TITO 3 - Nuevo Testamento en Quichua Cañar 1996

Criccuna ima shina causanamanta

¹ Criccunataca llactata mandaccunatapish, pueblota mandaccunatapish allita cazushpa, imata ruhuachun mandacpipish cushilla ruhuachunlla nishpa yachachingui.

² Pitapish mana allichu nishpa ama rimachun, pihuanpish mana p'iñanacushpa, caishuc chaishuchuan apanacushpa, alli shungu cachun yachachingui.

³ Ñaupaca ñucanchicpish Diosta mana cazuc, yuyai illac, juchapi chingarishca, ñucanchic munaillata ruhuashpa cushicuna yuyaillapi huatashca shinami causacurcanchic. Chashna mana allillapi causacushpami, shuccuna ama charichun munashpa, caishuc chaishuchuan p'iñanacushpa causacurcanchic.

⁴ Chashna causacucpipish ñucanchicta Quishpichic Taita Diosca pai c'uyac, llaquic cashcata ricuchishpami,

⁵ ñucanchicta quishpichirca. Mana ñucanchic ima allita ruhuashcamantachu quishpichirca, ashtahuanpish ñucanchicta llaquishcallamantami quishpichirca. Taita Diosca paipac Espirituhuan tucui juchacunamanta chuyayachishpami, mushuc causaita curca.

⁶ Ñucanchic Quishpichic Jesucristomantami, Taita Diosca paipac Espirituta ñucanchicmanca yallita curca.

⁷ Taita Dios yallita c'uyashpami, paihuan alli tucushpa, ñucanchic shuyacushca huiñai causaita japichun chashnaca ruhuarca.

⁸ Chaica chashnatacmi can. Chaimanta Taita Diosta criccuna allicunallata ruhuashpa causanataca, allita yachachina cangui. Chai alli ruhuanacunami tucui mashna alli causangapac alli can.

⁹ Shina cacpipish imapish yanga parlocunamanta, mana yupaipac ñaupa taitacunapac shuticunamanta, Moisés mandashcacunata pactachinami nishpa p'iñanacunamanta, shinallatac ima shuctac p'iñanacunamantapish huacaichiringui. Chaicunaca imapish mana alli cashpami yangalla can.

¹⁰ Maijanpish tandanacushca criccunapurapish p'iñanacuipi churacpica, ishcai cutincaman cunashpa rimangui. Chashna cunashcata mana uyacpica, tandanacushca criccunapuramanta llucchishpa cachangui.

¹¹ Chai runa pandarishcamanta mana allita ruhuashpa, paillatac llaquiman ricushcata yachanami cangui.

Tito imata ruhuana cashcamanta

¹² Artemas runata cashpa, Tíquico runata cashpa cambacman ñuca cachacpica, Nicópolis pueblopi ñucata ricungapac ima shinapish shamunata yuyangui. Tamia quillacunapica chaipimi canata munani.

¹³ Chai abogado Zenasta, shinallatac Apolosta paicunapac rinapi imapish ama illachun, ima shinapish imallata cushpa ayudangui.

¹⁴ Chashna ñucanchicpuramanta caccunaca allita ruhuashpa, huacchacunaman ima illashcata cushpa ayudashpa, Taita Diospac ñaupapi allicuna cachunmi nini.

Tucuchingapac “allilla cashca cachun” nishcamanta

¹⁵ Tucui ñucahuan caccunami cantaca “allilla cashca cachun” nishpa cachancuna. Shinallatac ñucanchicta c'uyac caishuc criccunatapish “allilla cashca cachun” nishpa cungui ninimi. Taita Diosca paipac sumaimana c'uyaita tucui cancunaman cushca cachun ninimi.