1. Jovan 4 - I Biblija ki Arli romani čhib

E Duhen valjani te proverini pe

¹ Mle manglalen, ma verujinen đijekhe duhose, nego proverinen e duhen – te dikhen avena li taro Devel – adalese so iklile but hovavne proroci ano sveto.

² Palo akava ka pendžaren e Devlesere Duho: đijekh duho kova priznajini da o Isus Hrist alo ano telo, ovi taro Devel.

³ I đijekh duho kova na priznajini e Isuse, nane taro Devel, nego ovi taro antihrist. A šunđen zako antihrist da avela, hem već akanai ano sveto.

⁴ Mle čhavoralen, tumen injen e Devlestar hem pobedinđen len, adalese so okova kovai ana tumende po baroi okolestar kovai ano sveto.

⁵ O hovavnei proroci akale svetostar – adalese vaćerena sar o sveto so vaćeri hem o sveto šunela len.

⁶ Amen injam e Devlestar. Ko pendžari e Devle, šunela amen, a ko nane e Devlestar, na šunela amen. Ađahar pendžaraja kovai o Duho e čačipnasoro, a kovai o duho e hovajbnasoro.

O Develi mangipe

⁷ Mle manglalen, hajde te manga jekh avere, adalese soi o mangipe e Devlestar. Đijekh kova mangela, ovi e Devlestar bijando hem pendžari e Devle.

⁸ Ko na mangela, ov na pendžari e Devle, adalese soi o Devel mangipe.

⁹ Ađahar o Devel mothovđa plo mangipe amenđe: bičhalđa ple jekhore Čhave ano sveto te šaj živina prekalo leste.

¹⁰ Ano akavai o mangipe: na ano adava da amen mangljam e Devle, nego da ov manglja amen hem bičhalđa ple Čhave sar žrtva zako oprostiba amare grehengoro.

¹¹ Mle manglalen, te amen o Devel edobor manglja, onda hem amen injam dužna te manga jekh avere.

¹² E Devle niko nikad na dikhlja; ali te mangaja jekh avere, o Devel živini ana amende hem lesoroi mangipe ana amende savršeno.

¹³ Palo adava džanaja da živinaja ano leste hem ov ana amende: dinđa amen ple Duhostar.

¹⁴ A amen dikhljam hem svedočinaja da o Dad bičhalđa e Čhave te ovel Spasitelji e svetosoro.

¹⁵ Ko priznajini dai o Isus o Čhavo e Devlesoro, o Devel živini ano leste hem ov ano Devel.

¹⁶ A amen pendžarđam hem verujinđam ano mangipe savo o Devel isi le premalo amende. O Develi o mangipe. Ko živini ano mangipe, ano Devel živini hem o Devel živini ano leste.

¹⁷ Palo adava o mangipe ana amende ovela savršeno, te šaj ovel amen pouzdanje ko Dive oto sudo; adalese so, savoi o Hrist, esavke injam hem amen ano akava sveto.

¹⁸ Ano mangipe nane dar, nego o savršeno mangipe ispudini i dar. Okova kova darala, isi le dar oti kazna, so značini da nane savršeno ano mangipe.

¹⁹ Amen mangaja adalese so o Devel najangle manglja amen.

²⁰ Te neko vaćeri: “Mangava e Devle”, a mrzini ple phrale, ovi hovavno. Adalese so, ko na mangela ple phrale, kole dikhela, ov našti te mangel e Devle, kole na dikhela.

²¹ A akaja naredba isi amen olestar: ko mangela e Devle, te mangel hem ple phrale.