SAN MATEO 8 - Nuevo Testamento en Quichua Cañar 1996

Lepra ung:uihuan cac runata Jesús alliyachishcamanta

¹ Jesús ña yachachishpa urcumanta cuticpica, achca gentecunami paita c'atimurcacuna.

² Chashna shamucpica, lepra*f** ung:uihuan cac runa Jesuspacman shamushpami, paipac ñaupapi cungurishpaca: —Apunchic Jesús, ñucata can alliyachisha nishpaca, alliyachinguimanllami— nishpa, mailla mañarca.

³ Shina nicpi Jesusca: —Ari, alliyachisha ninimi. Alliyai— nishpa maquihuan tuparicpica, chai lepra ung:uihuan cac runaca alliyarcallami.

⁴ Chashna alliyachishpaca, Jesusca: —Riqui, pi canta alliyachishcataca, pacta piman huillanguiman. Cunanca ri, Israel*f** curaman ricuchigri. Can alliyashcata paicuna ricuchunca, Diosman cuna cashcata Moisés mandashca shinallatac cugringui— nirca.

Soldadocunata mandacpac servicta Jesús alliyachishcamanta

⁵ Ña Capernaum puebloman Jesús chayagricucpimi, Roma* llactamanta pasac soldadocunata mandacca Jesuspacman cuchuyashpaca:

⁶ —Apunchic Jesús, ñuca huasipimi ñucata servic runaca mana cuyuricta ruhuac ung:uihuan c'uyaillata llaquita apacun— nirca.

⁷ Shina nicpi Jesusca: —Shinashpaca, cambac huasiman rishpa alliyachigrisha— nirca.

⁸ Shina nicpi soldadocunata mandacca: —Apunchic Jesús, ¿ñuca ima alli cacpitac, ñuca huasimanca risha ninguiyari? Can caimanta alliyachun nillari. Chashna nicpica, ñuca servicca alliyangallami.

⁹ Ñucapish mandaccunapac mandashca, soldadocunata mandacllami cani. Maijan soldadota ñuca ‘ri’ nicpica, rinllami. Cutin maijanta ‘shamui’ nicpipish, shamunllami. Shinallatac ñuca servictapish ‘imata ruhuai’ nicpica, ruhuanllami— nirca.

¹⁰ Chashna nicta Jesús uyashpaca, mana amirishpami paita c'aticcunamanca: —Cashna ñuca alliyachina cashcata cric runataca, israelcunapurapipish*f** mana tarishcanichu. Chaica chashnatacmi.

¹¹ Cancunaman huillanimi: Achcacunami inti llucshicmanta, inti yaicucmanta tucui tandarishpa, ñaupa taita Abrahamhuan, Isaachuan, shinallatac Jacobohuan jahua pacha Taita Dios mandacucpi micungapac tiyaringacuna.

¹² Ashtahuanpish Taita Dios mandacucpi causangapac caccunaca, canzhapi shitashcami, purapi huacaihuan quiru caniringacuna— nirca.

¹³ Chashna nishca q'uipami, soldadocunata mandacta Jesusca: —Cunanca huasiman rilla. Can crishca shinallatac alliyangallami— nirca. Chai nishca pachallatacmi, chai servicca alli tucurca.

Pedropac suedrata Jesús alliyachishcamanta

¹⁴ Jesusca Pedropac huasiman rishpami, Pedropac suedra fiebre ung:uihuan camapi cacta ricurca.

¹⁵ Shina ungushcata ricushpami, Jesusca paipac maquipi tuparirca. Chashna tuparicpi chai fiebre ung:ui anchuricpica, jatarishpa paicunaman micunata carai callarircallami.

Achca ungushcacunata Jesús alliyachishcamanta

¹⁶ Ña tutayamucpica, supai japishcacunatami Jesuspacman apamurcacuna. Chashna apamucpi, Jesusca pai rimashcallahuan supaicunata llucchishpa cachashpami, tucui ungushcacunatapish alliyachirca.

¹⁷ Caicunaca, Diosmanta ñaupa huillac Isaías huillashca pactachunmi, chashnaca tucurca. Pai huillashpaca: “Pai quiquinmi ñucanchic ung:uicunatapish, ñucanchicta irquiyachic nanaicunatapish aparca” nishcami.

Jesusta c'atisha niccunamanta

¹⁸ Jesusca cai tucui gentecuna muyushpa shayaricta ricushpami, paipac yachacuccunataca: —Yacu cuchata chimbashun— nirca.

¹⁹ Jesús chashna nicpimi, mandashcacunata yachachic shuc runa cuchuyashpaca: —Yachachic. Can maita ricpipish, c'atisha ninimi— nirca.

²⁰ Chashna nicpi Jesusca: —Atuccunapish, maipi suiñuna jutcuta charinmi. Zhutacunapish, maipi suiñuna c'uzhata charinmi. Ashtahuanpish Runa Tucungapac shamushca*f** ñucaca, maipi umata samachinallatapish mana charinichu— nirca.

²¹ Jesuspac yachacuccunapuramanta shucca: —Apunchic Jesús, shuyai, ñuca taitatarac enterramugrisha— nirca.

²² Chashna nicpi Jesusca: —Saqui, huañushca shina causaccuna huañushcacunata enterrachun. Canca ñucata c'atilla— nirca.

Huairahuan yacu cucha cuyucucta Jesús parachishcamanta

²³ Jesusca paipac yachacuccunandic canoapi tiyarishpami, yacu cuchata chimbacurca.

²⁴ Chashna ña chaupi yacuta ricucpimi, ima mundo huaira jatarishpa, yacuta cuyuchicpi canoaca ucuyagrirca. Chashna tucucucpipish, Jesusca suiñucurcami.

²⁵ Chashna canoa ña ucuyagricucpi, paipac yachacuccuna Jesusta ricchachingapac rishpaca: —Apunchic Jesús, ¡ña ucuyagrinchicca! ¡Ñucanchicta quishpichiyari!— nircacuna.

²⁶ Chashna nicpi Jesús riccharishpaca: —¿Ima nishpatac yallita mancharicunguichic? Cancunaca mana tucui shunguhuan cric cashpami, chashnaca mancharicunguichic— nircami. Shina nishpa jatarishpaca, yacutapish cuchatapish “¡casilla cai!” nishpami sinchita rimarca. Shina rimacpica, huairapish cuchapish casilla tucurcallami.

²⁷ Chashna parachicpimi, paicunapura mancharinacushpa: “Cai runaca, ¿ima cacpitac huairapish, yacupish pai nishcataca cazunyari?” ninacurcacuna.

Gadara llactapi supai japishca ishcai runata Jesús alliyachishcamanta

²⁸ Jesús ña yacuta chimbashpaca, Gadara llactamanmi chayarca. Chaipimi supai japishca ishcai runacuna panteonmanta llucshishpa, Jesuspacman shamurca. Paicunaca ima mundo millaicunami carca. Chaimantami chai panteón cuchulla ñantaca, pi mana pasai pudircacuna.

²⁹ Ña Jesuspacman chayashpaca: —Diospac Churi Jesús, ¿imatatac nic shamungui? ¿Canca manarac llaquichina punzha chayamucpichu llaquichic shamungui?— nishpa caparircacuna.

³⁰ Paicunapacmanta chimbanicllapica, achca cuchicunami micushpa puricurcacuna.

³¹ Chai runacunapi cac supaicunaca: —Ñucanchicta runacunamanta llucchishpaca, chai cuchicunapi yaicuchun saqui— nishpami, Jesusmanca mañarcacuna.

³² Chashna nicpi Jesusca: —Richiclla— nirca. Shina nicpimi, supaicunaca runacunamanta llucshishpa, chai cuchicunapi yaicungapac rircacuna. Chashna yaicucpica, cuchicunaca jahua quinraimanta huaicuman singushpami, yacupi aguarishpa tucui huañurcacuna.

³³ Chashna tucucta ricushpami, cuchicunata michiccunaca mancharishpa, tucui chai imalla tucushcatapish, supai japishcacuna ima tucushcatapish puebloman rishpa huillarcacuna.

³⁴ Chashna huillacta uyashpaca, tucui chai pueblopi causac gentecunami Jesuspacman shamurcacuna. Chashna shamushpaca: “Cai llactamantaca rilla” nishpami mañarcacuna.