SANTIAGO 1 - Nuevo Testamento en Quichua Cañar 1996

“Allillachu canguichic” nishpa, Santiago quillcashcamanta

¹ Ñucaca Diospacta, Apunchic Jesuspacta ruhuac Santiagomi cani. Israelpac*f** chunga ishcai aillucuna shiguarishpa, caipi chaipi causac criccunata “allillachu canguichic” nishpami, cai quillcata cachani.

Llaquicuna japicpipish cushicuna cashcamanta

² Ñuca c'uyashca criccuna, cancunata ima llaquicuna japicpipish, cushicuita cuna cashcatami yuyana canguichic.

³ Cancuna cric cashcamanta ima llaqui japicpica, mana p'iñarishpa, alli shunguhuan llaquicunata apana cashcatami yachacunguichic. Chaitaca ña yachanguichicmi.

⁴ Ashtahuanpish tucuimanta yallica mana p'iñarishpa, alli shunguyuc canata yuyaichic. Chashna cashpami alli sinchiyashpa, imapish mana illac, pipish mana juchanchipac, alli criccuna canguichic.

⁵ Cancunapuramanta maijanpish yachaita mana charishpaca, Diosman mañaichic, paica cungallami. Diosca pimanpish mana misarishpami, tucui mañaccunamanca achcata cunga.

⁶ Ashtahuanpish cancuna Diosman mañashpaca, tucui shunguhuan crishpami, japina yuyailla mañana canguichic. Maijanpish jahua shungullahuan mañacca, cucha yacu huairahuan caiman chaiman cuyucuc shinallami can.

⁷ Maijanpish chashna mañacca Mandac Diosmanta imatapish japina cashcata ama yuyachun.

⁸ Chashna mana shuc yuyailla cashpami, cunanca cai shina yuyan, cutin cayandicca shuc layata yuyan. Chashna cashpaca, tucui causaipimi mana alli causan.

⁹ Maijan cric imata mana charishpapish, Dios jatunyachina cashcamantaca cushillami cana can.

¹⁰ Shinallatac chayucpish pai charishca ima mana cashcata Dios ricuchicpi, cushillami cana can. Chayucca q'uihua sisa shina tucuriclla cashcamantaca, chingarinallami can.

¹¹ Sisaca inti llucshishpa, sinchita rupacyachishpa, q'uihuata chaquichicpica urmanllami. Chaipimi pai sumac cashcaca chingarin. Chai shinallatacmi chayucpish, paipac randina, c'atuna cashcata saquishpa chingaringalla.

Mana alli munaicuna shamucpi, mishana cashcamanta

¹² Imapish mana alli munaicuna shamucpi, chaita mishacmanca mai cushicuimi canga. Chashna mishacmi Dios paita c'uyaccunaman cusha nishca huiñai causai coronataca japinga.

¹³ Maijantapish mana alli ruhuana munaicuna japicpica, “Diosmi chai munaitaca cun” nishpa, ama yuyachun. Diosca jaicapi ima mana allita mana ruhuanchu. Chashna cashcamanta Dios mana allita ruhuachicushcataca ama yuyachun.

¹⁴ Ashtahuanpish quiquinllapitac mana alli munaicuna tiyashcamantami, chai mana alli munaicunaca mishquilliric shina, mana allita ruhuanaman pushan.

¹⁵ Chai shina mana alli munaicuna tiyashcamantami, juchaca huacharic shina ricurin. Chai jucha ricurishpa miramushpaca, huañuimanmi apan.

¹⁶ Ñuca c'uyashca criccuna, ama pandarichicchu.

¹⁷ Jahua pachapi imalla tiyashcatapish ruhuac Diosmantami, ima allita ruhuana yuyaipish, cashcata ruhuana yuyaipish shamun. Diosca huiñai huiñaicamanmi Paillatac can. Paica mana shuctacyashpa, huiñaitami achicyachicungalla.

¹⁸ Diosca chai shina munashcamantami, cashcata nic alli huillaita huillashpa, ñucanchicmanca causaita curca. Tucui pai ruhuashcacunamanta ñucanchic punta cachunmi, chashnaca ruhuarca.

Alli huillaita huillashcata pactachina cashcamanta

¹⁹ Ñuca c'uyashca criccuna, imapish uyanallataca alli uyaichic. Shinallatac rimaringapacpish, p'iñaringapacpish jarcariccuna caichic. Chaitaca alli yuyarichic.

²⁰ Pipish p'iñaricca, Dios munashcataca mana ruhuanchu.

²¹ Chashna cashcamanta imapish mana alli mapa causacushcamanta, shinallatac tucui mana allicunamantapish anchurichic. Cancunapac shungupi tarpushca alli huillaitaca c'uyac shunguhuan chasquichic. Chai alli huillaimi cancunataca quishpichinata pudin.

²² Ashtahuanpish cai alli huillaitaca ama uyaccunalla caichicchu, pactachiccunatac caichic. Chashna uyaccunalla cashpaca, cancunallatacmi mana allita ruhuashpa pandaringuichic.

²³ Maijanpish quishpirinamanta alli huillaita uyashpa mana pactachicca, paipac ñahuita espejopi ricuric shinallami.

²⁴ Espejopi pai ricurishpapish, ña shuc ladoman tigrarishpaca, pai ima shina cashcataca cungarinmi.

²⁵ Ashtahuanpish huatashca shina cashcamanta cacharichic, Dios mandashpa rimashca shimita uyashpa, mana cungarishpa, shungupi huacaichicca imata ruhuashpapish cushicungami.

²⁶ Maijanpish “ñucaca alli cricmi cani” nishpapish, paipac c'alluta mana jarcaricca paillatacmi pandaricun. Shinallatac pai “alli cricmi cani” nishcapish, yangallami can.

²⁷ Maijanpish Taita Diospac ñaupapi Diosta tucui shunguhuan alli cricca, llaquilla cac viuda huarmicunatapish, taita mamata mana charic llaquilla cac huahuacunatapish ayudanami can. Shinallatac cai pachapi tiyac imapish juchallinacunamantaca huacaichirinami can.