SAN MATEO 19 - Nuevo Testamento en Quichua Cañar 1996

Cusandic huarmindicca mana raquirinacunamanta

¹ Chaicunata nishca q'uipami, Jesusca Galilea llactamanta rishpa, Jordán yacumanta chimbanic Judea llactaman chayarca.

² Tauca gentecunami Jesusta c'atircacuna. Chaipimi Jesusca ungushcacunata alliyachirca.

³ Chaipi cacpimi fariseocuna*f** shamushpaca, ima mana allita nicpica juchanchishun nishpa: —Mandashcacunapi nishca shinaca, ¿cusaca paipac huarmimanta raquirinaca allichu canga, imashi?— nishpa, Jesusman tapurcacuna.

⁴ Chashna nicpi Jesusca: —Taita Dios cai pachata ruhuashpaca, c'aritapish, huarmitapish ruhuarcami. ¿Chaitaca manachu Dios quillcachishcapica ricushcanguichic?

⁵ Shinallatac Taita Diosca: ‘Chaimantami c'arica taita mamata saquishpa, paipac huarmihuan tandarishpa causanga. Chashna tandanacushpaca, ishcaimanta shucllami tucunga’ nircami.

⁶ Chashna cashcamanta ña mana ishcaichu, ashtahuanpish shucllami can. Chaimanta Taita Dios tandachishcataca, pi mana ch'icanyachinachu can— nirca.

⁷ Chaimanta paicunaca: —¿Ima nishpatac Moisesca: ‘Firmata cushpaca, huarmimanta raquirichunlla’ nirca?— nishpa tapurca.

⁸ Chashna nicpi Jesusca: —Moisesca cancuna sinchi shungucuna cacpimi, huarmimanta raquirichun saquircalla, ashtahuanpish callaripica, mana chashnachu carca.

⁹ Shina cacpipish ñucaca cashnami nini: Manapish shuc-huan juchallirishca cacpi, huarmimanta raquirishpa shuc-huan cazaracca, juchallinmi— nirca.

¹⁰ Chashna nicpi yachacuccunaca: —Shina mana huarmimanta raquirinalla cacpica, cazaranaca mana allichu canga— nircacuna.

¹¹ Chashna nicpi Jesusca: —Chashna canataca, mana tucuichu chashna cangacuna, ashtahuanpish Taita Dios chashna cachun nishcacunallami chashnaca cangacuna.

¹² Maijancunaca capashca shinami huacharincuna. Cutin maijancunaca capashcatacmi cancuna. Shinallatac maijancunaca jahua pacha Taita Dios mandacucpi servingapacmi, capashca shina tucuncuna. Chashnami tauca runacuna mana cazarashpa causancuna. Maijanpish caita entendinata pudishpaca, chasquichunlla— nirca.

Huahuacunamanta Jesús mañashcamanta

¹³ Chai q'uipami huahuacunapac uma jahuapi maquita churashpa Taita Diosman mañachun nishpa, Jesuspacman pushamurcacuna. Chaita paipac yachacuccuna ricushpaca: “Ama p'iñachic shamuichicchu” nishpami jarcarcacuna.

¹⁴ Paicuna chashna jarcacpimi Jesusca: —Saquichic, huahuacuna ñucapacman shamuchun, ama jarcaichicchu. Cai huahuacuna shina caccunami Taita Dios mandacucmanca yaicungacuna— nirca.

¹⁵ Jesusca huahuacunapac uma jahuapi maquita churashpa mañashca q'uipaca, chaimanta rircallami.

Shuc chayuc moso Jesusman tapushcamanta

¹⁶ Shuc runa Jesuspacman shamushpaca: —Yachachiclla, huiñai causaita charingapacca, ¿ima allitatac ruhuana cani?— nishpa tapurca.

¹⁷ Chashna nicpi Jesusca: —¿Ima nishpatac alli canamanta tapungui? Allica, shucllami tiyan. Chaimanta huiñai causaiman yaicusha nishpaca, mandashcacunata pactachingui— nirca.

¹⁸ Chashna nicpi chai mosoca: —Chai mandashcaca, ¿maijancunallatacyari?— nirca. Chashna nicpi Jesusca: —Ama huañuchingui, ama shuhuangui, ama llullangui, ama huaclliringui,

¹⁹ cambac taita mamata c'uyangui. Shinallatac can ima shinami c'uyaringui, chashnallatac shuccunatapish c'uyangui— nirca.

²⁰ Chashna nicpi chai mosoca: —Chaicunataca tucuitami pactachishcani. Ashtahuanca, ¿imatatac ruhuana cani?— nirca.

²¹ Chashna nicpi Jesusca: —Taita Diospac ñaupapi allitac cangapacca, tucui can charishcacunata c'atushpa, huacchacunaman cugri. Chashna ruhuashpami, jahua pachapica achcata charingui. Chashna ruhuashpaca, ñucata c'atingapac shamuilla— nirca.

²² Chashna nicpi chai mosoca mai chayuc cashcamantami, llaquilla tucushpa rircalla.

²³ Chaimantami paipac yachacuccunaman Jesusca: —Chayuccunaca, Taita Dios mandacucpica mana utca yaicui pudingachu. Chaica chashnatacmi.

²⁴ Shuc chayuc runa Dios mandacucman yaicunapac randica, shuc camello*f** animalchari auja rinrita mana jarcarishpa pasarinmanlla— nirca.

²⁵ Chaita yachacuccuna uyashpaca, ashtahuan mancharishpami: —Chashna cacpica, ¿pitac quishpiringayari?— ninacurcacuna.

²⁶ Chashna nicpi Jesusca paicunata ricurashpaca: —Gentecunapac yuyaipica, maita mana quishpiripacchu, ashtahuanpish Taita Diosmanca imapish ruhuaipacllami— nirca.

²⁷ Chashna nicpi Pedroca: —Ñucanchicca tucui imalla charishcacunata saquishpami, cantaca c'aticunchic. ¿Chaimantaca imatatac japishun?— nishpa tapurca.

²⁸ Chaimantami Jesusca cashna nirca: —Cai pachata Taita Dios mushucta ruhuacucpimi, Runa Tucungapac shamushca*f** ñucaca, sumaimana achicllapi mandai callarisha. Chaipica cancunapish ñucata c'aticcuna cashcamantaca, chunga ishcai mandaccuna mandashpa tiyarinacunapi tiyarishpami, chunga ishcai Israel*f** aillucunata mandanguichic. Chaica chashnatacmi canga.

²⁹ Maijanpish ñucata c'atingaraicu huasita, huauquicunata, panicunata, taita mamata, huarmita, huahuacunata, shinallatac allpata saquicca, caicunamanta pasac cutinhuan yallimi japinga, shinallatac huiñai causaitapish japingami.

³⁰ Chashna cacpipish cunan punzhapi ‘allimi canchic’ niccunaca, achcacunami yangalla cangacuna. Shinallatac achcacunami cunan punzhapi yangalla nishcacunaca, alli nishca cangacuna.