SANTIAGO 4 - Nuevo Testamento en Quichua Cañar 1996

Cai pachapaclla caccunata mana munanamanta

¹ Cancunapuraca, ¿ima nishpatac macanacunguichic, p'iñanacushpa rimanacunguichic? Cancunapac shungupi millai munaicuna tiyashpa, caita chaita yuyachicucpimi, chashnaca ruhuanguichic.

² Cancunaca imallata japishun nishpapish, mana japinguichicchu. Shuccuna ama charichun nishpa huañuchishpapish, imata mana japinguichicchu. Chashna mana japishpaca, p'iñanacushpami macanacunguichic. Taita Diosman mana mañashcamantami, ima munashcataca mana japinguichic.

³ Imata mañashpapish, mana allita ruhuashpa tucuchingapaclla mana alli munaihuan mañashcamantami, mana japinguichic.

⁴ ¡Aij, Diosta mana cazuc gentecunalla! Cai pachapaclla caccunata c'uyacca, Taita Diostaca p'iñanmi. Chaitaca, ¿manachu yachanguichic? Maijanpish cai pachapaclla caccunata c'uyasha niccunaca, Taita Diosta p'iñaccunami tucun.

⁵ Shina cashcamantami Dios quillcachishcapica: “Ñucanchic shungupi tiyac espirituca, allitapish mana allitapish ruhuana yuyaita cunmi” nicun. Chaitaca, ¿yangalla cashcatachu yuyanguichic?

⁶ Ashtahuanpish Dios mai c'uyac cashcamantami ñucanchictaca ayudacun. Pai quillcachishcapica Taita Diosca: “Jatun tucushcacunataca p'iñanimi. Shina cashpapish mana jatun tucushcacunataca c'uyanimi” ninmi.

⁷ Diablota mana ricunachishpa, Taita Diosllata cazuichic. Shina ruhuacpica, diabloca cancunamanta caruyangallami.

⁸ Taita Diosman cuchuyaichic, paipish cancunapacman cuchuyangallami. Mana allita ruhuashpa juchalliccunaca, maquita jahuac shina chaita ruhuanata saquichic. Taita Diostapish, cai pachapaclla caccunatapish c'uyasha niccunaca, shunguta allichichic.

⁹ ¡Chaimanta llaquirichic, nanarichic, huacaichic, asinapac randica huacaichic! ¡Cushicunapac randica llaquirichic!

¹⁰ Apunchic Jesuspac ñaupapica, ama jatun tucuichicchu. Chashna mana jatun tucucpimi, paica “jatunmi canguichic” ninga.

Criccunapura mana juchanchinacunamanta

¹¹ C'uyashca criccuna, caishuc chaishuc imapish mana allitaca ama huashalla rimanacuichicchu. Maijanpish shuc cricta mana allichu nishpa rimashpa, mana cashpaca juchanchishpaca, Dios mandashcata mana cazushpami mana alli nishpa juchanchin. Mandashcata mana allichu nishpa mana cazushpaca, juez shinami tucungui.

¹² Mandashcata cucca shucllami tiyan. Paillatacmi Juezca can, paillatacmi quishpichina cacpipish quishpichinga. Mana cashpaca, jatun llaquiman cachana cacpipish cachanga. Ashtahuanpish shuccunata mana alli nishpa juchanchingapacca, ¿canca imatac canguiyari?

“Cayaca chaitami ruhuasha” nishpa, mana jatun tucunamanta

¹³ “Cunan cashpa, caya cashpa, cai llactaman, chai llactaman jacuchic, chaipica shuc huatacaman randishpa, c'atushpa cullquita mirachishun” niccunaca, caita uyaichic:

¹⁴ Caya punzha cancunapac causai ima tucuna cashcataca, manamari yachanguichicchu. Cancunapac causaica p'uyu ashata ricurishpa, tigrai chingaric shinallami.

¹⁵ Chaipac randica: “Mandac Dios munacpi causashpaca, caitapish, chaitapish ruhuashunmi” ninami canguichic.

¹⁶ Ashtahuanpish cancunaca jatun tucushpami: “Caitapish, chaitapish ruhuashunmi” nicunguichic. Chai shina jatun tucushpa rimanaca mana allichu.

¹⁷ Maijanpish allita ruhuana cashcata yachashca jahua mana ruhuacca, juchayucmi tucun.