ROMANOS 8 - Nuevo Testamento en Quichua Cañar 1996

Diospac Espíritu yuyaita cushca shina causanamanta

¹ Chashna cashcamanta cunanca maijanpish Jesucristohuan shuc shinalla caccunamanca, ña mana jatun llaquica tiyangachu.

² Jesucristohuan shuc shinalla tucushpa causaccunataca, Diospac Espíritu causaita cushpa mandacushcamantami, jucha mandashpa causanamantapish, huañuimantapish chashnaca cacharichirca.

³ Taita Diosmi paipac shuclla Churita juchayuc gentecunapac randi runa tucushpa, llaquita apashpa, juchacunamanta Diosman cushca shina huañuchun cacharca. Moisés mandashcacunata gentecunapac munaillamanta mana pactachipac cacpimi, chashnaca ruhuarca. Chai shina ruhuashpami, gentecunapi tiyac juchataca tucui chingachirca.

⁴ Mandashcacuna chashnatac nicushcata ñucanchic pactachichunmi, chashnaca ruhuarca. Ñucanchicca mana cai pacha jucha munashca shinachu causacunchic, ashtahuanpish Diospac Espíritu yuyaita cushca shinami causacunchic.

⁵ Maijanpish cai pacha jucha munashcata ruhuaccunaca, jucha munashca shina causanatami munancuna. Ashtahuanpish Diospac Espíritu yuyaita cushca shina causaccunaca, Diospac Espíritu munashca shina causanatami munancuna.

⁶ Cai pacha jucha munashcata ruhuashpa causaccunaca huañuitami japinga. Ashtahuanpish Diospac Espíritu yuyaita cushca shina causaccunaca, sumac causaitami charinga.

⁷ Maijanpish cai pacha jucha munashcata ruhuashpa causaccunaca Taita Diostaca p'iñanmi. Paicunaca Dios mandashcacunataca uyanatapish, cazunatapish mana pudincunachu.

⁸ Chaimantami cai pacha jucha munashcata ruhuashpa causaccunaca, Diostaca mana cushichi pudincuna.

⁹ Cancunapica Diospac Espiritumi causacun. Chaimantami cai pacha jucha munashca shinaca mana causacunguichic, ashtahuanpish Diospac Espíritu yuyaita cushca shina causacunguichic. Maijanpish Cristopac Espirituta mana charicca, mana Cristopacchu.

¹⁰ Juchata ruhuashpa causacushcamantaca, cancunapac cuerpoca huañunami can. Shina cacpipish Cristo cancunapi causacushcamantaca, Dioshuan alli tucushcamantami, paipac Espíritu cancunamanca causaita cun.

¹¹ Jesusta causachic Diospac Espiritullatac cancunapi causacucpica, Diosllatacmi cancunapac huañunalla cuerpotaca cancunapi causac paipac Espiritumanta causachinga.

¹² Chashna cacpica c'uyashca criccuna, ñucanchicca ima ruhuanataca ña charinchicmi. Shina cacpipish, mana cai pacha jucha munashca shinata ruhuanachu canchic.

¹³ Cai pacha jucha munashca shina causacushpaca, huañunguichicmi. Shina cashpapish Diospac Espíritu yuyaita cushcahuanca, cai pacha jucha munashcataca chingachinguichicmi. Shina chingachishpaca causanguichicmi.

¹⁴ Diospac Espíritu yuyaita cushca shina causaccunaca, tucuimi Diospac huahuacuna can.

¹⁵ Cancunaca mana cutinllatac manchaita cuc, huatashca shina causanaman apac espiritutachu chasquircanguichic, ashtahuanpish Diospac huahuata ruhuac Espiritutami chasquircanguichic. Chai Espiritumantami: “Ñuca Taitalla” nishpa Taita Diosman mañanchic.

¹⁶ Diospac Espiritullatacmi ñucanchic espirituhuan shuc shinalla tucushpa, ña Taita Diospac huahua cashcataca ricuchin.

¹⁷ Ña paipac huahuacuna cashcamantaca, pai cusha nishca japina cashcatapish Cristohuan japishunmi. Chai japinataca Apunchic Jesucristo llaquita apashca shinallatac llaquita apashpami, sumaimana cushicuipi paihuan japishun.

Sumaimana cushicui shamuna cashcamanta

¹⁸ Q'uipa punzhapi sumaimana cushicui causaita Taita Dios cucpi ñucanchic cushicuna cacpica, cunan punzha llaquita apacushcaca imapish mana canchu. Chaitaca yachanimi.

¹⁹ Taita Dios tucui ima ruhuashcacunami, maijancunalla Diospac huahuacuna cashcata ricuchina punzhata ricuna yuyailla shuyacuncuna.

²⁰ Tucui cai pachapi Taita Dios ruhuashcacunaca, mana paicuna munaillamantachu Taita Dioshuan cushicunamantaca ch'icanyarishpa, yangalla tucurca, ashtahuanpish Diosllatacmi punzhanta shuyachun nishpa chashnaca ruhuarca. Shina ruhuacpimi,

²¹ Diospac huahuacuna huatashca shinamanta cacharishpa, sumac cushicuipi cacpica, Taita Dios tucui ima ruhuashcacunapish chai chingarinalla huatashca shinamanta cachariringa.

²² Cai pachapi tucui ima tiyashcacunaca, shuc huarmi sajuarina nanaihuan llaquita apashpa “¡alau!” nicuc shina, cunancaman llaquita apacushcatami yachanchic.

²³ Mana paicunallachu llaquita apacun, ashtahuanpish Dios cusha nishcata japingapac ña paipac Espirituta chariccunapish llaquita apacunchicmi. Taita Dios paipac huahuacunata ricuchina punzhapi ñucanchic cuerpota huatashca shinamanta llucchictami shuyashpa, shungumanta llaquita apacunchic.

²⁴ Chaita shuyacushpami ña quishpirishca canchic. Shina cacpipish chai shuyacushcata ña ricushpaca, mana shuyanachu can. Ña ricushcataca, ¿pitac shuyangayari?

²⁵ Ashtahuanpish manarac ricushcata shuyacushpaca, llaquita apashpapish ricuna yuyaillami shuyacunchic.

²⁶ Diospac Espirituca ñucanchic mana imata ruhuaipac cacpipish ayudanmi. Taita Diosman mañashpapish, mana mañana cashca shinachu mañanchic. Shina cacpipish Diospac Espiritullatacmi llaquirishpa, ñucanchic mana rimaipac rimaicunahuan ñucanchicmanta Taita Diosman mañacun.

²⁷ Shinallatac shungu yuyashcata yachac Taita Diosca, paipac Espíritu imata mañacushcataca yachanmi. Diospac Espirituca Dios munashca shinami Diospaclla caccunamantaca mañacun.

Crishpa mishana cashcamanta

²⁸ Taita Diosca paita c'uyaccunataca tucui ima ruhuanapipish allitami pushan. Chaicunaca pai munashcata ruhuangapac acllashcacunami.

²⁹ Taita Diosca paipac Churi achca criccunamanta punta cachunmi, ñaupaman ricsishcacunataca callarimanta pacha paipac Churi Jesucristo shina cachun ch'icanyachirca.

³⁰ Shinallatac callarimanta ch'icanyachishcacunataca Diosca c'ayarcami. Chai c'ayashcacunataca paihuan alli tucuchun chasquircami. Paihuan alli tucushcacunamanca paipac sumaimana cushicui causaipi causachun curcami.

³¹ Shina cacpica, ¿imatatac nishunyari? Taita Dios ñucanchichuan cacpica, ¿pitac ñucanchictaca llaquichi pudingayari?

³² Taita Diosca paipac quiquin Churitaca tucui ñucanchicmanta llaquita apachunca, mana jarcarishpami saquircalla. Chashna saquishpaca, ¿manachu paipac Churita cushca shinallatac imatapish cunga?

³³ Taita Dios acllashcacunataca, ¿pitac juchanchingayari? Taita Diosmi paihuan alli tucuchun paicunataca chasquin.

³⁴ ¿Pitac juchanchishpa llaquiman cachangayari? Jesucristomi ña huañurca. Paillatacmi huañushcacunapuramanta causarishpa, Taita Diospac alli maquiman rishpa ñucanchicmanta mañacun.

³⁵ Llaquita apacucpipish, ima yarcai tiyacpipish, llaquichicpipish, micuna illacpipish, churana illacpipish, huañuna manchai tiyacpipish, huañuna cacpipish, ¿pitac Cristopac c'uyaimantaca ñucanchictaca anchuchingayari?

³⁶ Dios quillcachishcapica: “Canmantami ima punzhapish huañuchishca canalla canchic. Ovejata huañuchinaman apashca shinatami charincuna” ninmi.

³⁷ Ashtahuanpish pai c'uyacpimi, tucui imatapish mishaccunalla canchic.

³⁸ Taita Diospac c'uyaimantaca imapish mana anchuchina cashcataca yachanimi. Huañuna cacpipish, causana cacpipish, angelcunapish, poderta charic espiritucunapish, cunan ima tucushcapish, q'uipa ima tucunapish,

³⁹ jahua pachapish, ucu pachapish, tucui ima tiyaccunapish, ñucanchic Apunchic Jesucristomanta ñucanchicta Taita Dios c'uyashcamantaca imapish mana anchuchingachu.