ROMANOS 12 - Nuevo Testamento en Quichua Cañar 1996

Taita Diospaclla causanamanta

¹ Chaimanta ñuca c'uyashca criccuna, Taita Dios llaquishcamanta cancunapac cuerpota Taita Diosman cushpa, rupachishca shina paipaclla tucushpa, pai munashca shina causachunmi mañani. Chashna ruhuashpami, Taita Diosta tucui shunguhuan alli ninguichic.

² Cai pachapaclla causaccuna shina ama causaichicchu. Chaipac randica Diospac Espíritu mushuc yuyaita cushpa, cancunapac causaita mushucyachichun saquichic. Chashna causashpami imapish allita cashcata, Diosman alli ricuric cashcata, shinallatac chashnatac cashcata yachac chayanguichic. Tucui chaicunaca Diospac munaimantami.

³ Taita Dios ñucata c'uyashpa acllashcamantami, cancunataca ama quiquinllatac yachac tucuchun nini. Chaipac randica cricpi Taita Dios cushcallata yuyashpa, ama chaimanta yallita yuyachun ninimi.

⁴ Shuc cuerpopi imalla tiyaccunaca taucami tiyan. Shina cashpapish mana tucuichu chaillatatac ruhuan.

⁵ Chai shinallatac ñucanchicca taucacuna cashpapish, Cristohuan shuc shinalla tucushcamantaca caishuc chaishuc shuc cuerpo shinallami canchic.

⁶ Taita Diosca pai munashca shinami, tucui ñucanchicman ch'ican ch'ican imata ruhuac cachun cushca. Paimanta huillana yuyaita cushca cacpica, ima shina crishca shinallatacmi huillana can.

⁷ Shuccunata servic canata cushca cacpica, alli servicmi cana can. Yachachic canata cushca cacpica, alli yachachicmi cana can.

⁸ Shuccunata cunac canata cushca cacpica, alli cunacmi cana can. Shuccunaman imatapish cuc canata cushca cacpica, tucui shunguhuan cucmi cana can. Mandac canata cushca cacpica, alli mandacmi cana can. Imapipish ayudac canata cushca cacpica, cushicushpami ayudana can.

Ima shina Diospacta ruhuanamanta

⁹ Mana nic tucushpalla caishuc chaishuchuan c'uyanacuichic. Imapish mana alli ruhuanacunata saquishpa, allita ruhuana yuyailla caichic.

¹⁰ Crishcamanta huauquindicpura cashcamantami, caishuc chaishuchuan c'uyanacuna canguichic. Shuccunaca quiquinta yalli cashcata yuyashpa, allimi nishpa yuyanami canguichic.

¹¹ Apunchic Jesuspacta ruhuacushpaca, ama q'uillacushpa tucui shunguhuan ruhuaichic.

¹² Crishcamanta japina cashcata shuyacushcamantaca, cushicushpa causaichic. Ima llaqui japicpipish, chai llaquita apaichiclla. Taita Diosman mañanataca ama saquichicchu.

¹³ Criccunapurapi ima illacpica, quiquinpac ima illashcata shina yuyashpa cunguichic. Maijanpish cancunapac huasiman shamucpica, alli chasquinguichiclla.

¹⁴ Cancunata p'iñaccunataca paicunaman Taita Dios allicunata cuchun nishpa mañaichic. Paicuna ima llaqui tucuchun ninapac randica, Taita Dios paicunaman allicunata cuchun nishpa mañaichic.

¹⁵ Cushilla caccunahuanca cushicuichic. Llaquilla caccunahuanca llaquilla caichic.

¹⁶ Caishuc chaishuchuan alli apanacushpa causaichic. Ima cashpapish ama jatun tucuichicchu, ashtahuanpish chai mana jatun tucuccunahuan tandanacuichic. Cancunapac quiquin yuyaillapi ama “yachacmi cani” nichicchu.

¹⁷ Maijan cancunata mana allita ruhuacpica, ama cancunapish chai shinallatac ruhuaichicchu. Chaipac randica tucuipac ñaupapi allita ruhuanata yuyaichic.

¹⁸ Cancuna pudishcacamanca tucuihuan alli apanacushpa causanata yuyaichic.

¹⁹ Ñuca c'uyashca criccuna, cancunata maijan llaquichicpica, ama cancunallatac llaquichinata yuyaichicchu, ashtahuanpish Diosllatac llaquichichun saquichiclla. Dios quillcachishcapica: “Llaquichina cacpica, ñucami llaquichisha. Paicuna japina cashca shinallatacmi taripashpa cusha” ninmi.

²⁰ Shinallatac Dios quillcachishcapica: “Canta p'iñac yarcaihuan cacpica, caranguilla. Yacunaihuan cacpica, ubiachinguilla. Chashna ruhuashpami, pingaichishpa ñahuita pucayachingui” ninmi.

²¹ Millai mishachunca ama saquichu. Chaipac randica allita ruhuashpa millaita mishai.