ROMANOS 13 - Nuevo Testamento en Quichua Cañar 1996

Llactata mandaccunata cazuna cashcamanta

¹ Cunan punzha mandaccunaca Dios churashcami. Dios mana churashca mandacca mana tiyanchu. Chaimanta tucui mashna mandaccunataca cazunami canchic.

² Chashna cashcamanta maijanpish mandaccunata mana cazushpaca, Dios mandashcatami mana cazun. Chashna mana cazuccunataca llaquichishcami cana can.

³ Mandaccunaca allita ruhuaccunata mana manchachingapacchu, ashtahuanpish mana allita ruhuaccunata manchachingapacmi can. Mandaccunata mana manchashpa causasha nishpaca, allita ruhuashpa causai. Shina causacpimi, mandaccunaca allimi ninga.

⁴ Mandaccunaca Dios churashca cashpami, cambac allipac can. Mana yangamantachu, ashtahuanpish mana allita ruhuaccunata llaquichingapacmi paicunaca can. Paicunaca Diospacta ruhuac cashpami, maijanpish llaquichina cacpica, llaquichina cashca shinallatac llaquichic can. Chaimanta mana allita ruhuashpaca manchanami cangui.

⁵ Chashna cashcamanta mandaccunataca mana llaquichic cashcallamantachu cazuna can, ashtahuanpish quiquinpac yuyaipi alli cashcamantami cazuna can.

⁶ Mandaccunaca Diospacta ruhuac cashpami, chaillata ruhuashpa causancuna. Chaimanta impuestota cunami canguichic.

⁷ Maijanman imata cuna cacpica, cunami canguichic. Imata tandachishpa cuna cacpica, cunami canguichic. Impuestota japicmanpish cunami canguichic. Maijanta cazuna cacpipish, cazunami canguichic. Shinallatac maijanta alli nina cacpica, alli ninami canguichic.

⁸ Maijanman imata mañashpapish, ama charicuichicllachu, ashtahuanpish caishuc chaishuchuan c'uyanacunallata yuyaichic. Maijanpish shuccunata c'uyacca Taita Dios mandashcatami pactachin.

⁹ Dios mandashcacunapica: “Ama huaclliringui, ama huañuchingui, ama shuhuangui, shucpac charishcata ama munangui” ninmi. Tucui cai mandashcacunapish, caishuc mandashcacunapish: “Can quiquinllatac ima shinami c'uyaringui, shinallatac shuccunatapish c'uyangui” nishca shinallatacmi can.

¹⁰ Maijanpish c'uyacca shuccunataca mana llaquichinchu. Chaimanta maijanpish c'uyaita charicca Dios mandashcacunataca tucuitami pactachin.

¹¹ Tucui caicunataca cunan punzhapi tucui ima tucushcata ricushpa yuyarinami canguichic. Ñucanchic crishca punzhamanta ricucpica, Dios quishpichina punzhaca ñami shamucun. Chaimanta ama suiñucuichicllachu, ashtahuanpish riccharishca shina caichic.

¹² Tutapish ñami pacarimugrin. Chaimanta amsapi ima mana allicunata ruhuanata saquishpa, soldado macanacungapac churarinata churaric shina allita ruhuangapacca, Dios cushcacunata japishpa churarichic.

¹³ Shina cashcamanta punzhapi puricuc shina, allita ruhuashpa causashunchic. Jatun micuitapish, ubianatapish ama ruhuashunchic, ama huacllirishunchic, ama p'iñanacuipi churashunchic, shuccuna ama charichun nishpa ama munashunchic, shinallatac ima mana allicunatapish ama ruhuashunchic.

¹⁴ Chaipac randica Apunchic Jesusta churanataca churaric shina, paihuan tucushpa millaita mishaichic. Ashtahuanpish ama cai pacha jucha munashcata ruhuaichicchu.