ROMANOS 9 - Nuevo Testamento en Quichua Cañar 1996

Israelcunata Taita Dios acllashcamanta

¹ Apunchic Jesusta cric cashcamantami, imatapish mana llullashpa cashcatatac nicuni. Shinallatac ñuca yuyaipish Diospac Espíritu pushashca cashcamantaca, caicunaca alli cashcatami yachani.

² Ñuca shungupica mai llaquirishpami punzhanta nanaihuan cani.

³ Chaimantami ñuca quiquin aillucunapac randi, ñucallatac Cristomanta anchurishpa, llaquichishca canata munaiman.

⁴ Paicunaca taita Israelpac*f** huahua huahuami cancuna. Shina cashcamantami Diosca paipac huahuacuna cachun acllarca. Taita Diosca paipac sumaimana cashcatapish paicunamanca ricuchircami. Paicunaca Moisés mandashcacunatapish, Dios c'uyashpa paicunaman ari nishcacunatapish, Dios cusha nishcacunatapish charinmi. Shinallatac ima shina Diosman mañanatapish yachancunami.

⁵ Paicunaca ñucanchic ñaupa taitacunapac huahua huahuacunami can. Paicunapuramantami Cristoca runa tucurca. Paitaca tucuita Mandac Dios cashcamantami huiñai huiñaita alli nina canchic.

⁶ Ashtahuanpish israelcunaman*f** Dios cushami nishcataca mana pactachishcachu nishpaca, mana ninichu. Taita Israelpac huahua huahuacuna mana tucui mashna israelcunatac cashcamantami chashnaca nini.

⁷ Shinallatac taita Abrahampac huahua huahuacunapish mana tucuichu paipac huahuacunatac can, ashtahuanpish Taita Diosca: “Cambac churi Isaacpac huahua huahuacunallami cambac huahuacuna canga” nishcami.

⁸ Shina cacpica, mana tucui Abrahampac huahua huahuacuna Dios acllashca cashcata, ashtahuanpish Taita Dios cusha nishcamanta tiyashca huahuacunallatac Dios acllashca cashcatami yachanchic.

⁹ Taita Dios Abrahamman cusha nishpaca: “Ñuca shamusha nishca punzhapimi cutin shamusha. Chai punzhapimi cambac huarmi Saraca shuc c'ari huahuata charinga” nishcami.

¹⁰ Chaillapish mana canchu, ashtahuanpish ñucanchic ñaupa taita Isaacpac huarmi Rebecapish ishcai huahuatami charirca.

^11-13 Paicuna manarac huacharicpi allita, mana allita manarac ruhuacpimi, Taita Diosca Rebecamanca: “Punta churimi q'uipa churita servic canga” nishcami. Dios quillcachishcapipish: “Jacobotami c'uyarcani, Esautaca p'iñarcanimi” ninmi. Chashnami Taita Diosca pai munashca shinata ruhuashpa, paicuna ima ruhuashcatapish mana yuyarishpa, pai acllasha nishcacunallata acllac cashcata ricuchin.

¹⁴ Chashna cacpica, ¿Taita Diosca mana allitami ruhuashca nishunchu? ¡Mana chashnachu!

¹⁵ Taita Diosca Moisesmanca: “Maijantami ñuca llaquisha nishcatami llaquisha, shinallatac maijantami ñuca c'uyasha nishcatami c'uyasha” nishcami.

¹⁶ Shina cacpica gentecunalla munashpa, imata ruhuashcamantaca Diosca mana llaquinchu, ashtahuanpish pai c'uyashcallamantami llaquin.

¹⁷ Dios quillcachishcapica Egipto llactata jatun mandacman Dios rimashpaca: “Can imalla tucushcata ricushpa ñuca imatapish ruhuaclla cashcata yachachun, shinallatac tucui llactacunapi causaccuna ñucata ricsichunmi, cantaca mandac cachun churarcani” nishcami.

¹⁸ Shina cashcamantami Taita Diosca maijantami pai llaquisha nishpaca llaquinlla, shinallatac shunguta sinchiyachisha nishpaca sinchiyachinlla.

¹⁹ Shina cacpica, ¿imamantatac Diosca pitapish juchanchingayari? “Taita Diospac munaitaca pipish mana jarcai pudinchu” ninguichari.

²⁰ ¿Canca pi cashpatac Taita Diosta taripashpa tapunguiyari? ¿Allpamanta mangata ruhuactaca mangaca: “¿Ima nishpatac chashnaca ruhuarcangui?” ningachu?

²¹ Mangata ruhuacmi allpamanta imatapish pai munashca shina ruhuanata pudin. Chai allpallamantatacmi shuc mangataca allipac ruhuan, cutin shuctacca imatapish churangapac ruhuan.

²² Chai shinami Taita Diosca pai p'iñarishpa llaquichiclla, shinallatac imatapish ruhuaclla cashcata ricuchingapac, maijanta p'iñashpa tucuchina cacpipish, mana llaquichishpa shuyacurcalla.

²³ Ñucanchicta llaquishpami, ñaupamanta pacha pai c'uyacushcataca ricuchirca. Shina cashpami, pai sumaimana cashcata ricuchishpa, paipac llactapi causagrichun ña acllarca.

²⁴ Shina cashcamantami Taita Diosca shuccunataca israelcunapuramanta, shuccunataca mana israelcunapuramanta*f** ñucanchictaca acllarca.

²⁵ Oseasman Dios rimashpa quillcachishcapica: “Mana ñuca c'uyashca gentecunataca ‘ñucapacmi canguichic’ nishami. Mana ñuca c'uyashcacuna cacpipish, ‘ñuca c'uyashcacunami canguichic’ nishami.

²⁶ Shinallatac maipimi ‘cancunaca mana ñuca huahuacunachu canguichic’ nircani, chaillapitacmi ‘cancunaca causac Diospac huahuacunami canguichic’ nisha” nishcami.

²⁷ Israelcunamantapish ñaupa huillac Isaías huillashpaca: “Israelpac huahua huahuacuna t'iyu shina mana yupaipac cashpapish, ashallacunami quishpiringacuna.

²⁸ Taita Dios pai taripana cashcataca pai ruhuana cashca shinallatacmi, ñalla tucui cai pachapi pactachinga” nishcami.

²⁹ Isaiasllatacmi ñaupamanca: “Tucuita Mandac Dios shucllatapish huahua huahua tucushpa miranacuchun mana saquishca cacpica, cunanllatacmi Sodoma*f** shina, Gomorra*f** shina tucuchinman carca” nishcami.

Alli huillaica israelcunamanpish cashcamanta

³⁰ Shina cacpica, ¿imatatac nishun? Taita Dioshuan alli canata mana yuyaricpipish, Diosmi mana israelcunata*f** paita crishpalla paihuan alli tucuchun chasquirca.

³¹ Ashtahuanpish israelcunaca*f** Moisés mandashcacunata pactachishpa, Taita Dioshuan alli tucushun nicushpapish mana pudircacunachu.

³² ¿Imamantatac chashnaca carca? Paicunaca crishcallamanta Taita Dioshuan alli tucunata mana munarcacunachu, ashtahuanpish mandashcacuna nishcata pactachishpami, Taita Dioshuan alli tucunata munarcacuna. Chaimantami mitcarina rumipi mitcarircacuna.

³³ Chaitaca Dios quillcachishcapica: “Sión*f** pueblopimi shuc rumita churani. Chai rumipimi mitcarishpa urmangacuna. Pipish chai rumipi shunguta churacca mana pingaichishcachu canga” ninmi.