SAN MATEO 2 - Nuevo Testamento en Quichua Cañar 1996

Yachac runacuna Jesusta ricugrishcamanta

¹ Judea llactapi tiyac Belén pueblopimi, Jesusca huacharirca. Chai punzhacunaca Herodesmi chai llactataca mandacurca. Chaipimi inti llucshic ladomanta, yachac runacuna Jerusalén puebloman shamurcacuna. Paicunaca lucerota ricushpa yachacuccunami carca.

² Paicunaca: —¿Israelcunata*f** mandangapac huacharishca huahuaca, maipitac? Ñucanchicca inti llucshina ladopi, huahua huacharishcata ricuchic lucerotami ricushpa, alli ningapac shamunchic— nircacuna.

³ Chaita uyashpami, mandac Herodesca ima mundota mancharirca. Jerusalenpi causaccunapish, chashnallatacmi mancharircacuna.

⁴ Chaimantami Herodesca Israel*f** curacunata mandac curacunata, shinallatac mandashcacunata yachachiccunata c'ayashpaca: —¿Maipitac Quishpichic Cristoca huacharinga?— nishpa tapurca.

⁵ Chashna tapucpimi paicunaca: —‘Judea llactapi tiyac Belén pueblopimi huacharinga’ nishpami, Diosmanta ñaupa huillacca cashna quillcashca:

⁶ ‘Judea llactapi tiyac Belenlla, canca tucui Judeapi tiyac jatun pueblocunapuramanta mana yalli uchillachu cangui. Canmantami shuc mandac llucshinga. Paimi ñuca acllashca israelcunataca pushanga’ nishcami— nircacuna.

⁷ Chashna huillacpimi, Herodesca yachac runacunata c'ayashpa, pacalla tapurca. Chaipimi paicunaca ima punzha lucerota ricushcata tucui huillarca.

⁸ Chaimantami Belenman yachac runacunataca cashna nishpa cacharca: —Richic. Chai huahuata alli mashcashpa, maipi cashcata tarigrichic. Ña tarishpaca huillangapac shamunguichic, ñucapish chai huahuata alli nigringapac— nirca.

⁹ Mandac Herodes chashna nicta yachac runacuna uyashpa ricpica, inti llucshina ladopi ricurishca lucerollatacmi paicunapac ñaupata rishpa, huahua Jesús maipi cac huasi jahuapi jarcarirca.

¹⁰ Yachac runacuna chai lucerota ricushpaca, yallitami cushicurcacuna.

¹¹ Paicuna chai huasiman ña yaicushpaca, mama Mariandic chai huahuata ricushpami, huahuataca cungurishpa “allimari cangui” nircacuna. Shinallatac paicuna apashpa rishcata pascashpami, achca valishca curita, inciensota, shinallatac mirratapish*f** curcacuna.

¹² Paicunamanmi muscuipi Taita Diosca: “Herodespacmanca ama cutimuchun” nishpa huillarca. Chaimantami paicunaca shuctac ñanta japishpa, shuc ladota paicunapac llactamanca cutircacuna.

Egipto llactaman miticushpa rishcamanta

¹³ Ña yachac runacuna rishca q'uipaca, Mandac Taita Dios cachashca ángel muscuipi Joseman ricurishpaca: “Mandac Herodesmi huahuataca huañuchingapac mashcachigricun. Chaimanta jatari. Huahuata apashpa, paipac mamandic Egipto llactaman ri. Ñuca ima horas shamuchun ningacaman chaipi cagri” nirca.

¹⁴ Shina nicpimi, Joseca riccharishcahuan chai tutallatac huahuata apashpa, mama Mariandic Egipto llactaman rirca.

¹⁵ Chai llactapimi Herodes huañungacaman causarcacuna. Cai shinaca ñaupa huillacman Taita Dios huillachishca pactachunmi, chashnaca tucurca. Chaipica: “Egipto llactamantami ñuca Churitaca c'ayarcani” nishcami carca.

Herodes huahuacunata huañuchichun mandashcamanta

¹⁶ Yachac runacuna paipacman mana cutimushpa umashcamantami, Herodesca munai p'iñarishpa, tucui muyundic Belén llactapi causac, manarac ishcai huatata charic c'ari huahuacunata huañuchichun mandarca. Chaitaca, yachac runacuna lucerota ricushca punzhamanta pachami yuyarishpa, chashnaca ruhuachirca.

¹⁷ Chashnami, Diosmanta ñaupa huillac Jeremías quillcashca pactarca.

¹⁸ Chaipica: “Ramá pueblopi ¡alau! nishpa caparishcami uyarirca. Chai huacacucca Raquelmi, paipac huahuacunamanta huacacurca. Huahuacuna huañushcamantami ‘ama huacaichu’ nicpipish, manatac upallashpa huacacurcalla” ninmi.

¹⁹ Ña Herodes huañushca q'uipaca, Mandac Taita Dios cachashca angelmi José Egiptopi cacpi, muscuipi ricurishpaca:

²⁰ “Jatari. Huahuata apashpa, mama Mariandic Israel*f** llactaman cutilla. Huahuata huañuchishun niccunaca, ñami huañushca” nirca.

²¹ Chaita uyashpami Joseca jatarishpa, huahuata mama Mariandic apashpa, Israel llactaman cutimurca.

²² Ashtahuanpish Herodespac churi Arquelao taitapac randi, Judea llactata mandacushcata yachashpami, chaiman rinataca mancharca. Chaimantami Mandac Taita Dios cutin muscuipi huillacpi, Joseca Galilea llactaman rirca.

²³ Chaiman chayashpaca, Nazaret pueblopimi causangapac rirca. Diosmanta ñaupa huillaccuna huillashca pactachunmi, chashnaca tucurca. Chai huillashcapimi: “Paica nazareno nishcami canga” nishca carca.