ROMANOS 16 - Nuevo Testamento en Quichua Cañar 1996

Pablo paipac ricsishcacunata “allilla cashca cachun” nishcamanta

¹ Jesusmanta ñucanchic pani Febetami alli chasquichun nini. Paica Cencrea pueblopi tandanacushca criccunata ayudacmi.

² Shuccunatapish, ñucatapish ayudac cashcamantami, paiman ima illashcatapish cushpa, ñucanchic criccunapurapi chasquina cashca shinallatac Apunchic Jesuspac shutipi chasquichun nini.

³ Ñucahuan Apunchic Jesuspacta ruhuaccunataca Priscilatapish, Aquilatapish “allilla cashca cachun” nichic.

⁴ Paicunaca ñucata quishpichingaraicumi ashallamanta mana huañurcacuna. Chaimantaca mana ñucallachu pagui nini, ashtahuanpish caishuc cric mana israelcunapish*f** pagui nincunami.

⁵ Shinallatac Priscilapac, Aquilapac huasipi tandanacuc criccunatapish “allilla cashca cachun” nichic. Asia llactapi causac ñucahuan mai apanacuc Epenetotapish “allilla cashca cachun” nichic. Paimi chai llactapica Jesucristota punta cric carca.

⁶ Shinallatac cancunaman allita ruhuac Mariatapish “allilla cashca cachun” nichic.

⁷ Ñuca llactamanta cac Andronicotapish, Juniastapish “allilla cashca cachun” nichic. Paicunami ñucahuan carcelpi huichcashca carcacuna. Jesús acllashca huillaccunapuramantapish alli nishcacunami can. Paicunaca ñucapac ñaupa criccunami.

⁸ Jesusta cric cashcamanta ñucahuan mai apanacuc Ampliatotapish “allilla cashca cachun” nichic.

⁹ Shinallatac ñucahuan Jesucristopacta ruhuac Urbanotapish “allilla cashca cachun” nichic. Ñucahuan mai apanacuc Estaquistapish “allilla cashca cachun” nichic.

¹⁰ Shinallatac Cristota crishcamanta llaquita apac Apelestapish “allilla cashca cachun” nichic. Aristobulotapish paipac familiacunandic “allilla cashca cachun” nichic.

¹¹ Ñuca llactamanta cac Herodiontapish, Apunchic Jesusta cric Narcisotapish paipac familiacunandic “allilla cashca cachun” nichic.

¹² Apunchic Jesuspacta ruhuac Trifenatapish, Trifosatapish “allilla cashca cachun” nichic. Shinallatac ñucahuan mai apanacuc Persidepish cai tucuita Apunchic Jesuspacta ruhuac cashcamantaca, paitapish “allilla cashca cachun” nichic.

¹³ Shinallatac Apunchic Jesusta cric alli nishca Rufotapish paipac mamandic “allilla cashca cachun” nichic. Paipac mamaca ñucapac quiquin mama shinami cashca.

¹⁴ Asincritotapish, Flegontetapish, Hermestapish, Patrobastapish, Hermastapish shinallatac paicunahuan cac tucui criccunatapish “allilla cashca cachun” nichic.

¹⁵ Filologotapish, Juliatapish, Olimpastapish, Nereotapish paipac panindic, shinallatac paicunahuan cac tucui criccunatapish “allilla cashca cachun” nichic.

¹⁶ Chuya shunguhuan muchashpa, caishuc chaishuc “allilla cashca cachun” ninacuichic. Cristota cric tucui tandanacushca criccunapish “allilla cashca cachun” nishpami cachancuna.

¹⁷ C'uyashca criccuna, pandachishpa ch'icanyarinapi churaccunamantaca cancunallatac huacaichirichic, ninimi. Chaicunaca cancuna yachacushcacunata mana cazushpami, chashnaca ruhuancuna. Paicunamantaca ch'icanyarichic.

¹⁸ Chashna ruhuaccunaca paicunapac munaicunallata ruhuashpami, Apunchic Jesuspactaca mana ruhuancuna. Paicunaca mishquilla, shinallatac uyanalla rimaicunata rimashpami, manarac alli yachac gentecunataca pandachincuna.

¹⁹ Cancuna alli huillaita cazuccuna cashcataca tucuimi yachancuna. Chaimantami cushicuni. Shinallatac cancuna yachac cashcata ricuchingapacca, millaita mana ruhuashpa ashtahuanpish allita ruhuashpa ricuchichunmi munani.

²⁰ Chashnami sumac cushicui causaita cuc Taita Diosca Satanastaca*f** cancunapac chaqui sarunapi ñalla churanga. Ñucanchic Apunchic Jesusca cancunata mai c'uyashpa allicunata cushca cachun.

²¹ Ñucahuan Diospacta ruhuac Timoteopish “allilla cashca cachun” nishpami cachan. Ñuca llactamanta cac Luciopish, Jasonpish, Sosipaterpish “allilla cashca cachun” nishpami cachancuna.

²² Cai quillcapi Pablo imalla nishcata quillcac Terciopish, Apunchic Jesusta cric cashcamanta “allilla cashca cachun” nishpami cachani.

²³ Shinallatac ñucatapish, tandanacushca criccunatapish pozachic Gayopish “allilla cashca cachun” nishpami cachan. Cai pueblopac cullquita tandachic Erastopish, Jesusmanta huauqui Cuartopish “allilla cashca cachun” nishpami cachancuna.

Tucuchingapac Taita Diosman mañashcamanta

²⁵ ¡Alli huillaita ñuca huillashca shina, shinallatac Jesucristomanta yachachishca shina cancunata alli c'aticta ruhuac Taita Diostaca alli nishunchic! Pai chashna ruhuashpaca, cai pachata manarac ruhuashca punzhamanta pacha pacashca tiyacushcatami ricuchin.

²⁶ Huiñaita causacuc Taita Dios mandashca shinami, cunanca chai pacashcataca ñaupa huillaccuna quillcashca shina ricuchin. Cai pacashcataca tucui cai pachapi causaccuna crishpa cazuchunmi ricuchishca.

²⁷ ¡Tucuita yachac, shuclla Taita Diosca Jesucristomanta huiñai huiñaita sumacyachishca cachun! Chashna cachun.