injum o uštiba taro mule hem o dživdipe. Ko verujini ana mande, čak hem te merel, ka živini.

²⁶ Hem đijekh kova živini hem verujini ana mande, nikad naka merel. Verujineja li ano adava?”

²⁷ A oj phenđa lese: “Oja, Gospode! Verujinava da tu injan o Hrist, o Čhavo e Devlesoro, kova valjanđa te avel ko sveto.”

²⁸ Kad phenđa adava, dželi hem vičinđa pla phenja e Marija hem pohari phenđa laće: “Akatei o učitelj hem rodela tut.”

²⁹ Kad i Marija šunđa adava, sig uštini hem dželi nakoro leste.

³⁰ A o Isus pana na đerdinđa ano gav, nego pana inele adari kaj i Marta reslja le.

³¹ A kad o Jevreja kola inele e Marijaja ano čher hem tešinde la, dikhle da ki sig uštini hem iklili, lelje te džan palo late, mislindoj da džala ko grobo te rovel adari.

³² Kad i Marija resli adari kaj inele o Isus hem kad dikhlja le, peli anglo lesere pre hem phenđa lese: “Gospode, te ove ine akate, mlo phral naka merel ine.”

³³ Kad o Isus dikhlja ola hem e Jevrejen kola ale olaja sar rovena, pelo lese žal hem ine lese but pharo,

³⁴ i pučlja len: “Kaj čhivđen le?” On phende lese: “Gospode, ava hem dikh.”

³⁵ A o Isus lelja te rovel.

³⁶ Tegani o Jevreja phende: “Dikh kobor manglja le!”

³⁷ Ali nesave olendar phende: “Našti ine li ov, kova e kororesere jaćha phravđa, te ćerel akava manuš te na merel?”

O Isus vazdela taro mule e Lazare

³⁸ I e Isusese palem ine but pharo, i dželo ko grobo. Adava inele i pećina ko savakoro udar inele pašljardo o bar.

³⁹ O Isus phenđa: “Ciden o bar.” A i Marta, i phen e mulesiri, phenđa lese: “Gospode, već khandela, adalese soi štarto dive sari ano grobo.”

⁴⁰ O Isus pučlja la: “Na li phenđum će da ka dikhe e Devlesiri slava te verujinđan?”

⁴¹ Tegani cidinde o bar, a o Isus dikhlja nakoro nebo hem phenđa: “Dade, hvala će so šunđan man.

⁴² Džanav da tu uvek šuneja man, ali akava vaćerđum zbog o manuša kola akate terđovena, te poverujinen da tu bičhalđan man.”

⁴³ Kad phenđa adava, vičinđa oto sa o glaso: “Lazare, ikljov!”

⁴⁴ I o mulo iklilo. Lesere vasta hem o pre inele paćarde zavojencar, a lesoro muj inele paćardo maramicaja. A o Isus phenđa lenđe: “Huljaven lestar adava hem muken le te džal!”

O šerutne sveštenici hem o fariseja mangena te dolen e Isuse

⁴⁵ Tegani but Jevreja, kola ale kori Marija hem dikhle so o Isus ćerđa, poverujinde ano leste.

⁴⁶ Ali nesave olendar džele koro fariseja hem vaćerde lenđe okova so o Isus ćerđa.

⁴⁷ Tegani o šerutne sveštenici hem o fariseja čedinde pe ko sabor, i phende: “So te ćera? Adava manuš ćerela but čudesna znakija.

⁴⁸ Te mukljam lese te ćerel ađahar sa o manuša ka poverujinen ano leste. Tegani ka aven o Rimljanja hem ka uništinen amaro Hram hem amare narodo.”

⁴⁹ A jekh olendar, o Kajafa, kova adava berš inele prvosvešteniko, phenđa lenđe: “Tumen ništa na džanen!

⁵⁰ Na haljovena dai tumenđe po šukar jekh manuš te merel zako narodo, nego sa o narodo te properel.”

⁵¹ O Kajafa na phenđa adava korkoro pestar, nego, adalese so adava berš inele prvosvešteniko, prorokujinđa da o Isus ka merel zako sa o narodo e Jevrejengoro.

⁵² Hem na samo zako adava narodo, nego hem te bi čedela sa e Devlesere rasejime čhaven.

⁵³ Ađahar adava dive e jevrejengere vođe dogovorinde pe te mudaren e Isuse.

⁵⁴ Adalese o Isus na tromandilo te phirel javno maškaro e jevrejengere vođe, nego adathar dželo paše uzali pustinja, ano gav Efrem, hem adari inele ple učenikonencar.

⁵⁵ A inele paše e jevrejengoro prazniko Pasha hem but Jevreja taro avera dizja hem gava ale ko Jerusalim te očistinen pe angleder i Pasha.

⁵⁶ Rodinde e Isuse hem, terdindoj ano Hram pučle jekh avere: “So mislinena, ka avel li ki Pasha?”

⁵⁷ A o šerutne sveštenici hem o fariseja već dinde naredba, ko ka dodžanel kaj o Isus te vaćeren lenđe, te šaj dolen le.