SAN MATEO 18 - Nuevo Testamento en Quichua Cañar 1996

“¿Maijanshi ashtahuan alli canchic?” ninacushcamanta

¹ Chai pachallatacmi yachacuccuna Jesuspacman cuchuyashpaca: —Jahua pacha Taita Dios mandacucpica, ¿maijanshi ashtahuan alli nishca canchic?— nishpa tapunacurcacuna.

² Chashna nicpi Jesusca shuc huahuata c'ayashpa, paicunapac ñaupapi churashpami:

³ —Cancunaca huahuacuna yuyaita japicuc shina, mushuc yuyaita mana japishpaca, jahua pacha Taita Dios mandacucmanca mana yaicunguichicchu. Chaica chashnatacmi canga.

⁴ Maijanpish yangalla tucushpa cai huahua shina cacmi, jahua pacha Taita Dios mandacucpica tucuimanta yalli alli nishcaca canga.

⁵ Maijanpish ñuca shutipi shuc huahuata chasquicca, cai huahuata shina ñucatami chasquin.

Juchapi mana urmachina cashcamanta

⁶ Maijanpish cai uchilla huahua shina ñucata c'aticcunata juchapi urmachictaca, shuc jatun cutana rumita cungapi huatashpa, jatun cucha chaupipi shitanami ashtahuan alli canman.

⁷ Cai pachapica, imapish juchapi urmachic munaicunaca tiyangallatacmi. Shina cacpipish maijanpish juchapi urmachicca, ¡aij, imachari tucunga!

⁸ Chaimanta cambac maqui, cambac chaqui ima juchapi urmachisha nicpica, p'itishpa shitangui. Ishcai chaquindic, ishcai maquindic mana huañuc ninapi shitashca canapac randica, chulla chaquilla, chulla maquilla jahua pachapi causangapac yaicunami canmanca ashtahuan alli canga.

⁹ Shinallatac cambac ñahui ima juchapi urmachisha nicpica, llucchishpa shitai. Ishcai ñahuindic ucu pacha ninapi shitashca canapac randica, chulla ñahuilla jahua pachapi causangapac yaicunami canmanca ashtahuan alli canga.

Chingarishca ovejamanta Jesús chimbapurashpa parlashcamanta

¹⁰ Pacta cai uchilla huahua shinacunata ‘imapac mana valinchu’ nishpa p'iñanguichicman. Ñucaca cashnami nini: Paicunata ricuracuc angelcunaca tucui causaipimi, jahua pacha ñuca Taitapac ñaupapi causacuncuna.

¹¹ Runa Tucungapac shamushca*f** ñucaca, juchapi chingarishcacunata quishpichingapacmi shamurcani.

¹² Shuc runa pasac ovejata michicushpa, shuc ovejata chingachishpaca, ¿imatashi ruhuanman? ¿Manachu iscun chunga iscunta michina urcupi saquishpa mashcagrinman?

¹³ Ña tarishpaca, mana chingarishca iscun chunga iscun ovejamanta yallimi cushicunman. Chaica chashnatacmi can.

¹⁴ Chashnallatacmi jahua pachapi cac cancunapac Taitapish, cai uchilla huahua shinacunataca shucllapish ama chingarichun munan.

Ima shina shuccunahuan alli tucuna cashcamanta

¹⁵ Maijanpish criccunapurapi canta ima mana allita ruhuacpica, pai ima mana alli ruhuashcata ricuchishpa, paillahuan allichingui. Chashna can rimashcata uyashpa alli tucucpica, canca cutinllatacmi paitaca Diospacman tigrachishcangui.

¹⁶ Can rimashcata mana uyacpica, shucta cashpa, ishcaita cashpa pushashpa ringui. Chashna cacpica ishcai cashpa, quimsa cashpa rishpa uyaccunami, imata cashpapish chashnatac cashcata huillangacuna.

¹⁷ Chashna paicunata manallatac uyacpica, tandanacushca criccunaman huillangui. Paicunatapish mana uyacpica, Diosta mana cazucta shina, Roma*f** llactaman impuestota japicta shina charinguichic.

¹⁸ Cai pachapi cancuna allimi nishcaca, jahua pachapipish alli nishcallatacmi canga. Shinallatac cai pachapi cancuna mana allichu nishcaca, jahua pachapipish mana alli nishcallatacmi canga. Chaica chashnatacmi canga.

¹⁹ Caitapish ninimi: Maijan cancunamanta ishcai tucushpa, shuc yuyailla Taita Diosman cai pachapi imata ruhuachun mañacpica, jahua pachapi cac ñuca Taitaca ruhuangallami.

²⁰ Maipimi ishcaillapish, quimsallapish ñuca shutipi tandanacushca canguichic, chaipimi ñucaca cani— nirca.

²¹ Chaimanta Pedroca Jesuspacman shamushpaca: —Apunchic Jesús, ¿mashna cutincamantac ñucata mana allita ruhuactaca perdonasha? ¿Canchis cutincamanchu perdonasha?— nishpa tapurca.

²² Shina nicpi Jesusca: —Mana canchis cutinllachu perdonachun nini, ashtahuanpish canchis cutin canchis chunga yallihuanmi perdonachun nini.

Mana perdonasha nic runamanta Jesús chimbapurashpa parlashcamanta

²³ Jahua pacha Taita Dios mandacucca, shuc llactata mandac paipac runacuna mashna debishcata tapungapac c'ayac shinami.

²⁴ Shina tapunata callaricpica, chunga huaranga talento*f** cullquita debic shuc runatami pushamurcacuna.

²⁵ Pai maimanta cutichinata mana charishcamantami, chai mandacca: ‘Huarmindic, huahuacunandic, tucui charishcacunandic c'atucpimi, debica pactanga’ nirca.

²⁶ Chaimantami chai debic runaca mandacpac ñaupapi cungurishpa: ‘Amito, ashallitota shuyai, ñuca debishcataca tucui cutichishallami’ nishpa, mailla mañarca.

²⁷ Shina nicpi, chai mandacca paita llaquishpami: ‘Shinashpaca saquilla, ama cutichichu’ nishpa cacharca.

²⁸ Shina cachacpi chai runa chaimanta rishpaca, paiman ashalla cullquita debic runahuan tupashpami: ‘¡Debita cutichi!’ nishpa, cungacarashpa sipi callarirca.

²⁹ Chashna ruhuacpi, chai ashalla cullquita debic runaca paipac ñaupapi cungurishpami: ‘Ashata shuyai, ñuca debishcataca tucui cutichishallami’ nishpa, mailla mañarca.

³⁰ Chashna mañacpipish, chai runaca mana uyarcachu, ashtahuanpish carcelpimi tucui debita cutichingacaman churarca.

³¹ Caishuc runacuna chashna ruhuacta ricushpaca, mai llaquirishpami, tucui ima tucushcata mandacmanca huillagrircacuna.

³² Chaita uyashpaca, chai mandacca chai debic runataca cutin c'ayachishpami: ‘Millai runa, can mailla mañacpica, achcata debishcatapish saquircanillami.

³³ Ñuca ima shinami llaquishpa canta saquircani, chashnallatac canpish canhuan puric runataca saquinalla carcangui’

³⁴ nishpa p'iñarishpami, tucui debishcata cutichingacaman carcelpi llaquita apachun churachirca— nirca.

³⁵ Shinallatac Jesusca: —Cancunapurapi shungumanta mana perdonanacucpica, jahua pachapi cac ñuca Taitapish, chashnallatacmi cancunataca ruhuanga— nirca.