SAN MATEO 28 - Nuevo Testamento en Quichua Cañar 1996

Jesús causarishcamanta

¹ Samana punzha*f** cayandic domingo tutamanta manarac alli achicyacpimi, Magdala pueblomanta María caishuc Mariandic, Jesusta enterrashcata ricugrircacuna.

² Paicuna ña chayacucpimi, cungailla allpa ima mundota chucchurca. Chaica Taita Dios cachashca angelmi jahua pachamanta shamushpa, Jesusta enterrashcata huichcashca rumita anchuchishpa, chai rumi jahuallapitac tiyarirca.

³ Chai angelca relampa shina achic nicuc, shinallatac paipac churanapish rasu shina yuranllami carca.

⁴ Chaita ricushpami, soldadocunaca manchaihuan chucchushpa, huañushca shina saquirircacuna.

⁵ Chai huarmicunataca angelca: —Ama mancharichicchu. Cruzpi chacatashpa huañuchishca Jesusta mashcacushcataca yachanimi.

⁶ Paica mana caipichu. Pai nishca shinallatac, ña causarircami. Shamuichic, paita maipi churashcapi ricunguichic.

⁷ Cunanca utcashpa, paipac yachacuccunamanca: ‘Paica ñami huañushcacunapuramanta causarishca. Cunanca ñami Galilea llactaman cancunapac ñaupata rin. Chaipimi paita ricunguichic’ nishpa huillagrichic. Chaitami ñucaca cancunaman huillana carcani— nirca.

⁸ Chaita uyashpaca, huarmicunaca manchaihuan cashpapish cushicushpami, utcashpa yachacuccunaman huillangapac rircacuna.

⁹ Chashna ricucpimi, Jesusca paicunaman ricurishpa cungailla alabadurca. Chashna ricuricpica, huarmicunaca cushicushpami, Jesuspacman cuchuyashpa chaquipi ucllarishpa, “canca allimari cangui” nircacuna.

¹⁰ Chashna ruhuacpica Jesusca: —Ama mancharichicchu. Cunanca richic, ñucata c'atic huauquicunaman huillagrichic: ‘Galilea llactaman rishpa, chaipimi ñucataca ricunguichic’ ninmi, nigrichic— nirca.

Ima tucushcata soldadocuna huillashcamanta

¹¹ Huarmicuna huillangapac ringacamanca, Jesusta enterrashca jutcuta cuidac soldadocunapuramanta maijancuna Jerusalén puebloman rishpa, curacunata mandac curacunaman tucui imalla tucushcatami huillarcacuna.

¹² Chashna huillacpimi, curacunata mandac curacunaca, cunac yuyaccunahuan tandanacushpa parlanacurcacuna. Chaimantami soldadocunamanca achca cullquita cushpa,

¹³ cashna nishpa yuyaita curcacuna: —‘Ñucanchic suiñucucpimi, tuta paipac yachacuccuna shamushpa, cuerpotaca shuhuashcacuna’ ninguichic.

¹⁴ Chaita mandac Pilato yachashpa, cancunata llaquichisha nicpica, ñucanchicmi ima shinapish paihuan parlashpa, cancunata llaquichichunca mana saquishun— nircacuna.

¹⁵ Chashna soldadocuna cullquita japishpaca, paicuna nishca shinallatacmi nircacuna. Chashna nishcataca, cunan punzhacamanmi israelcunaca*f** parlanacuncuna.

Tucuiman huillachun Jesús mingashcamanta

¹⁶ Chunga shuc yachacuccuna rishpaca, Jesús maiman tupachun nishca shinallatacmi, Galilea llactapi tiyac urcuman tuparcacuna.

¹⁷ Jesusta chaipi ricushpaca, cungurishpami: “Canca allimari cangui” nircacuna. Shina cashpapish maijancunaca: “Mana paichu canga” nishpami yuyacurcacuna.

¹⁸ Jesús paicunapacman cuchuyashpaca: —Taita Diosca ñucataca, cai pachapi jahua pachapi tucui imatapish Mandactami ruhuarca.

¹⁹ Chaimanta tucui cai pachapi causaccunapacman rishpa, ñuca yachacuccuna tucuchun yachachigrichic. Paicunataca Taita Diospac, paipac Churipac, Diospac Espiritupac shutipi bautizanguichic.

²⁰ Ñuca cancunaman mandashpa yachachishca shinallatac, paicunapish cazuchun yachachinguichic. Ñucaca cai pacha tucuringacamanmi, cancunahuanca casha— nirca.