SANTIAGO 2 - Nuevo Testamento en Quichua Cañar 1996

Pitapish mana ch'icanyachinamanta

¹ Ñuca c'uyashca criccuna, cancunaca ñucanchic sumaimana Apunchic Jesucristota criccuna cashcamantaca, “caica allimi, chaica mana allichu” nishpaca, mana ch'icanyachinachu canguichic.

² Cai shina yuyarishunchic: Cancunapac tandanacuimanca shuc alli chayuc runa curi sorteja churashca, sumac churanahuan yaicungachari. Shinallatac shuc huaccha, imata mana charic mauca churanahuan runapish yaicungachari.

³ Chai chayuc runa yaicucpica, cushilla c'ayashpami: “Caipi tiyari” nishpa, alli tiyarinapi tiyachinguichicman. Cutin caishuc huaccha runataca: “Canca caillapi shayari, mana cashpaca pambapi tiyari” ninguichicmanmi.

⁴ Chai shina cancunapurallatac “caica allimi, chaica mana allichu” nishpa ch'icanyachishpaca, mana alli yuyaicunahuanmi ruhuacunguichic.

⁵ Ñuca c'uyashca criccuna, caita uyaichic: Taita Diosca cai pachapi imata mana chariccunataca, crishcahuan chayuc tucuchunmi acllarca. Dios maipi mandacucpi paita c'uyaccuna pai cusha nishcata japichunmi, chashnaca acllarca.

⁶ Shina cacpipish cancunaca “imata mana charinchu” nishpami, huacchacunataca yangapi churanguichic. Cancunata llaquichishpa, juezpacman apaccunaca, ¿manachu chayuccuna can?

⁷ ¿Manachu paicunallatac cancuna alli nina sumaimana Apunchic Jesuspac shutitapish mana allichu nishpa rimancuna?

⁸ Tucuimanta yalli mandashcata pactachishpaca, allitami ruhuanguichic. Dios quillcachishcapica: “Can quiquinllatac ima shinami c'uyaringui, chai shinallatac shuccunatapish c'uyangui” ninmi.

⁹ Ashtahuanpish “caica allimi, chaica mana allichu” nishpaca, cancunallatacmi juchallinguichic. Shinallatac Dios mandashcata mana cazushcamantaca, juchanchishcami cana canguichic.

¹⁰ Maijanpish tucui mandashcacunata pactachicushpapish, shuc mandashcallata mana pactachishpaca, tucui mandashcata mana pactachishca shinallatacmi tucun.

¹¹ Taita Diosllatacmi: “Ama huaclliringui” shinallatac “ama huañuchingui” nirca. Shina cashcamanta maijan mana huacllirishpapish huañuchishpaca, tucui mandashcacunata mana pactachic shinallatacmi tucun.

¹² Ñucanchicta huatashca shinamanta cacharichic mandashcapi nishca shinami, Diosca taripanga. Shina cashcamanta imatapish allita rimaichic, shinallatac allita ruhuaichic.

¹³ Shuccunata mana llaquiccunataca, paicunatapish mana llaquishpami, Taita Diosca taripashpa llaquichinga. Ashtahuanpish shuccunata llaquiccunataca, taripana punzhapica alli ningami.

Crishpaca, imata ruhuashpatac ricuchina cashcamanta

¹⁴ Ñuca c'uyashca criccuna, “cricmi cani” nishpapish, imapish allicunata mana ruhuashpaca, ¿ima allitac cangayari? Chashna “cricmi cani” nishpallaca, ¿paica quishpiringachu?

¹⁵ Cai shina yuyarishunchic: Cric pani cashpa, cric huauqui cashpa, churana illac, micuna illac causacungachari.

¹⁶ Chaita ricushpapish, maijan cancunapuramanta ima illashcata mana cushpa: “Allilla richic, alli churarichic, alli micuichic” nishpaca, ¿ima allitac cangayari?

¹⁷ Chai shinallatacmi crishpapish, ima allita mana ruhuacpica, mana crishca shinallatac canga.

¹⁸ Ashtahuanpish maijanca: “Canca cricmi cangui, cutin ñucaca allicunata ruhuacmi cani” ningachari. Chashna nictaca: “Ima allita mana ruhuashpaca, can crishcata ricuchinguichari” ninimi. Cutin ñucaca imatapish allita ruhuashpaca, cric cashcatami ricuchisha.

¹⁹ Canca shuclla Dios tiyashcatami cringui. Chai shina crishpaca, allitami ruhuangui. Chai shinallaca supaicunapish crincunami, shinallatac manchaihuanpish chucchuncunami.

²⁰ Ama upa shina caichu. Can crishpapish, ima allita mana ruhuashpaca, mana crishca shinallatacmi cangui.

²¹ Ñucanchic ñaupa taita Abrahamtaca, paipac churi Isaacta huañuchingapac Diosman cushcamantami, Taita Diosca “cashcata ruhuacmi” nishpa chasquirca.

²² Taita Abrahamca chashna ruhuashpami, pai crishcataca ricuchishca. Chashna ruhuashcamantami, pai tucui shunguhuan allita crishcata Diosca ricurca. Chaitaca yuyarinami canguichic.

²³ Chashnami Dios quillcachishcaca pactarca. Chaipica: “Abrahamca Taita Diosta crircami. Chashna crishcamantami Taita Diosca paihuan alli tucuchun chasquirca” ninmi. Chaimantami Abrahamtaca Taita Diosca “ñucahuan apanacucmi cangui” nirca.

²⁴ Taita Diosca “cricmi cani” nicllapica mana chasquinchu, ashtahuanpish allita ruhuashcamantami chasquin. Chaitaca ña ricunguichicmi.

²⁵ Chai shinallatacmi chai huacllirishpa causac Rahab huarmitapish, chai llactata pacalla ricungapac shamuccunata huasipi chasquishpa shuc ñanta cachashcamanta, Taita Diosca “cashcata ruhuacmi” nishpa chasquirca.

²⁶ Shina cacpica, shuc cuerpoca alma illacllaca mana causai pudinchu. Chai shinallatacmi “cricmi cani” nishpalla, ima allita mana ruhuashpaca, mana crishca shinallatac can.