ROMANOS 10 - Nuevo Testamento en Quichua Cañar 1996

¹ C'uyashca criccuna, tucui shunguhuanmi israelcuna quishpirichun munani. Chaimantami Taita Diosmanca mañacuni.

² Paicunaca Taita Diospacta pactachina munaita yallita charishcataca yachanimi. Shina cashpapish ima shina pactachinataca mana yachancunachu.

³ Paihuan alli tucuchun Taita Dios ima shina chasquicushcata mana entendishpami, paicunapac quiquin ruhuashcahuan alli ricurishun, Diosllatac paicunahuan alli tucuna cashcata mana chasquincuna.

⁴ Maijanpish crishpalla Taita Dioshuan alli tucuchunca, Cristollami mandashcacunata pactachishpa, Taita Dioshuan alli tucuna cashcata pactachirca.

⁵ Mandashcacunata pactachishpalla Taita Dioshuan alli tucunamanta Moisés quillcashpaca: “Maijanpish mandashcacunata pactachicca, pai pactachishcamantaca causangami” ninmi.

⁶ Crishcallamanta Taita Dioshuan alli tucunamanta Moisés quillcashpaca: “ ‘Jahua pachamanca, ¿pitac huichicungayari?’ nishpa, cambac shungupica ama yuyaichu” ninmi. Chashna nishpaca, jahua pachaman rishpa Cristota uricuchic shinami nicungui.

⁷ Shinallatac Moisesca: “ ‘¿Pitac ucu pachamanca yaicungayari?’ nishpaca, ama nichu” ninmi. Chashna nishpaca, Cristota huichaiman llucshimuchun nic shinami nicungui.

⁸ Shina cacpica, ¿Diospac rimashca shimica imatatac nicunyari? “Dios rimashcaca cambac cuchupimi, cambac shimipimi, cambac shungupimi can” ninmi. Dios rimashca cai alli huillaitami crichun nishpa huillacunchic:

^9-10 Taita Dioshuan alli tucungapacca, tucui shunguhuanmi crina can. Shinallatac quishpiringapacca, quiquin shimihuanmi Jesusta crishcata huillana can. Chaimanta: “Jesusca ñucata Mandacmi” nishpa cambac shimihuan huillashpa, shinallatac huañushcacunapuramanta Taita Dios Jesusta causachishcata tucui shunguhuan crishpaca, quishpiringuimi.

¹¹ Dios quillcachishcapica: “Maijanpish paipi shunguta churacca mana pingaichishcachu canga” ninmi.

¹² Israelcunapish, mana israelcunapish chai shinallatac cacpimi, Apunchic Jesusca tucuipac Mandac can. Shina cashcamantami maijanpish mañaccunamanca imatapish yallita cun.

¹³ Dios quillcachishcapica: “Maijanpish Mandac Diosman mañacca quishpiringami” ninmi.

¹⁴ ¿Ima shinatac Jesusta manarac cric cashpaca, paitaca mañangacunayari? Paimanta pipish mana huillacpica, ¿ima shinatac cringacunayari? Shinallatac pi mana huillacpica, ¿ima shinatac uyangacunayari?

¹⁵ Shinallatac quishpirinamanta huillachun pipish mana cachacpica, ¿ima shinatac huillangacunayari? Dios quillcachishcapica: “Alli huillaita huillangapac chayaccunaca, ¡mai sumacmi can!” ninmi.

¹⁶ Shina cacpipish mana tucuichu quishpirinamanta alli huillaitaca cazurcacuna. Chaimantami Isaiasca: “Mandac Dioslla, ¿ñucanchic huillashcataca pitac crishcayari?” nin.

¹⁷ Shinashpaca huillashcata uyashcamantami crincuna. Chai uyashcaca Cristomanta huillashcami.

¹⁸ Shina cacpipish: “Cristomanta huillashcataca, ¿manachu uyarcacuna?” nishpami tapuni. ¡Paicunaca uyarcacunami! Dios quillcachishcapica: “Paicuna huillashcaca tucui cai pachapimi uyarishca. Shinallatac paicuna rimashcacunaca allpa tucuricamanmi uyarishca” ninmi.

¹⁹ Shinallatac: “Israelcunaca caicunataca, ¿manachu entendircacuna?” nishpami cutin tapuni. ¡Ari, entendircacunami! Chaimantami Diosmanta Moisés punta huillashpaca: “Mana ñucapaclla caccunata acllashpami, cancunataca ‘cambacllami canchic’ nichisha. Imatapish mana yachaccunata acllashpami, cancunataca p'iñachisha” ninmi.

²⁰ Diosmanta Isaías mana manchashpa q'uipaman huillashpaca: “Mana mashcac gentecunami ñucataca tarirca. Ñucata mana tapuc gentecunamanmi ñucaca ricurircani” ninmi.

²¹ Diosmanta israelcunaman Isaías cutin rimashpaca: “Ñucata mana cazuc, p'iñac gentecunataca tucui punzhacunami c'ayacurcanilla” ninmi.