ROMANOS 3 - Nuevo Testamento en Quichua Cañar 1996

¹ Shina cacpica israel canaca, shinallatac circuncisionta ruhuashca canaca, ¿imapactac alli cangayari?

² Tucui chaicunaca imapacpish allimi can. Chaita ricuchingapacmi, puntaca Taita Diosca israelcunaman pai rimashca shimitaca cushca.

³ Shina cacpica, paicunapuramanta maijancuna mana cazushpaca, ¿imashi tucunga? Paicuna chashna mana cazushcamantaca Diosca pai nishcataca, ¿manachu pactachinga?

⁴ ¡Chaica mana chashnachu! Tucui gentecuna llullac cacpipish, Taita Diosca ima nishcata pactachic cashcamantaca pactachingami. Dios quillcachishcapica: “Can imata nishcapish allillatacmi canga. Canman imata tapucpipish, mana juchanchishcachu llucshingui” ninmi.

⁵ Cunanca gentecuna yuyashca shinami ñuca yuyaillamanta rimagrini: Ñucanchic mana allita ruhuashcacunallatac Taita Diosca cashcata ruhuac cashcata ricuchicpica, ¿imatatac nishun? ¿“Taita Dios llaquichicpica, millaimantami llaquichin” nishunchu?

⁶ ¡Chaica mana chashnachu! Shina cacpica, ¿ima shinatac Taita Diosca cai pachapi causaccunataca taripangayari?

⁷ ¿“Ñuca llullashcacunami Taita Dios sumac cashcata, shinallatac mana llullac cashcata ricuchin” ninachu cani? Shina cacpica, ¿ima nishpatac paica juchayucta shina llaquichinyari?

⁸ Chashna cacpica Taita Dios sumacyachishca cachunca, ¿mana allicunata ruhuashpa c'atishunchu? Chai shinami maijancunaca, ñucata llaquichingaraicu “paica chashnami yachachin” nincuna. Ashtahuanpish chashna niccunataca llaquichina cashca shinallatacmi Taita Diosca llaquichinga.

Tucui mashna juchayuc cashcamanta

⁹ Shina cacpica, ¿“ñucanchic israelcunaca*f** shuccunata atishpami allicuna canchic” nishunchu? ¡Chaica mana chashnachu! Israelcuna cashpapish, mana israelcuna*f** cashpapish, tucui mashna juchapi huatashca shina cashcataca ñami ricuchircani.

¹⁰ Dios quillcachishcapica: “Cashcata ruhuacca shucllapish mana tiyanchu.

¹¹ Alli yuyaita charicpish, pi mana tiyanchu. Diosmanta yachasha nicpish, pi mana tiyanchu.

¹² Tucuimi Diosmanta caruyashpa, mana alliman tigrashcacuna. Allita ruhuacca shucllapish mana tiyanchu.

¹³ Paicunapac shimi rimashcapish sepulturata pascashca shinami. Paicunapac c'allupish llulla c'allumi. Paicunapac parlanacushcapish culebrapac veneno shinami huañuchin.

¹⁴ Paicunaca pitapish ima llaquicuna tucuchun munashpami rimarinacuncuna.

¹⁵ Huañuchingapac callpana cacpipish, paicunapac chaquicunaca utcami callpan.

¹⁶ Paicuna maita purishpapish, llaquichina yuyaillami purincuna.

¹⁷ Pihuanpish sumacta causanataca mana yachancunachu.

¹⁸ Diosta manchana yuyaica paicunapac yuyaipica mana tiyanchu” ninmi.

¹⁹ Taita Dios taripana punzhapi tucui mashna imata mana nishpa upalla saquirichunmi, tucui Moisés mandashcacunaca chai mandashcacunata cazuccunaman huillacun. Chaitaca yachanchicmi.

²⁰ Taita Diosca mandashcacunata pactachishcallamantaca pitapish paihuan alli tucuchunca mana chasquingachu. Chai mandashcacunaca ñucanchic juchayuccuna cashcata ricuchingapacllami can.

Jesucristota crishpalla quishpirina cashcamanta

²¹ Ashtahuanpish cunanca Taita Diosca mandashcacunata pactachishcallamantaca pitapish paihuan alli tucuchun mana chasquic cashpapish, ima shina paihuan alli tucuna cashcatami ricuchishca. Chaitaca Moisés mandashcacunapish, ñaupa huillaccunapish allimi huillan.

²² Taita Diosca Jesucristota crishcamantami, tucui criccunata paihuan alli tucuchun chasquin. Taita Diospac ñaupapica tucui gentecunami chashnallatac can.

²³ Taita Dios quishpichisha nicucpipish, tucui mashna juchayuc cashcamantami paimanta caruyashpa causacushcanchic.

²⁴ Ashtahuanpish Taita Diosca Jesucristo juchapi huatashca shinamanta cacharichicpimi, c'uyashcallamanta paihuan alli tucuchun chasquin.

²⁵ Taita Diosca Jesucristotaca paipac yahuarta jichashpa, juchacunamanta quishpichichunmi cacharca. Quishpirinataca Jesucristota crishpallami chasquinchic. Chashnami Taita Diosca ñucanchic ñaupa juchacunata perdonashpa, ima shina paihuan alli tucuna cashcata ricuchisha nishca. Chashnaca pai mana p'iñaric cashcamantami ruhuarca.

²⁶ Taita Diosca cunanpish paihuan ima shina alli tucuna cashcata ricuchinmi. Chaimantami Jesusta criccunataca pai cashcata ruhuac cashca shinallatac, paicunatapish paihuan alli tucuchun chasquin.

²⁷ Shina cacpica, shuc runaca pai ruhuashcallahuanca Taita Diospac ñaupapica, ¡maitatac jatun tucungayari! ¿Imamantatac chashnaca canga? Chashna tucunaca mana mandashcacunata pactachishcamantachu, ashtahuanpish crishcamantami chashnaca tucun.

²⁸ Tucui caicunamanta yuyarishpaca, Taita Diosca mana mandashcacunata pactachishcamanta, ashtahuanpish Jesusta crishcamanta gentecunataca paihuan alli tucuchun chasquic cashcatami yachanchic.

²⁹ ¿Taita Diosca israelcunapaclla Dioschu? ¿Manachu tucui gentecunapac Dios canga? Ari, shinami can. Taita Diosca tucuipac Diosmi can.

³⁰ Taita Diosca shucllami tiyan. Paimi circuncisionta*f** ruhuashca cacpi, mana ruhuashca cacpipish, Jesusta crishcallamanta pitapish paihuan alli tucuchun chasquin.

³¹ Shina cacpica Jesusta crishcamantaca, ¿Moisés mandashcacunataca yangapi churanchicchu? ¡Mana chashnachu! Ashtahuanpish chai mandashcacuna alli cashcatami ricuchinchic.