Delja 2 - I Biblija ki Arli romani čhib

O aviba e Svetone Duhosoro

¹ Kad alo o prazniko o Pentekost, o pindato dive palo prazniko Pasha, sare inele zajedno ko jekh than.

² Otojekhvar taro nebo šundilo nesavo zvuk, sar kad phudela i zorali barval, hem pherđa sa o čher ano savo on inele.

³ I dikhle nešto sar jagale čhibja, save delinde pe hem huljile upro đijekh olendar.

⁴ Hem sare pherdile e Svetone Duhoja hem lelje te vaćeren avere čhibjencar sar so dela len ine o Duho te vaćeren.

⁵ A ko adava vreme ano Jerusalim inele o pobožna Jevreja kola ale taro đijekh narodo ki phuv.

⁶ Kad šunde adava zvuk, o narodo čedinđa pe hem inele zbunime, adalese so đijekh olendar šunđa e učenikonen sar vaćerena olesere čhibjaja.

⁷ Divinde pe hem čudinde pe, vaćerindoj: “Dikh, nane li sa akala kola vaćerena Galilejci?

⁸ Sar onda đijekh amendar šunela len pese ki čhib savi vaćeri pe adari kotar injam?

⁹ Maškar amende isi Parćanja, Međanja hem Elamcija, manuša tari Mesopotamija, Judeja, Kapadokija, Ponta, Tikori Azija,

¹⁰ Frigija, Pamfilija, Egipat hem taro thana e Libijakere uzali Kirina, hem okola kola ale taro Rim,

¹¹ (zajedno o Jevreja hem okola kola obratinde pe ki vera e jevrejengiri), o Krićanja hem o Arapija. Sare amen šunaja len sar ko amare čhibja vaćerena oto e Devlesere bare delja!”

¹² I sare zadivime hem zbunime, pučena ine jekh avere: “So akava značini?”

¹³ A avera marde muj, vaćerindoj: “But pile gudli mol!”

E Petresoro propovediba

¹⁴ Tegani o Petar, e dešujekhe apostolencar, terdino anglo lende, hem glasno phenđa lenđe: “Phraljalen Jevrejalen, hem sare tumen kola bešena ko Jerusalim, šunen mle lafija! Te džanen akava:

¹⁵ Akala manuša nane mate, sar so tumen mislinena, adalese soi pana enja o sati sabajle.

¹⁶ Nego, akavai adava sostar vaćerđa o proroko o Joil:

¹⁷ ‘Ko poslednja dive – phenela o Devel – ka čhorav mle Duho upro sa o manuša, hem tumare čhave hem čhaja ka prorokujinen, hem tumare terne čhaven ka ovel vizije, hem tumare purane ka dikhen sune.

¹⁸ A hem upro mle sluge hem sluškinje adala dive ka čhorav mle Duho, hem on ka prorokujinen.

¹⁹ Ka mothovav čudesija upre ko nebo hem znakija tele ki phuv – rat, jag hem oblaci oto dim.

²⁰ O kham ka ćerel pe ani tomina, a o masek ano rat angleder nego so avela o baro hem o slavno Dive e Gospodesoro.

²¹ Hem đijekh kova ka vičini o anav e Gospodesoro, ka ovel spasime.’

²² Izraelconalen, šunen akala lafija: o Isus taro Nazaret inele manuš kole o Devel potvrdinđa angla tumende prekalo zorale delja, čudesija hem znakija save ćerđa prekalo leste, kad inele maškar tumende. Adava hem korkore tumen džanen.

²³ Ali o Devel džanđa so ka ovel, hem olesoro angleder ćerdo plan pherdilo kad o Isus inele predime tumenđe. Tumen, prekalo vasta e biedevlesere manušengere, kovinđen le ko krsto hem mudarđen le.

²⁴ Ali, o Devel vazdinđa le taro mule, hem oslobodinđa le taro e meribnasere muke, adalese so našti ine o meriba te ićeri le ani pli vlast.

²⁵ A o caro o David lestar vaćeri: ‘Uvek dikhljum e Gospode angla mande. Ovi maje oti desno strana, i adalese naka ovav peravdo.

²⁶ Adalesei mlo vilo bahtalo hem mli čhib slavini e Devle oti radost, đi hem mlo telo ka živini ani nada,

²⁷ adalese so naka ačhave mli duša ano than e mulengoro, ni naka muke te Svecosoro telo te čirnjol.

²⁸ Mothovđan maje e dživdipnasere droma, ka phere man bahtalipnaja ani ti prisutnost.’

²⁹ Phraljalen, sigurno injum ko akava so phenava tumenđe zako amaro pradad o David: ov mulo hem inele parume, a lesoroi grobo maškara amende sa đi akava dive.

³⁰ Ali, adalese so ov inele proroko hem džanđa da o Devel obećinđa lese ađahar so halja lese sovli da jekhe lesere potomkonendar ka čhivel lese ko than sar caro.

³¹ Ov angleder dikhlja adava so valjani te ovel, i vaćerđa e Hristesere uštibnastar taro mule: ‘Na inele ačhavdo ano than e mulengoro, ni lesoro telo na čirnilo.’

³² O Devel akale Isuse vazdinđa taro mule, a sare amen injam svedoci adalestar.

³³ Adalese so o Devel vazdinđa le ko počasno than, tari pli desno strana, e Dadestar priminđa e obećime Svetone Duho hem dinđa akava so akana tumen dikhena hem šunena.

³⁴ Adalese so, o David na legardilo ko nebo, a palem, phenđa: ‘O Gospod phenđa mle Gospodese: Beš oti mli desno strana

³⁵ đikote na pašljarava te neprijateljen talo te pre.’

³⁶ Adalese sa e izraelesoro narodo šukar te džanel da akale Isuse, kole tumen čhivđen ko krsto, o Devel ćerđa te ovel hem Gospod hem Hrist.”

³⁷ Kad adava šunde, but dukhandilo len ano vilo, hem pučle e Petre hem avere apostolen: “So valjani te ćera, phraljalen?”

³⁸ A o Petar phenđa lenđe: “Pokajinen tumen hem đijekh tumendar te krstini pe ano anav e Isuse Hristesoro zako oprostiba tumare grehengoro, hem ka priminen e Svetone Duho sar daro.

³⁹ Adalese so, adavai obećanje tumenđe hem tumare čhavenđe hem sarijenđe kola živinena dur akatar, kolen amaro Gospod o Devel vičini kora peste.”

⁴⁰ Hem pana bute avere lafencar svedočini lenđe ine hem upozorini len: “Spasinen tumen tari kazna savi avela upri akaja rumimi generacija.”

⁴¹ Tegani krstinde pe okola kola prihvatinde lesere lafija. Ađahar adava dive đi sar trin hiljade manuša pridružinde pe e učenikonenđe.

O dživdipe e anglune vernikonengoro

⁴² On posvetinena pe ine ko sikaviba e apostolengoro, ko zajedništvo, ko phagiba o maro hem ko molitve.

⁴³ A i dar prelelja đijekhe manuše, adalese so but znakija hem čudesija inele ćerde prekalo apostolja.

⁴⁴ A sa o vernici inele zajedno hem sa ine lenđe zajedničko.

⁴⁵ Biknena ine pumare phuvja hem okova so inolen hem delinena ine o pare đijekhese edobor kobor valjanđa lese.

⁴⁶ Đijekh dive bizo ačhojba hem sar jekh čedena pe ine ano Hram. Ko pumare čhera phagena ine o maro hem hana zajedno bahtale hem čačikane vileja.

⁴⁷ Hvalinena ine e Devle hem sa o manuša mangena len ine. A o Gospod đijekh dive barjari ine o broj e spasimendar.