ROMANOS 15 - Nuevo Testamento en Quichua Cañar 1996

Sinchi criccunaca manarac alli yachac criccunata ayudana cashcamanta

¹ Ñucanchic sinchi criccunaca manarac alli yachac criccuna ama pandarishpa, crishpa c'atichun ayudanami canchic. Ñucanchicpaclla alli cachunca, imatapish mana ruhuanachu canchic.

² Tucui ñucanchicmi shuctac criccuna crishpa c'atichun, paicunapac allipac allita ruhuana canchic.

³ Shinallatac Cristopish pailla alli canataca mana munarcachu, ashtahuanpish Dios quillcachishcapi nishca shinaca: “Rimaccuna canta c'amishpa rimashpaca, ñucataracmi rimancuna” nishcami pactarca.

⁴ Alli shungu canatapish, cushi canatapish yachachishpami, Dios quillcachishcacunaca japina cashcata shuyachun ñucanchicman yachachicun.

⁵ Alli shungu canatapish, cushi canatapish cuc Diosllatac, Jesucristo causashca shina cancuna shuc yuyailla causanata cushca canman.

⁶ Tucui mashna shuc yuyailla tucushpa, ñucanchic Apunchic Jesucristopac Taita Diosta alli nichunmi, chashnaca munani.

Quishpirinamanta alli huillaica mana israelcunamanpish cashcamanta

⁷ Ima shinami Cristo ñucanchicta Taita Dios alli nishca cachun chasquirca, chai shinallatac cancunapish caishuc chaishuchuan chasquinacuichic.

⁸ Ñaupa taitacunaman cusha nishcata pactachingapac, shinallatac Dios imatapish pactachic cashcata ricuchunmi, israelcunata*f** servingapac Cristoca shamurca.

⁹ Shinallatac mana israelcunatapish*f** Dios llaquic cashcamanta paita alli nichunmi shamurca. Dios quillcachishcapica: “Chaimanta mana israelcunapurapipish cantaca pagui nishami. Shinallatac cantocunahuanpish cantaca alli nishami” ninmi.

¹⁰ Shinallatac Dios quillcachishcapica: “Tucui llactacunapi causaccuna, ¡Dios acllashcacunahuan cushicuichic!” ninmi.

¹¹ Cutinllatac Dios quillcachishcapica: “Tucui llactacunapi causaccuna, shinallatac tucui aillucuna, ¡Taita Diosta alli nichic!” ninmi.

¹² Ñaupa huillac Isaías huillashpapish: “Isaipac huahua huahua sapipuramanta shucmi retoñac shina tucui llactacunapi causaccunata mandangapac jataringa. Chaimantami paipi shunguta churangacuna” ninmi.

¹³ Shuyana yuyaita cuc Taita Diosllatac, criccuna cashcamanta cancunamanca sumac causaitapish, cushi canatapish yallita cushca canman. Imatapish ruhuaclla paipac Espiritullahuantac japingapac shuyana yuyaita yallita charichunmi, chashnaca nini.

¹⁴ Ñuca c'uyashca criccuna, cancunaca yallita c'uyac shungu cashcata, tucuita alli yachac cashcata, shinallatac caishuc chaishucta cunac cashcatami yachani.

¹⁵ Shina cacpipish caita quillcashpaca, cancuna ama cungarichunmi maijan rimaicunataca sinchita rimashpa quillcani. Taita Dios paipac c'uyaimanta,

¹⁶ mana israelcunapac allipac Jesucristopacta ruhuachun ñucaman mingashcamantami cashna quillcani. Mana israelcuna Diosman cutirishpa, paipac Espíritu yuyaita cucpi, millaimanta anchurishpa Diospaclla cachunmi, quishpirinamanta alli huillaita huillashpa Diospacta ruhuacuni.

¹⁷ Jesucristota crishcamanta Diospacta ruhuacushpaca, cushicunatacmi cani.

¹⁸ Mana israelcuna Diosman cutirishpa paita cazuchun, Cristo ñucata huillachishcallatami huillasha nini. Rimashpapish, ruhuashpapish,

¹⁹ Diospac Espíritu imatapish ruhuachicpimi, pi mana ruhuaipaccunatapish, pi mana ricushcacunatapish ruhuarcani. Chashnami Jerusalén pueblomanta callarishpa, Iliria llactacaman maipipish Cristomanta alli huillaitaca huillarcani.

²⁰ Chashnami shuccuna Cristomanta ña huillashca llactacunapi mana huillashpa, ashtahuanpish Cristomanta pi mana huillashca llactacunallapi huillanata munarcani.

²¹ Chashna huillacpica, Dios quillcachishcapi nishca shinaca: “Jaicapi paimanta mana uyaccunami puntaca paita ricungacuna. Diosmanta jaicapi mana uyaccunami yachac chayangacuna” nishcami pactarca.

Roma puebloman Pablo risha nishcamanta

²² Tauca cutin risha nicushpapish, cai llactacunapi alli huillaita huillacushcamantami cancunataca mana ricungapac rinata pudircani.

²³ Chashna cashpapish, tucui cai llactacunapica ñami ñuca imata ruhuana cashcataca tucuchini. Chashna ña tucuchishpaca, tauca huatacunata ricungapac rina munaita charishcamantami,

²⁴ ñuca España llactaman rishpaca, ima shinapish cancunata ricuna yuyailla cani. Ña cancunahuan asha punzhacunata cushicushca q'uipaca, ñuca ricushcaman chayangapac ayudashpa abianacuchunmi munani.

²⁵ Shina cashpapish cunanca Jerusalén pueblopi causac criccunata ayudangapacmi rigrini.

²⁶ Acaya llactapi, shinallatac Macedonia llactapi causac criccunaca paicunapac munaimanta tandachishpa, Jerusalenpi causac huaccha criccunaman cuchun cachashcamantami, ñucaca chaiman rigrini.

²⁷ Chai shina paicunapac munaimanta ruhuashpaca, allitami ruhuashcacuna. Mana israelcunapish*f** cric israelcuna*f** shinallatac Dios cusha nishcata japishcamantaca, cric israelcunamanca imallatapish cushpa ayudanami can.

²⁸ Paicuna tandachishcata cushpa, ña tucui ñuca imata ruhuasha nishcata tucuchishpami, cancunata ricushpa España llactaman risha.

²⁹ Ñuca cancunapacman ricpi, Cristo yallita imatapish cuna cashcataca allitami yachani.

³⁰ C'uyashca criccuna, ñucanchic Apunchic Jesucristota crishcamanta, shinallatac Diospac Espíritu c'uyaita cushcamanta, ñucahuan tucushpa, tucui shunguhuan Taita Diosman ñucamanta mañachunmi munani.

³¹ Judea llactapi tiyac mana criccuna llaquichinamanta Taita Dios huacaichichun, shinallatac Jerusalenpi causac criccuna ñuca imallata apacushcata alli chasquichunpish, ñucamanta Taita Diosman mañaichic.

³² Cancuna chashna ruhuacpimi, Taita Dios munacpica, cancunapacman chayashpa cushilla samarisha.

³³ Sumac causaita cuc Taita Diosca tucui cancunahuan cachun. Chashna cachun.