ROMANOS 4 - Nuevo Testamento en Quichua Cañar 1996

Taita Abraham crishpalla Taita Dioshuan alli tucushcamanta

¹ Shina cacpica, ñucanchic ñaupa taita Abrahammantaca, ¿imatatac nishun? ¿Paica imatatac japishca canga?

² Taita Abraham pai imata ruhuashcamanta Taita Dios paihuan alli tucuchun chasquishca cacpica, jatun tucuipacmi carca. Shina cacpipish, Taita Diospac ñaupapica mana jatun tucuipacchu carca.

³ Dios quillcachishcapica: “Abrahamca Taita Diosta crircami. Chashna crishcamantami Taita Diosca paihuan alli tucuchun chasquirca” ninmi.

⁴ Maijan imata ruhuashcamanta japina cashcata japishpapish mana yanga japinchu, ashtahuanpish pai imata ruhuashcamantami japin.

⁵ Shina cacpipish juchacunata perdonashpa, paihuan alli tucuchun chasquiclla Taita Diosta cricpica, paiman ima allita mana ruhuashca cacpipish, crishcallamantami paihuan alli tucuchun chasquin.

⁶ Mandac Davidpish Taita Diosman ima allita mana ruhuashca cacpipish, paihuan alli tucuchun chasquicpi, cushicushcataca ñami huillashca.

⁷ Davidca: “Millaita ruhuashca cacpipish, Dios perdonashpa, juchata anchuchishcacunamanca ¡mai cushicuimi!

⁸ Juchata mana yuyarishpa Dios chasquishcacunamanca ¡mai cushicuimi can!” nishcami.

⁹ Shina cacpica, ¿circuncisionta*f** ruhuashcacunallachu chai cushicuitaca chasquinga? Mana cashpaca, ¿circuncisionta mana ruhuashcacunapish manachu chasquinga? “Abrahamtaca crishcallamantami Taita Dios paihuan alli tucuchun chasquirca” nishpaca, ñami nishcani.

¹⁰ ¿Abrahamtaca manarac circuncisionta ruhuacpichu chasquirca? Mana cashpaca, ¿circuncisionta ruhuashca q'uipachu chasquirca? Chaica manarac circuncisionta ruhuacpimi, Taita Diosca chasquirca.

¹¹ Abrahamtaca crishcallamantami Taita Diosca paihuan alli tucuchun chasquirca. Ashtahuanpish Dios chasquishcata ricuchingapacmi, q'uipata circuncisionta ruhuarca. Chashnami Abrahamca mana circuncisionta ruhuashca cashpapish, tucui criccunapac taita shina tucurca. Taita Diosca paicunatapish crishcallamantami paihuan alli tucuchun chasquirca.

¹² Abrahamca circuncisionta ruhuashcacunapacpish taitami. Mana circuncisionta paicuna ruhuashcallamantachu, ashtahuanpish Abraham manarac circuncisionta ruhuashpa, pai crishpa ima shina causacushcata yuyarishpa c'aticushcamantami paicunapac taita.

Crishpalla Dios cusha nishcata japina cashcamanta

¹³ Taita Diosca Abrahammanpish, paipac huahua huahuapuramanpish cai pachataca cusha nircami. Abrahammanca mana Moisés mandashcacunata pactachishcallamantachu cusha nirca, ashtahuanpish crishcamanta Taita Dios paihuan alli tucuchun chasquishpami cusha nirca.

¹⁴ Mandashcacunata pactachishpalla Dios cusha nishcata chasquina cacpica, crinapish, Dios cushami nishcapish yangallami canman.

¹⁵ Mandashcacunata yachashpa mana pactachicpica, Diosca llaquichingami. Mandashcacunata mana yachashpa mana pactachicpica, mana juchanchishcachu canga.

¹⁶ Abraham crishcamantami, paipac huahua huahuacunamanca Taita Dios cusha nishca pai c'uyashcallamanta cushca cachun, chashnaca nishca. Dios cushami nishcaca mana mandashcacunata cazuccunallamanchu, ashtahuanpish Abraham shina tucui criccunamanpish canmi. Chashna cacpimi, Abrahamca tucui ñucanchicpac taita shina tucushca.

¹⁷ Dios quillcachishcapica: “Tauca llactacunapi causaccunapac taitami cangui” ninmi. Abraham crishca Diosllatac chashna nicpimi, chashnaca tucun. Paimi huañushcacunatapish causachic, shinallatac ima mana tiyashcacunata ruhuac Diosca can.

¹⁸ Taita Diosca Abrahamtaca: “Cambac huahua huahuacunaca achcami tucunga” nishcami. Abrahamca maita mana huahuata charipac cashpapish, crishpa shuyacushcamantami, chai nishca shinallatac tauca llactacunapi causaccunapac taita tucurca.

¹⁹ Abrahamca pasac huata shinatami charirca. Shinallatac paipish, paipac huarmi Sarapish ña yuyac cashcamanta mana huahuata charishpa, huañunalla cashcatami yacharca. Shina cashpapish, huahuata charinata crinataca mana saquircachu.

²⁰ Chashna cashpami Taita Dios cushami nicpica, mana caita chaita yuyashpa, ashtahuanpish Taita Diosta “allimari cangui” nishpa, ashtahuan crishpa japina yuyailla carca.

²¹ “Diosca imatapish ruhuaclla cashcamanta, pai cusha nishcata cungallami” nishpami Abrahamca shuyacurca.

²² Abraham chashna crishcamantami Taita Diosca paihuan alli tucuchun chasquirca.

²³ Dios quillcachishcapica: “Paihuan alli tucuchun chasquirca” nishpaca, mana Abrahamllamantachu nin,

²⁴ ashtahuanpish ñucanchicmantapish ninmi. Ñucanchic Apunchic Jesusta huañushcacunapuramanta causachic Taita Diosta crishcamantami, paihuan alli tucuchun ñucanchictapish chasquin.

²⁵ Apunchic Jesusca ñucanchic juchacunamantami japi tucushpa huañurca. Ñucanchic paihuan alli tucuchunmi, Taita Diosca Jesustaca huañushcacunapuramanta causachirca.