SAN MATEO 20 - Nuevo Testamento en Quichua Cañar 1996

Uvasta pallanahuan chimbapurashpa Jesús parlashcamanta

¹ Jahua pacha Taita Dios mandacucca, shuc chagrayuc amo paipac uvas chagrata pallachingapac, tutamanta utca gentecunata mashcangapac llucshic shinami.

² Ña tarishpaca, paicuna shuc punzhapi mashna cullquita japina cashcata parlashpami, paipac chagrapi uvasta pallachun cacharca.

³ Cutin ashtahuan punzhallata puebloman llucshishpaca, taucacuna plazapi yangalla tiyacuctami ricurca.

⁴ Paicunata ricushpaca: ‘Cancunapish ñuca chagrapi uvasta pallangapac richic. Cancuna pallashcamantaca, mashna cullquita cuna cashcataca cushallami’ nicpi, paicunapish rircallami.

⁵ Cutinllatac chai chagrayucca chaupi punzhata, shinallatac quimsa pacha chishi shinata rishpapish, chashnallatacmi ruhuarca.

⁶ Cutinllatac ashtahuan chishita plazaman rishpapish, taucacuna yangalla tiyacuctami ricurca. Chashna ricushpaca: ‘¿Ima nishpatac cancunaca yanga tucui punzha caipi canguichic?’ nirca.

⁷ Shina nicpi paicunaca: ‘Pipish imata ruhuachun mana mashcangapac shamucpimi, cashna yangalla caipi tiyacunchic’ nircacuna. Chashna nicpi amoca: ‘Cancunapish richic, ñuca chagrapi uvasta pallagrichic’ nirca.

⁸ Ña tutayamucucpica, mayordomota amo c'ayashpaca: ‘Pallaccunata c'ayashpa, cunanlla shamuccunamanta callarishpa, punta shamuccunacaman paicuna pallashcamanta cullquita cui’ nirca.

⁹ Chashna c'ayacpi pichca pacha chishita yaicuccuna shamucpica, tucui punzhamantami paicunamanca pagarca.

¹⁰ Chai q'uipaca, tutamanta pallangapac yaicuccunaman cullquita japina chayacpica: ‘Ñucanchicca yallitami japishun’ nishpami yuyacurcacuna. Chashna cacpipish shuc punzha pallashcallamantami, paicunamanpish pagarca.

¹¹ Chashna pagacpimi, chai chagrayuc amota cashna nishpa

¹² rimai callarircacuna: ‘Caicunaca chishita yaicushpa, shuc pachallatami uvasta pallarcacuna, ashtahuanpish ñucanchicca tucui punzha rupaipi llaquita apashpami, uvas pallanapica carcanchic. ¿Chashna cashca jahuachu, paicunamanpish ñucanchichuan pacta pagangui?’ nircacuna.

¹³ Chashna nicpi amoca paicunapuramanta shucta c'ayashpaca: ‘Uyai, cantaca ima mana allitaca mana ruhuashcanichu. ¿Manachu shuc punzha mashna cullquita pagana cashcataca parlanacurcanchic?

¹⁴ Chaimanta can japina cashca cullquita japishpa ri. Ñucaca cai q'uipata pallangapac yaicuccunapish, canhuan pacta cullquita japichunmi munani.

¹⁵ Ñuca cullquihuanca, imata ruhuasha nishpapish ruhuashallami. Chashna alli cashpa tucuiman cucpica, ¿ama cuchun nishpachu p'iñaringui?’ nirca.

¹⁶ Chai shinallatacmi cunan punzhapi ‘allimi canchic’ niccunaca, yangalla cangacuna. Yangalla caccunaca, alli nishcami cangacuna— nishpami, Jesusca yachachirca.

Jesús pai huañuna cashcata cutin huillashcamanta

¹⁷ Jesusca Jerusalén puebloman ñanta ricushpami, paipac chunga ishcai yachacuccunallata c'ayashpa cashna nirca:

¹⁸ —Uyaichic, cunanca Jerusalenmanmi ricunchic. Chaipimi Runa Tucungapac shamushca*f** ñucataca, curacunata mandac curacunapacmanpish, mandashcacunata yachachiccunapacmanpish japishpa apangacuna. Paicunaca ñucataca ‘huañunami cangui’ nishpami,

¹⁹ mana israelcunaman*f** cungacuna. Chaicunaca ñucata pucllashpa asingacunami. Shinallatac macashpa, cruzpi chacatashpami huañuchingacuna. Chashna ruhuacpipish, quimsa punzhapica causarishallami— nirca.

Jacobopac, Juanpac mama mañashcamanta

²⁰ Chai q'uipaca, Zebedeopac huarmi paipac ishcai c'ari huahuacunandic Jesusman mañangapac shamushpami, paipac ñaupapi cungurirca.

²¹ Chashna cunguricpimi Jesusca: —¿Imatatac ningui?— nicpi chai huarmica: —Ñuca huahuacunata can mandanapi shuctacca cambac alli maquiman, shuctacca cambac lluqui maquiman tiyachinguiyari— nishpa mañarca.

²² Chashna nicpi Jesusca: —Cancuna imata mañacushcataca, mana yachanguichicchu. ¿Cancunaca jayacta ubiac shina llaquicunata ñuca shina apai pudinguichicchu?— nirca. Chashna nicpi paicunaca: —Ari, chashna ruhuashunllami- nirca.

²³ Chashna nicpimi Jesusca: —Ari, cancunaca ñuca shina jayacta ubiac shina llaquicunata apanguichicmi. Ashtahuanpish maijanta ñuca alli maquiman, lluqui maquiman tiyachinataca, Taita Diosmi maijanman allichishca cashpaca tiyachinga, mana ñucaca— nirca.

²⁴ Jesús chashna nicta caishuc chunga yachacuccuna uyashpaca, chai huauquindiccunahuanca p'iñarircacunami.

²⁵ Chaimantami Jesusca paicunata c'ayashpaca: —Cai pachapi mandaccunallami paicuna munashcata ruhuachishpa, gentecunataca charincuna. Shinallatac mandaccunapurapish, maijan ashtahuan jatun cashpaca, paicunatapish mandanllami. Chaitaca cancunallatac yachanguichicmi.

²⁶ Chashna cacpipish cancunapurapica mana chashnachu cana canguichic, ashtahuanpish cancunapurapi maijan mandac casha nishpaca, caishuccunata servinami canguichic.

²⁷ Shinallatac maijanpish punta mandangapac alli nishca casha nishpaca, yangalla shina tucushpami, caishuccunata servina canguichic.

²⁸ Chai shinallatacmi Runa Tucungapac shamushca*f** ñucaca, servichingapacca mana shamurcani, ashtahuanpish servingapac, shinallatac achcacunamanta huañushpa quishpichingapacmi shamurcani— nirca.

Ñahui mana ricuc ishcai runata Jesús alliyachishcamanta

²⁹ Jericó pueblomanta Jesús paipac yachacuccunandic llucshicucpica, achca gentecunami c'atircacuna.

³⁰ “Jesús chaita ricunmi” nicta uyashpami, chai ñanpi tiyacuc, ñahui mana ricuc ishcai runacunaca: —¡Mandac Davidpac aillupuramanta Apunchic Jesús, ñucanchictaca llaquiyari!— nishpa, capari callarircacuna.

³¹ Gentecuna “¡upallaichic!” nishpa jarcacpipish: —¡Mandac Davidpac aillupuramanta Apunchic Jesús, ñucanchictaca llaquiyari!— nishpami, ashtahuan caparircacuna.

³² Chaimantami Jesús shayarishpa, paicunata c'ayashpaca: —¿Ñucataca imatatac ruhuachun ninguichic?— nishpa tapurca.

³³ Chashna tapucpi paicunaca: —Apunchic Jesús, ñucanchic ñahuicuna ricuchunmi munanchic— nircacuna.

³⁴ Paicunata Jesús llaquishpami, paicunapac ñahuipi tuparirca. Chashna tuparicpi ñapish paicunapac ñahuicuna ricucpica, Jesusta c'atishpa rircacunallami.