SAN MATEO 27 - Nuevo Testamento en Quichua Cañar 1996

Pilatopac ñaupaman Jesusta apashcamanta

¹ Tutamanta ña pacarimucucpimi, curacunata mandac tucui curacunapish, israelcunata*f** cunac yuyaccunapish Jesusta ima shina huañuchinata yuyarinacurcacuna.

² Shina yuyaita japishpami, Jesusta huatashpa chai llactata mandachun Roma*f** llacta churashca mandac Pilatopacman aparcacuna.

Judas Iscariote huañushcamanta

³ Jesusta ña huañuchigricucta yachashpami, pacalla japichic Judasca munai llaquirishpa, c'atushca quimsa chunga cullquitaca curacunata mandac curacunaman, shinallatac cunac yuyaccunaman cutichirca.

⁴ Shina cutichishpaca: —Manapish juchayuc runata huañuchichun japichishpaca, juchallishcanimi— nirca. Chashna nicpi paicunaca: —Chaica ñucanchicmanca, ¿imatac curinyari? Chaitaca canchari ricungui— nircacuna.

⁵ Shina nicpimi, Judasca Diosman mañana huasi ucupi cullquita shitashpa, sipiringapac rirca.

⁶ Curacunata mandac curacuna chai cullquita tandashpaca: “Cai cullquica, shuc runata huañuchingapac randishca cullquimi. Diosman cushca cullquita tandanapica, mana churanachu canchic” nircacuna.

⁷ Shina yuyarinacushpaca, caru llactamanta shamuccuna huañucpi enterrangapac, mangata ruhuacpac allpata randishun nishpami yuyarinacurcacuna.

⁸ Chaimantami chai randishca allpataca, cunancaman Yahuar Allpa nishpa c'ayancuna.

⁹ Chashnami Diosmanta ñaupa huillac Jeremías huillashcaca pactarca. Chai huillashcapica: “Quimsa chunga cullquitami japircacuna. Chai cullquitami paimantaca, israelcunaca cushun nishpa yuyarinacushca carca.

¹⁰ Ima shinami Taita Dios ñucaman nishca shinallatacmi, chaihuanca mangata ruhuacpac allpata randircacuna” nishcami.

Pilatopac ñaupapi Jesusta juchanchishcamanta

¹¹ Mandac Pilatopac ñaupapi Jesús shayacucpimi Pilatoca: —¿Canchu israelcunata*f** Jatun Mandac cangui?— nishpa tapurca. Shina nicpi Jesusca: —Ari, canllatac ña nishcanguimi— nirca.

¹² Curacunata mandac curacuna shinallatac cunac yuyaccuna juchanchicucpipish, Jesusca imata mana nircachu.

¹³ Chaimantami Pilatoca: —Canta cai tucuita juchanchicuctaca, ¿manachu uyangui?— nishpa tapurca.

¹⁴ Shina nicpipish, Jesusca imata mana nircachu. Chaimantami Pilatoca munai mana amirirca.

Jesusta “huañunami cangui” nishcamanta

¹⁵ Pascua*f** punzha chayacpi gentecuna munashca shuc prezuta cacharichun nishpa mañacpica, mandac Pilatoca cacharicllami carca.

¹⁶ Chai punzhacunapica, tucui gentecuna mana alli nishca Barrabás runami prezu tiyacurca.

¹⁷ Gentecuna tandanacumucpimi Pilatoca: —Cai ishcaimantaca, ¿maijantatac cacharichun ninguichic? ¿Barrabasta? Mana cashpaca, ¿Quishpichic Cristo nishca Jesusta?— nishpa tapurca.

¹⁸ Jesustaca allita ruhuac cashcamanta p'iñashpa apamushcatami, Pilatoca ña yacharca.

¹⁹ Pilato pai mandanapi tiyacucpimi, paipac huarmica: —Chai allita ruhuac runamantaca, shuc mancharinatami cunan tutaca muscurcani. Paitaca ama imata ruhuanguichu— nishpa, huillachun cacharca.

²⁰ Curacunata mandac curacunapish, cunac yuyaccunapish tucui gentecunamanmi: “Barrabastaca cacharichun, Jesustaca chacatachun ninguichic” nishpa, cunashca carca.

²¹ Chaimanta Pilato cutin paicunaman tapushpaca: —Cai ishcai runacunamantaca, ¿maijantatac cacharichun ninguichic?— nicpi paicunaca: —Barrabastami cacharichun ninchic— nircacuna.

²² Chaita uyashpa Pilatoca: —Shinashpaca, Quishpichic Cristo nishca Jesustaca, ¿imatatac ruhuachun ninguichic?— nicpi paicunaca: —¡Paitaca chacatailla!— nishpami, huaicashpa caparircacuna.

²³ Shina nicpi Pilatoca: —¿Ima mana allitatac ruhuashcayari?— nishpa tapurca. Shina nicpipish, paicunaca ashtahuanmi: —¡Chacatailla!— nishpa caparircacuna.

²⁴ Tucui gentecuna mana uyashun nishpa, ashtahuan caparinacui callaricpimi, Pilatoca yacuta apac cachashpa, maquita jahuashpa: —Cai runa huañushcaca cancuna jahuami canga, ashtahuanpish mana ñuca jahuaca— nirca.

²⁵ Shina nicpi paicunaca: —Ari, pai huañushcaca ñucanchic jahua, ñucanchic huahuacunapac jahuami canga— nircacuna.

²⁶ Chashna nicpimi, Pilatoca Barrabasta cacharishpa, Jesustaca azutichishpa cruzpi chacatachun Roma*f** llactamanta soldadocunaman curca.

²⁷ Shina cucpimi, soldadocunaca Pilato mandashpa tiyana jatun ucuman Jesusta aparcacuna. Chaimanmi caishuc soldadocunataca, Jesuspac muyundicpi shayarichun c'ayarcacuna.

²⁸ Chaipimi soldadocunaca Jesuspac churanata surcuchishpa, amsa puca churanata p'achallichirca.

²⁹ Shinallatac casha angumanta ahuashca coronata umapi churachishpa, shuc tauna caspita alli maquiman charichishpami, nic tucushpalla paipac ñaupapi cungurishpa: —Israelcunata*f** Jatun Mandac, canca allimari cangui— nircacuna.

³⁰ Chaimantaca t'ucashpami, paipac tauna caspillahuantac umapi huactarcacuna.

³¹ Chai shina burlashpa asishca q'uipaca, amsa puca churanata surcuchishpami, paipac churanallatatac churachishpa, cruzpi chacatangapac aparcacuna.

Jesusta cruzpi chacatashcamanta

³² Ña cruzpi chacatangapac ricushpaca, Cirene pueblomanta cac Simón runahuanmi tuparcacuna. Paimanmi Jesusta chacatana cruzta apachishpa rircacuna.

³³ Chaimantaca Gólgota nishca urcumanmi chayarcacuna. Gólgota nishcaca, Uma Tullu nisha ninmi.

³⁴ Chaipimi jayac-huan chapushca vinota ubiachishun nishpa curcacuna. Chashna ruhuacpi, Jesusca ashata mallishpa mana ubiasha nircachu.

³⁵ Ña Jesusta cruzpi chacatashca q'uipaca, paipac churanacunata japingapacmi suerteta ruhuarcacuna.

³⁶ Chai q'uipaca, soldadocunami cuidangapac chaillapitac tiyarircacuna.

³⁷ Jesusta chacatashca cruz jahuapica, imamanta huañuchishcata quillcashcatami churarcacuna. Chai quillcashcapica: “Caimi israelcunata Jatun Mandac Jesús” nishcami carca.

³⁸ Shinallatac Jesushuan pactami ishcai shuhua runacunatapish, shuctacca alli maquiman, shuctacca lluqui maquiman chacatarcacuna.

³⁹ Chaita ric gentecunaca umata cuyuchishpami:

⁴⁰ —Canca: ‘Diosman mañana huasita urmachishpapish, quimsa punzhapica cutin shayachishallami’ nircanguica. Can Diospac Churi cashpaca, ¡chacatashcamanta uricushpa, canllatac quishpiriyari!— nishpami c'amircacuna.

⁴¹ Shinallatac curacunata mandac curacunapish, mandashcacunata yachachiccunapish, cunac yuyaccunapish chashnallatacmi burlashpa:

⁴² —Shuccunataca quishpichircami. Cunan paillatacca mana quishpiri pudinchu. Israelcunata Jatun Mandac cashpaca, chacatashcamanta uricui, chashna uricucta ricushpaca ñucanchicpish crinchicmanmi.

⁴³ Paica: ‘Diospac Churimi cani’ nishpami, Dios yuyailla puricurca. Shina cacpica, Dios c'uyashpaca quishpichinmanmi— nircacuna.

⁴⁴ Jesushuan chacatashca cac shuhua runacunacamanmi paitaca c'amircacuna.

Jesús huañushcamanta

⁴⁵ Chaupi punzhamanta quimsa horas chishi tucungacamanmi, tucui cai pachaca amsayarca.

⁴⁶ Chai horasllatacmi Jesusca: —Elí, Elí, ¿lama sabactani?— nishpa, sinchita caparirca. Cai nishcaca: “Ñuca Dios, ñuca Dios, ¿ima nishpatac ñucallata saquinguiyari?” nisha ninmi.

⁴⁷ Chashna caparicta maijan chaipi caccuna uyashpaca: —Paica ñaupa huillac Eliastami c'ayacun— nircacuna.

⁴⁸ Jesús chashna caparicta uyashcahuanmi shuc runaca, esponjata apamungapac callparca. Chaitaca jayac vinopi satishpami, caspi puntapi churashpa, Jesús ubiachun shimiman chayachirca.

⁴⁹ Ashtahuanpish shuccunaca: —Saqui, Eliasca quishpichingapac shamunchu imami, ricungapac— nircacuna.

⁵⁰ Jesusca cutinllatac sinchita caparishpa, paipac espirituta Diosman mingashpaca huañurcallami.

⁵¹ Chai pachami Diosman mañana huasi ucupi jarcachishca liensoca, jahuamanta uraiman chaupita lliquirirca. Shinallatac allpa chucchucpi, jatun rumicunapish chictarircami.

⁵² Shinallatac huañushcacuna enterrashca jutcucunapish pascarircami. Chashna pascaricpica, Diospaclla caccunaca achcacunami causarircacuna.

⁵³ Jesús causarishca q'uipaca chaicunaca Diospaclla cac Jerusalén pueblomanmi shamurcacuna. Chaipimi achca gentecuna ricurcacuna.

⁵⁴ Pasac soldadocunata mandacpish, paihuan cuidaccunapish allpa chucchucpi, shinallatac shuctac ima tucushcacunata ricushpapish, munai manchaihuan cashpami: —Cai runaca Diospac Churitacmi cashca— nircacuna.

⁵⁵ Chaipica tauca huarmicunami carullamanta ricucurcacuna. Chai huarmicunaca Galilea llactamanta pachami Jesusta ayudashpa shamushca carcacuna.

⁵⁶ Paicunapurapica Magdala pueblomanta Mariapish, Jacobopac, Josepac mama Mariapish, shinallatac Zebedeopac churicunapac mamapish chaipimi carca.

Jesusta enterrashcamanta

⁵⁷ Chai punzha ña tutayamucucpica, Arimatea pueblomanta José chayuc runami shamurca. Paipish Jesusta c'aticmi carca.

⁵⁸ Chashna shamushpami, Joseca mandac Pilatopacman rishpa, Jesuspac cuerpota enterrangapac mañarca. Chashna mañacpica, Jesuspac cuerpota cuchun Pilatoca mandarcallami.

⁵⁹ Chashna cucpimi, Joseca Jesuspac cuerpotaca mushuc lienso pañuhuan pillurca.

⁶⁰ Chashna pillushpaca, mushuc cunanlla ruhuashca enterrana jutcupimi churarca. Chai jutcutaca Josellatacmi ruhuachishca carca. Chaipimi Jesuspac cuerpota churashpa, jatun rumihuan jarcashpa rirca.

⁶¹ Chai jutcu ñaupapica Magdala pueblomanta Mariami, caishuc Mariandic saquirishpa tiyacurcacuna.

Jesusta enterrashca ñaupapi soldadocunata cuidachun churashcamanta

⁶² Allichirina punzha tucurishca q'uipa, cayandic samana punzhapimi curacunata mandac curacunapish, fariseocunapish*f** Pilatopacman rircacuna.

⁶³ Chaiman chayashpaca: —Jatun mandaclla. Cai llullac runa causacushpaca: ‘Quimsa punzhapica causarishallami’ nishcatami yuyarinchic.

⁶⁴ Chaimanta pai enterrashca jutcuta quimsa punzhacaman cuidachun cachai, pacta yachacuccuna tuta shamushpa, paipac cuerpota shuhuanmancuna. Chashna shuhuashpaca: ‘Jesusca ñami causarishca’ nishpami, gentecunaman crichingacuna. Chashna ruhuashpacarin, punta llullashcata atishpami ashtahuan llullangacuna— nircacuna.

⁶⁵ Chashna nicpi Pilatoca: —Caipimi, cai soldadocunata cachani. Paicunata pushashpa, ima shinapish alli alli cuidagrichic— nirca.

⁶⁶ Chashna rishpami, ama ima tucuchunca, chai jutcuta huichcashca rumita alli unanchishpa churarcacuna. Shinallatac soldadocunatapish, jutcuta cuidachunmi saquircacuna.