ROMANOS 2 - Nuevo Testamento en Quichua Cañar 1996

Taita Diosca imata ruhuashcata ricushpa taripac cashcamanta

¹ Chaimanta can cashpapish, pi cashpapish shuccunata juchanchishpaca, mana perdonashcachu cangui. Shinallatac shuccunata juchanchishpaca, canllatacmi llaquichingapac nishca cangui. Canpish paicuna shinallatacmi ruhuacungui.

² Taita Diosca chashna ruhuaccunataca imata ruhuashcata ricushpa taripac cashcatami yachanchic.

³ ¿Canpish chashnallatac ruhuacushpa, shuccunata juchanchishpa rimashpaca, “Taita Dios llaquichina cashcamanta anchurishami” nishpa yuyanguichu?

⁴ Taita Dios paipac c'uyaillamanta paipacman c'ayashcata mana yuyarishpaca, pai punzhanta llaquicushcatapish, mana p'iñarishpa shuyacushcatapish yangapimi churacungui.

⁵ Ashtahuanpish canca sinchi shungu cashpami, Taita Diosman mana cutirisha ningui. Chaimantami Taita Dios imata ruhuashcata ricushpa taripana punzhapi llaquichishca cangapac, ashtahuan mana allita ruhuashpa c'aticungui.

⁶ Taita Diosca tucuimanmi imata ruhuashcata ricushpa cunga.

⁷ Maijanpish Taita Diospac alli nishca cangaraicu, huiñai causaita japingaraicu allita ruhuashpa causaccunamanca Taita Diosca huiñai causaitami cunga.

⁸ Shina cacpica, maijanpish quiquin munashcata ruhuashpa, cashcata nic huillashcata mana cazushpa, mana allita ruhuaccunataca paipac p'iñaihuan Taita Diosca llaquichingami.

⁹ Israelcunatapish,*f** mana israelcunatapish*f** paicuna mana allita ruhuashcamanta Taita Dios llaquichicpi, llaquita apangacunami.

¹⁰ Shina cacpipish Taita Diosca israelcunamanpish, mana israelcunamanpish, tucui allita ruhuaccunamanca “allimi canguichic” nishpami, sumaimana canatapish, sumac causaitapish cunga.

¹¹ Taita Diosca pimanpish mana tucushpami, imata ruhuashcata ricushpa taripan.

¹² Moisés mandashcacunata mana yachashpa juchata ruhuaccunaca, chai mandashcacunata mana yachashpapish, huiñaitami chingaringacuna. Ashtahuanpish mandashcacunata yachashca jahua juchata ruhuaccunaca, mandashcapi nishca shinallatacmi taripashca canga.

¹³ Mandashcacunata uyashcallamantaca pipish Taita Dioshuanca mana alli tucunchu, ashtahuanpish chai mandashcacunapi ima nishcata cazushpami Taita Dioshuanca alli tucun.

¹⁴ Mana israelcunaca Moisés mandashcacunata mana yachashpapish, paicunapac munaimanta mandashcacunapi nishca shinallatac ruhuashpa, allita, mana allita yachac cashcatami ricuchincuna.

¹⁵ Paicunaca paicunapac ruhuashcahuanmi, paicunapac shungupi mandashcacuna quillcashca shina cashcata ricuchicun. Paicunapac shungupi allita, mana allita yachashpami, paicunapac yuyai alli cacpica, alli ninga. Mana alli cacpica, mana alli ninga.

¹⁶ Alli huillaita ñuca huillashca shina, tucui gentecuna pacalla ruhuashcata Taita Dios Jesucristomanta taripai punzhapimi chashnaca ricuringa.

Israelcunaman Moisés mandashcacuna imata nicushcamanta

¹⁷ Israelcunapuramanta canca: “Israelmi*f** cani” nishpami, “Moisés mandashcacunallapi shunguta churashpa, Dioshuan allimi cani” nishpa puringui.

¹⁸ Taita Diospac munaitapish, shinallatac pai mandashcacuna ima allita acllana cashcata yachachicushcatapish yachanguimi.

¹⁹ Canca: “Ñahui mana ricuccunata pushangapacpish, amsapi puriccunata achicman apangapacpish allimi cani” nicunguimi.

²⁰ “Mana imata yachaccunata yachachingapac, huahua shinacunata alli pushangapacca allimi cani” nicunguimi. “Chashnaca mandashcacunami cashcata huillashpa, tucui ima ruhuana cashcata yachachicun” nishpami yuyangui.

²¹ Shuccunata yachachishpaca, ¿ima nishpatac mana canllatac yachacunguiyari? “Mana shuhuanachu” nishpa yachachishpaca, ¿ima nishpatac shuhuanataca mana saquinguiyari?

²² “Mana huacllirinachu” nishpa yachachishpapish, ¿ima nishpatac huaclliringuiyari? “Ruhuashcalla dioscunata p'iñanimi” nishpaca, ¿ima nishpatac paicunata adorana huasimantaca imapish allicunata shuhuanguiyari?

²³ Mandashcacunata charishcamanta jatun tucushpaca, ¿ima nishpatac canca chai mandashcacunata mana cazushpa, Taita Diostaca yangapi churanguiyari?

²⁴ Chashnaca allillatacmi Dios quillcachishcapica: “Cancunamantami mana israelcunaca*f** Diosta mana alli nishpa rimancuna” nin.

²⁵ Moisés mandashcacunata maijanpish pactachicpica, circuncisionta*f** ruhuashcaca allimi. Shina cacpipish Moisés mandashcacunata mana pactachicpica, circuncisionta ruhuashcaca yangallami.

²⁶ Maijanpish mana circuncisionta ruhuashca cashpapish, mandashcacunata pactachishpaca circuncisionta ruhuashca shinallatacmi can.

²⁷ Maijanpish paipac aichapi mana circuncisionta ruhuashca cashpapish mandashcacunata pactachiccunaca, circuncisionta ruhuashca jahua, mandashcacunata yachashca jahua mana pactachiccunataca juchanchingami.

²⁸ Gentecunapac ricuillapi israelcuna cashpapish, mana tucui israeltacchu can. Aichallapi circuncisionta ruhuashcaca mana circuncisionta ruhuashca shinami can.

²⁹ Israeltac canaca mana gentecunapac ricuillapichu, ashtahuanpish ucu yuyaimantami israel cana. Shinallatac circuncisionta ruhuashcapish shungumantami cana. Chai yuyaica mana imata ruhuachun nishpa quillcashcamantachu, ashtahuanpish Diospac Espiritumantami shamun. Chashna caccunataca mana gentecunachu alli nin, ashtahuanpish Taita Diosmi alli nin.