മറുക്കോച്ചു 6 - പുദിയ നേമ

ഏച്ചുനെ അദുന്റ ചൊന്തകാറെര തള്ളിന്റൊരു

¹ ഏച്ചു അവുടിന്തു തന്റ ചൊന്ത അങ്ങടിക്കു പോയിത്തു. അദുന്റ ബൊവുകെട്ടിയമു അദുന്റൊന്റ പോനരു.

² ഉളേപ്പുജിന അദു ജൂദപള്ളിക്കു പോച്ചു പടേപ്പിപ്പ തൊടാങ്കിത്തു. അയിനെ കേട്ടിന്തിച്ചു അവുടെയിന്തെര അന്തബുട്ടൊണ്ടു ഇങ്ങാണെ പറേഞ്ചരു: “ഏനൊക്ക ഏങ്കു എവുടിന്തു കിട്ടിനെയെയ്? എന്നാ ഒരു അറിവാന്റു ഏങ്കു കിട്ടികീന്റെയെയ്! ഈ അദിച്ചെയമൊക്ക ചെയിവകീന്റ ചഗുത്തി ഏങ്കെവുടിന്തു കിട്ടിനെയെയ്?

³ ഏനു മറിയെന്റ മഗെനല്ലേ? ആക്കോബു, ഓച്ചെ, ചീമോനു, ഊദെ എന്റെര ഏന്റ ളേയമക്കളുമാന്റു. ഏനൊരു ആജെരിപണിക്കാറെനാന്റു. ഈ മയിച്ചെന്റ ളേയമക്കളാന പെണിയമക്കളുമു നമിന്റൊന്റ കീന്റൊരു.” അയിര ഇങ്ങാണെ പറേഞ്ചൊണ്ടു ഏച്ചു പറേഞ്ചുകാട്ടികൊടുത്തെനെ ബഗെബെപ്പകാണി.

⁴ അയിനെകോണ്ടു ഏച്ചു അയിരണ്ടൊന്റ പറേഞ്ചു: “തമ്മടിയളെ തങ്കട ചൊന്ത നാടിലെരളുമു ചൊന്ത കുള്ളിലെരളുമു ചൊന്ത മയിച്ചെരളുമു മാത്തിരമെ താവുന്തെരളായി കണാക്കാക്കിന്റെയെയ്.”

⁵ അദു കുറെ ചുഗാകാണത്തെരണ്ട മേലുക്കു കയിബെച്ചിച്ചു അയിരളെ ചാരിമാടിത്തു. അവുടില മയിച്ചെരക്കു നമ്പെലു കാണത്തെനെകോണ്ടു അവുടെ ബേറെ അദിച്ചെയ കാരിയമൊന്റുമു അദുക്കു ചെയിവ പറ്റുവകാണി.

⁶ അയിരക്കു നമ്പെലു കാണത്തെങ്കു ഏച്ചു അന്തബുട്ടുപോയിത്തു. അയികവുഞ്ചിച്ചു ഏച്ചു മയിച്ചെരക്കു പറേഞ്ചുകാട്ടികൊടുത്തൊണ്ടു ബളേഞ്ചുമുകീന്റ ഒക്കാ കുന്റുകായെമു നടാന്തു.

ഏച്ചു പന്തിരാണ്ടു ബൊവുകെട്ടിയളെ ചൊല്ലിബുണ്ടു

⁷ പിന്നെ ഏച്ചു തന്റ പന്തിരാണ്ടു ബൊവുകെട്ടിയളെ തന്നാത്തെക്കു ബുളിച്ചിച്ചു അയിരളിലി രാണ്ടുരാണ്ടാളുനെ പലേ ജാഗത്തെക്കുമു ചൊല്ലിബുടുവ തൊടാങ്കിത്തു. അദു അയിരക്കു പേയളെ ഉദുക്കുവകീന്റ അദിഗാര കൊടുത്തു.

⁸ അയിര പോവടെക്കു അദു അയിരണ്ടൊന്റ ഇങ്ങാണെ പറേഞ്ചു: “നീങ്ക പോവടെക്കു ഒട്ടിയോ പിട്ടോ, ജോളിഗെയോ, പയിച്ചെയോ പണമോ നിങ്കളക്കെ ബെപ്പനാഗയ്. നടാന്തു പോവടെക്കു കുത്തിപുടിപ്പ ഒരു ബടി മാത്തിര എടുത്തെങ്കി മദി.

⁹ ചെരുപ്പു ഇടുവനാവൊയ്, എന്റെങ്കി ഇട്ടുകീന്റ കുപ്പെയ അല്ലദെ ബേറെ കുപ്പെയ എടുപ്പനാഗയ്.

¹⁰ ആരെങ്കില നിങ്കളെ ഒരു കുള്ളുക്കു കൂട്ടിനെങ്കി ബേറെബേറെ കുള്ളിലി പോയി ഇരാദെ ആ ജാഗ ബുട്ടു പോന്റബരെ ആ കുള്ളിലിതന്നെ ഇക്കൊണു.

¹¹ ആരെങ്കില നിങ്കളെ കൂട്ടദിപ്പനോ നീങ്ക പറേന്റെനെ കേട്ടിരാദിപ്പൊനോ ചെയിദെങ്കി അവുടിന്തു പോവടെക്കു നിങ്കട കാലില പൊടി ഒദാറികാമി! അയിരണ്ട കുറ്റ അയിരക്കു ഇപ്പൊയ് എന്റു കാട്ടുവ ഏനൊരു അടിയളമായി ഇക്കൊട്ടു.”

¹² അങ്ങാണെ ബൊവുകെട്ടിയ അവുടിന്തു പുറാപ്പട്ടുപോച്ചു നെരേയണ്ടൊന്റ “ആഗത്തമനാത്തിനെ ബുട്ടുതിരിയൊണു” എന്റു ബുളിച്ചു പറേഞ്ചരു.

¹³ അയിര ബലാബരി പേയളെ ഉദുക്കിനരു, ചുഗാകാണത്ത ബലാബരി മയിച്ചെരളെ എണ്ണെ ചേച്ചിച്ചു ചാരിമാടിനരു.

എരോദാറാജാവു ഓഗെന്നാനുനെ കൊല്ലിന്റു

¹⁴ ഏച്ചുനെപറ്റി ഒക്കായിമു പറേഞ്ചുകിടാപ്പ തൊടാങ്കിനരു. എരോദാറാജാവുമു ഏച്ചുനെപറ്റി കേട്ടിന്തു. കുറെ മയിച്ചെര ഏച്ചുനെപറ്റി ഇങ്ങാണെ പറേവ കൂടിന്തരു: “നീരുക്കു മുക്കി ഏന്തെപ്പിച്ചൊണ്ടിന്ത ഓഗെന്നാനു ചത്തെരണ്ട ഇടേലിന്തു ഉഗിരുപുറാന്തുകീന്റൊയ്. അയിനെകോണ്ടാന്റദു ഈ അദിച്ചെയമൊക്ക ചെയിവകീന്റ ചഗുത്തി ഏച്ചുക്കു കീന്റെയെയ്.”

¹⁵ എന്റെങ്കി ബേറെ കുറെ മയിച്ചെര ഏച്ചുനെ: “അദു ഏലിയാവെന്റു” പറേവ കൂടിന്തരു. ബേറെ കുറെ മയിച്ചെര: “അദു പണ്ടില തമ്മടിയളിലി ഒരുത്തെനെപല്ലെ ഒരു തമ്മടിയാന്റു” എന്റു പറേഞ്ചരു.

¹⁶ ഏനൊക്ക കേട്ടിന്തിച്ചു എരോദാറാജാവു ഏച്ചുനെപറ്റി ഇങ്ങാണെ പറേഞ്ചു: “അയിനു ഓഗെന്നാനു ആന്റു. നാനു പറേഞ്ചിച്ചാന്റു ഓഗെന്നാനുന്റ തിലെ ബെട്ടി കൊന്റെയെയ്. ഇപ്പൊ അയിങ്കു ഉഗിരുപുറാന്തുകീന്റൊയ്.”

¹⁷ അദു ഓഗെന്നാനുനെ കൊന്റെന്റ കാരിയ ഏനാന്റു: എരോദാറാജാവു തന്റ അണ്ണെനാന പിലിപ്പോച്ചുന്റ റാട്ടിയായിന്ത എരോദിയെനെ കോന്തൊണ്ടിന്തു.

¹⁸ എന്റെങ്കി ഓഗെന്നാനു എരോദാവുന്റൊന്റ പറേഞ്ചു: “ഇഞ്ച അണ്ണെന്റ റാട്ടിനെ കോന്തൊണ്ടുകീന്റെയെയ് ഈച്ചിരന്റ നേമത്തെക്കു ഒപ്പിന്റെയെയ് അല്ല.” ഈ ബാക്കിലി എരോദിയെ ഓഗെന്നാനുന്റ മുഗാളു പഗെ ബെച്ചിന്ത. അയിനെകോണ്ടു എരോദിയെന്റ അയിച്ചിരിക്കുബേണ്ടി എരോദാവു പടെയാളിയളെ ബുട്ടു ഓഗെന്നാനുനെ പുടിച്ചു ജെയിലുക്കു ഇടുപ്പിച്ചു.

¹⁹ എരോദിയെക്കു ഓഗെന്നാനുന്റ മുഗാളു കറുമ്പെലു ഇന്തെനെകോണ്ടു അദുനെ കൊല്ലൊണു എന്റു അവൊ അലാന്ത. എന്റെങ്കി അവോക്കു അയിങ്കു പറ്റുവകാണി.

²⁰ എന്റെങ്കി എരോദാറാജാവുക്കു ഓഗെന്നാനുനെകണ്ടു പേടിയായിന്തയ്. അയിനെകോണ്ടു റാജാവു അദുനെ കൊല്ലദെ നോക്കിമാടിട്ടു. ഓഗെന്നാനു നേരുകീന്റദുമു ചുദ്ദകീന്റദുമാന ഒരു മയിച്ചെനെന്റു എരോദാറാജാവുക്കു ഗൊത്തിന്തയ്. ഓഗെന്നാനുന്റ ബാക്കു കേട്ടിന്ത ഗളിഗെലിയൊക്ക അദു ബെദാറിപോയിന്തദെമു അദുന്റ ബാക്കു കേട്ടിക്കിന്റെയെയ് അദുക്കു അയിച്ചിരിയായിന്തയ്.

²¹ അങ്ങാണെ ഇപ്പടെക്കു എരോദിയെക്കു ഓഗെന്നാനുനെ കാണദെമാടുവകീന്റ തക്ക കിട്ടിനയ്. എരോദാറാജാവു പുറാന്ത ജിന ആയിന്തയ് അയിനു. ആ ജിന എരോദാറാജാവു അവുടില ബലിബലിയ അദിഗാരിയളെമു പടെ നയിക്കിന്റെരളെമു ഗെലീലെ നാടില ബലിയ മയിച്ചെരളെമു ബിരുന്തുക്കു ബുളിച്ചിന്തു.

²² എരോദിയെക്കു ഒരു മഗ ഇന്ത. ആ ജിന അവൊ ബന്തിച്ചു ആടിന. അവോണ്ട ആട്ടു മെലേഞ്ചിച്ചു എരോദാറാജാവുക്കുമു അദുന്റ ബിരുന്തുകാറെരക്കുമു അയിച്ചിരിയാനയ്. അയിനെകോണ്ടു: “നീ അലാക്കിന്റെയെയ് എന്നെനാനദെമു എന്റൊന്റ കേട്ടെങ്കിമദി, നാനയിനെ നീക്കു തരുവെയ്.

²³ നീ എന്നെനെ കേട്ടദെമു നാടുന്റ പഗുദി തന്നെ ആനദെമു നാനു നീക്കു തരുവെയ്” എന്റു അദു ചത്തിയ ചെയിദിച്ചു അവോക്കു ബാക്കുകൊടുത്തു.

²⁴ പെണ്ണു പുറാത്തെക്കു പോച്ചു: “അവ്വാ, നാനു എന്നെനെ കേളുക്കൊണു” എന്റു അവ്വെന്റൊന്റ കേട്ട. പെണ്ണുന്റ അവ്വെയാന എരോദിയെ പറേഞ്ച: “നീരുക്കു മുക്കി ഏന്തെപ്പിക്കിന്റ ഓഗെന്നാനുന്റ തിലെ തരുവ പറേ.”

²⁵ പെണ്ണു ദടുബുടാനെ റാജാവാത്തെക്കു ഓടിച്ചു അദുന്റൊന്റ: “നീരുക്കു മുക്കി ഏന്തെപ്പിച്ചൊണ്ടിന്ത ഓഗെന്നാനുന്റ തിലെ ഇപ്പൊതന്നെ ബെട്ടിച്ചു ഒരു തളുവെലി ബെച്ചിച്ചു എനാക്കു താത്തേ” എന്റു കേട്ട.

²⁶ ഏനെ കേട്ടിന്തിച്ചു എരോദാറാജാവുക്കു അദിഗമെ ചങ്കടമാനയ്. താനു ബാക്കുകൊടുത്തെനെ നിനേച്ചൊണ്ടുമു ബിരുന്തുകാറെരളെ നിനേച്ചൊണ്ടുമു അവൊ കേട്ടെനെ കൊടുഗദെ ഇപ്പ റാജാവുക്കു മന ബരുവകാണി.

²⁷ അയിനെകോണ്ടു റാജാവു ബിരേന്റു ഓഗെന്നാനുന്റ തിലെ ബെട്ടിക്കോണ്ടുബരുവ ഒരു പടെയാളിനെ ചൊല്ലിബുട്ടു. അയിനു ജെയിലുക്കു പോച്ചു ഓഗെന്നാനുന്റ തിലെ ബെട്ടിനയ്.

²⁸ എന്റിച്ചു അയിനു അയിനെ ഒരു തളുവെലി ബെച്ചിച്ചു പെണ്ണുക്കു കോന്തുകൊടുത്തയ്. പെണ്ണു അയിനെ എടുത്തൊണ്ടു പോച്ചു അവോണ്ട അവ്വെക്കു കൊണ്ടുപോച്ചു കൊടുത്ത.

²⁹ ഓഗെന്നാനുന്റ ബൊവുകെട്ടിയ നടാന്തെയെയ് എന്നെനെന്റു ഗൊത്തുമാടിനരു. അയിര ബന്തിച്ചു അദുന്റ ചാവെടുത്തൊണ്ടു പോച്ചു കിടാക്കെലി പൂത്തിനരു.

ഏച്ചു അഞ്ചായിര മയിച്ചെരക്കു തിമ്മ കൊടുക്കിന്റു

³⁰ ഏച്ചു ചൊല്ലിബുട്ട പന്തിരാണ്ടു അപ്പോച്ചോലെര മടാങ്കിബന്തരു. താങ്ക ചെയിദെനെമു പറേഞ്ചുകാട്ടികൊടുത്ത ഒക്കാ കാരിയമു അയിര ഏച്ചുന്റൊന്റ പറേഞ്ചരു.

³¹ ബലാബരി മയിച്ചെര ഏച്ചുവാത്തെക്കു ബന്തുമു പോയികോണ്ടുമു ഇന്തെനെകോണ്ടു ഏച്ചുക്കുമു ബൊവുകെട്ടിയക്കുമു തിന്റുകുടിച്ചിടുവബരെ ചമേയ കിട്ടുവകാണി. അയിനെകോണ്ടു ഏച്ചു ബൊവുകെട്ടിയണ്ടൊന്റ: “നീങ്ക ബരി, നമാക്കു ആരുമു ബാരത്ത ജാഗത്തിപോയി കുറെ ചമേയ ചന്ന ഉളേച്ചിപ്പൊവു” എന്റു പറേഞ്ചു.

³² അങ്ങാണെ അയിര തോണിക്കത്തികോണ്ടു ആരുമു കാണത്ത ഒരു ജാഗത്തെക്കു പോനരു.

³³ എന്റെങ്കി അയിര പോന്റെനെ കുറെ മയിച്ചെര മെലേഞ്ചരു. ഏച്ചു പോന്റെന്റു അയിരക്കു ഗൊത്താനയ്. അയിനെകോണ്ടു ഏച്ചു പോന ജാഗത്തെക്കു ഒക്കാ അങ്ങടിലിന്തുമു മയിച്ചെര കരേകായെ ഓണരു. അയിര ഓടിപോച്ചു ഏച്ചുമു ബൊവുകെട്ടിയമു എത്തിന്റെങ്കിന്തു മുല്ലെ അവുടെക്കു എത്തിനരു.

³⁴ ഏച്ചു തോണിലിന്തു ഉദുഗിന ചമേയത്തി അവുടെ ചുമാറു മയിച്ചെരളെ മെലേഞ്ചു. ആ നെരേയ ആടുകാറെയ് കാണത്ത ആടുവളെപല്ലെ ആയിന്തരു. അയിരളെ മെലേഞ്ചിച്ചു ഏച്ചുക്കു ബാറുകത്തിനയ്. അയിനെകോണ്ടു അദു അയിരക്കു പലേ കാരിയമു പറേഞ്ചുകാട്ടികൊടുപ്പ തൊടാങ്കിത്തു.

³⁵ നേരബൂവനാന ചമേയത്തി ബൊവുകെട്ടിയ ഏച്ചുവാത്തെക്കു ബന്തിച്ചു പറേഞ്ചരു: “ഇമ്മത്തേ, ഏനു ആരുമു കാണത്ത ജാഗമാന്റു, ഇപ്പൊതന്നെ ബലാബരി നേരമു ആയികീന്റൊയ്.

³⁶ അയിനെകോണ്ടു ഈ മയിച്ചെരളെ ചൊല്ലിബുട്ടുകാത്തെ. അയിര പോച്ചു അടുക്കകീന്റ ജാഗത്തിന്തോ കുന്റിലിന്തോ എന്നെനെങ്കില എടുത്തു തിന്നൊട്ടു.”

³⁷ ഏച്ചു അയിരണ്ടൊന്റ പറേഞ്ചു: “നീങ്കതന്നെ അയിരക്കു തിമ്മ കൊടുമി.” അയിങ്കു അയിര: “ഇരുന്നൂറു ബെള്ളിതൊട്ടു ഇന്തദെമു ഏരക്കു ഒട്ടി എടുത്തുകൊടുപ്പ പയിച്ചെ തിഗേയയ്” എന്റു പറേഞ്ചരു.

³⁸ അയിങ്കു ഏച്ചു അയിരണ്ടൊന്റ പറേഞ്ചു: “നിങ്കട കയിലി എത്തെനെ ഒട്ടി കീന്റൊയ് എന്റു പോയിനോക്കുമി.” അയിര പോയി നോക്കിച്ചു “അഞ്ചു ഒട്ടിമു രാണ്ടു മീനുമു കീന്റൊയ്” എന്റു പറേഞ്ചരു.

³⁹ “ഒക്കായിന്റൊന്റമു പുല്ലിലി ബരിബരിയായി ഉളേപ്പ പറേമി” എന്റു ഏച്ചു അയിരണ്ടൊന്റ പറേഞ്ചു.

⁴⁰ അയിര നൂറുമു അയിമ്പെദുമു മയിച്ചെരളായി ബരിബരിയാച്ചു ഉളേച്ചരു.

⁴¹ ഏച്ചു ആ അഞ്ചു ഒട്ടിമു രാണ്ടു മീനുമു എടുത്തിച്ചു ചൊറുഗത്തെക്കു മെലേഞ്ചൊണ്ടു ഈച്ചിരങ്കു നന്നി പറേഞ്ചു. എന്റിച്ചു ഒട്ടി ഒടിച്ചിച്ചു മയിച്ചെരക്കു കൊടുപ്പബേണ്ടി ബൊവുകെട്ടിയണ്ട കയിക്കു കൊടുത്തു. ആ രാണ്ടു മീനുമു അയിര ഒക്കായിക്കുമു പാലിട്ടു കൊടുത്തരു.

⁴² ഏച്ചു അയിനെ അദിഗമാക്കികൊടുത്തു. ഒക്കായിമു ബാറുനിറേച്ചുമു തിന്റരു.

⁴³ ഒക്കായിമു തിന്റുകവുഞ്ചിച്ചു പന്തിരാണ്ടു കുക്കെ നിറേച്ചുമു ഒട്ടിമു മീനുമു ബാക്കിയാനയ്.

⁴⁴ ഒട്ടി തിന്റെരളിലി അഞ്ചായിരത്തെനെ ആണങ്ക ഇന്തരു.

ഏച്ചു കടേലുന്റ മുഗാളെ നടാക്കിന്റു

⁴⁵ ഏച്ചു മയിച്ചെരളെ ചൊല്ലിബുണ്ടെന്റ ഇടേക്കു തന്റ ബൊവുകെട്ടിയണ്ടൊന്റ ബിരേന്റു തോണിക്കത്തിച്ചു കടേലുന്റ അക്കരെകീന്റ ബേത്തുച്ചയിദെ അങ്ങടിക്കു പോവ പറേഞ്ചു.

⁴⁶ അയിരളെ ഒക്കായിനെമു ചൊല്ലിബുട്ടുകാന്റു ഏച്ചു പുറാത്തിപ്പബേണ്ടി മലെമുഗാളെക്കു പോയിത്തു.

⁴⁷ അന്തിയായിബന്തപ്പൊ തോണി കടേലുന്റ നടുവെമു ഏച്ചു ഒരുത്തെനെ കരേലിമു ഇന്തു.

⁴⁸ കനാമായി കാറ്റു അടിച്ചെങ്കു തോണി തുവേവ ബൊവുകെട്ടിയ കട്ടപ്പണ്ടെനെ ഏച്ചു മെലേഞ്ചു. പിലേരിച്ചെക്കു കോയി കൂഗിന്റ ചമേയത്തി അദു നീരുന്റ മുഗാളെ നടാന്തു അയിരളാത്തെക്കു എത്തിത്തു. അദു തോണി കടാന്തുപോവ പേച്ചാടിത്തു.

⁴⁹ ഏച്ചു നീരുമുഗാളെ നടാക്കിന്റെനെ ബൊവുകെട്ടിയ മെലേഞ്ചിച്ചു പേയെന്റൊണ്ടു പേടിച്ചൊണ്ടു അയ്യബുളിച്ചരു.

⁵⁰ അദുനെ അങ്ങാണെ മെലേഞ്ചിച്ചു ഒക്കാ ബൊവുകെട്ടിയമു അദിഗമെ പേടിച്ചുപോനരു. ബിരേന്റു ഏച്ചു അയിരണ്ടൊന്റ പറേഞ്ചുകിടാന്തു: “ബലാമായിരുമി, ഏനു നാനാന്റു; പേടിയദിരുമി.”

⁵¹ പിന്നെ അദു അയിര ഇന്ത തോണിക്കു അത്തിത്തു. എമ്മടെക്കു കാറ്റു നിന്റയ്. ബൊവുകെട്ടിയ അന്തബുട്ടു ബെദാറിപോയിന്തരു.

⁵² അഞ്ചു ഒട്ടിനെ അഞ്ചായിര മയിച്ചെരക്കു എങ്ങാണെ കൊടുത്തു അയിച്ചിരി ബരുത്തിനെന്റു അയിരക്കു ഗൊത്താവകാണി. അയിരണ്ട മനാത്തെക്കു അയിനു ഗൊത്തുമാടുവ പറ്റദായിന്തയ്.

⁵³ ഏച്ചുമു ബൊവുകെട്ടിയമു കടേലു കടാന്തിച്ചു ഗെന്നെച്ചരേത്തു നാടുന്റ കരേക്കു തോണി അടുപ്പിച്ചരു.

⁵⁴ അയിര തോണിലിന്തു ഉദുഗിന ചാദിക്കെ നെരേയ ഏച്ചുനെ ഗൊത്തുമാടിനരു.

⁵⁵ അയിര അടുക്കകീന്റ ജാഗത്തെക്കൊക്ക ഓടിനടാന്തൊണ്ടു ചുഗാകാണത്തെരളെ കിടാത്തിന്ത പായോണ്ടെയെ എടുത്തൊണ്ടു ഏച്ചു ബന്തുകീന്റെന്റു കേട്ടിന്ത ജാഗത്തെക്കു പോവ തൊടാങ്കിനരു.

⁵⁶ ഏച്ചു കുന്റുകായെമു അങ്ങടികായെമു നാടുകായെമു കുടിലുകായെമൊക്ക കടാന്തൊപോവടെക്കു അദേയൊക്ക മയിച്ചെര ചുഗാകാണത്തെരളെ ചന്തെലിയ പൊരുബൊവ്വരിഗെ കോന്തു കിടാത്തിനരു. അയിര അദുന്റൊന്റ “ഇഞ്ച കുപ്പെയത്തിന്റ കോടിയെങ്കില തൊടുവ ബുടോണു” എന്റു കേട്ടരു. അദുനെ തൊട്ടെരളൊക്ക ചാരിയാനരു.