SAN MATEO 15 - Nuevo Testamento en Quichua Cañar 1996

“Mana alli yuyaicunami juchayucta ruhuan” nishcamanta

¹ Chai q'uipami maijan fariseocunapish,*f** mandashcacunata yachachiccunapish Jerusalén pueblomanta shamushpa, Jesuspacman cuchuyashpaca:

² —¿Ima nishpatac cambac yachacuccunaca, ñucanchic ñaupa taitacuna ima shinami jahuac shinallatac, maquita mana jahuashpa micuncunayari?— nircacuna.

³ Chashna nicpi Jesusca cashnami nirca: —¿Ima nishpatac cancunapish Taita Dios mandashcata mana cazushpa, cancunapura yachachishcallata c'atinguichic?

⁴ Taita Diosca: ‘Cambac taita mamata c'uyangui’ shinallatac ‘maijanpish taita mamata mana alli nicca, huañuchishcami canga’ ninmi.

⁵ Chashna nicucpipish, cancunaca: ‘Taita mama ima illaclla cashpa, huahuacunaman imata mañacpica: “Caica Taita Diosman cunallami. Chaimantami imata mana cui pudini” ’ niccunami canguichic.

⁶ ‘Taita mamaman imata cushpa ayudanaca, mana tiyanchu’ nishpaca, Taita Dios mandashcata saquishpa, cancunapac yachachishcallatami c'atinguichic.

⁷ ¡Cancunaca mishqui shimi, jayac shungucunami canguichic! Diosmanta ñaupa huillac Isaías cancunamanta huillashpaca, alli nircallami. Pai huillashpaca:

⁸ ‘Cai gentecunaca jahua shimillahuanmi ñucataca alli nincuna. Ashtahuanpish paicunapac shunguca, ñucamanta carupimi.

⁹ Paicuna ñucata alli ningapac tandanacushpapish, yangallami tandanacuncuna. Shinallatac paicuna yachachishpapish, runacuna mandashcallatami yachachincuna’ nishcami— nirca.

¹⁰ Chai q'uipami Jesusca gentecunata c'ayashpa, “caita alli uyashpa entendichic” nishpaca:

¹¹ —Imapish shimita yaicucca mana juchayucta ruhuanchu, ashtahuanpish shungu ucumanta llucshishca, imapish mana alli rimaicunami, gentecunataca juchayucta ruhuan— nirca.

¹² Chashna nicpi yachacuccuna Jesuspacman cuchuyashpaca: —Can chashna nicpica, fariseocunaca*f** p'iñarircacunami. ¿Chaitaca manachu yachangui?— nircacuna.

¹³ Chashna nicpi Jesusca: —Ima yura cashpapish, jahua pacha ñuca Taita mana tarpushca cacca, sapindic aisashpa shitashcami canga.

¹⁴ Ñahui mana ricuc shina pushac fariseocunataca saquichiclla. Paicunaca chashna pushaccuna cashcamantami, caishuc ñahui mana ricuccunata pushashpaca, ishcaitac jutcupi urmangacuna— nirca.

¹⁵ Chai q'uipami Pedroca Jesustaca: —Ñacaman yachachishca, imata nisha nishcataca ñucanchicman huillaiyari— nirca.

¹⁶ Shina nicpimi, Jesusca paipac yachacuccunamanca: —¿Cancunapish manaracchu entendi pudinguichic?

¹⁷ Tucui ima micushcapish, huicsamanmi rin. Chaimantaca q'uipatami llucshin. ¿Chaitaca manachu entendinguichic?

¹⁸ Ashtahuanpish tucui ima rimashcacunaca, shungu ucumantami shamun. Chaimi pitapish juchayucta ruhuan.

¹⁹ Shungu ucumanta millai yuyaicuna llucshicpimi huañuchincuna, cazarashca jahua shuc-huan huacllirinacuncuna, manarac cazarashca cashpapish huacllirinacuncuna, shuhuancuna, llullancuna, shinallatac imapish mana alli rimaicunata rimancuna.

²⁰ Cai mana alli yuyaicunami juchayucta ruhuan. Ashtahuanpish ñaupa taitacuna ima shinami jahuac shinallatac maquita mana jahuashpa micunallaca, mana juchayucta ruhuanchu— nirca.

Canaán llactamanta huarmi, Jesusta crishcamanta

²¹ Jesús chai llactamanta rishpaca, Tiro, shinallatac Sidón pueblocuna tiyac llactamanmi chayarca.

²² Jesús chaipi cacpimi, Canaán llactamanta rishpa, chai llactapi causac shuc huarmi cuchuyashpaca: —Mandac Davidpac aillupuramanta Apunchic Jesús, ¡ñucata llaquiyari! Ñuca huahuatami supai japishpa yallita llaquichicun— nishpa caparirca.

²³ Chashna caparicpipish, Jesusca imata mana nircachu, ashtahuanpish yachacuccuna paipacman shamushpami: —Chai huarmita caimanta richun nishpa, imatapish niyari. Ñucanchic huashatami caparishpa c'atimucun— nishpa mañarcacuna.

²⁴ Chashna nicpi Jesusca: —Taita Diosca ñucataca, chingarishca ovejacuna shina israelcunapacmanllami*f** cacharca— nirca.

²⁵ Ashtahuanpish chai huarmica paipac ñaupapi cungurishpami: —Apunchic Jesús, ñucata ayudaiyari— nirca.

²⁶ Shina nicpi Jesusca: —Huahuacunamanta quichushpa, allquitocunaman tandata cunaca, mana allichu— nirca.

²⁷ Shina nicpi chai huarmica: —Ari, Apunchic Jesús. Ashtahuanpish amocuna micunata micucushpa urmachicpica, allquitocunaca murushpa micunllami— nirca.

²⁸ Shina nicpi Jesusca: —Huarmi, canca tucui shunguhuanmi crishcangui. Can crishcamantaca, can munashca shina ruhuarichun— nirca. Shina nincami, chai huarmipac huahuaca alli tucurca.

Tauca ungushcacunata Jesús alliyachishcamanta

²⁹ Jesús chaimanta rishpaca, Galilea jatun cucha patamanmi chayarca. Chai q'uipaca urcuman rishpami, chaipi tiyarirca.

³⁰ Jesús chaipi tiyacucpimi, achca gentecunaca suchucunatapish, ñahui mana ricuccunatapish, maqui illaccunatapish, mana rimaccunatapish, shinallatac tauca ungushcacunatapish apamushpa, Jesuspac ñaupapi churarcacuna. Paicunataca tucuitami alliyachirca.

³¹ Chashna alliyachicpica, mana rimariccunapish rimai callarircami, maqui illaccunapish alliyarcami, suchucunapish purircami, shinallatac ñahui mana ricuccunapish ricurcami. Chaita ricushpami, gentecunaca munai mana amirishpa, israelcunapac*f** Taita Diostaca “allimari cangui” ni callarircacuna.

Chuscu huaranga yalli gentecunaman Jesús carashcamanta

³² Paipac yachacuccunata Jesús c'ayashpaca: —Cai tucui gentecunami ña quimsa punzhata caipi ñucahuan cancuna. Paicunaca ima micunallatapish mana charicpica llaquinayanmi. Paicunaman mana carashpa, huasiman cachacpica, yarcaihuan ñahui amsayashpa, ñanpi tigrangacunami— nirca.

³³ Shina nicpi yachacuccunaca: —Cai tucui gentecunaman carangapacca, ¿maipitac micunataca tarishun? Caipica pipish mana causanchu— nircacuna.

³⁴ Shina nicpi Jesusca: -¿Cancunaca mashna tandatatac charinguichic?— nishpa tapurca. Shina tapucpimi paicunaca: —Canchis tanda, asha pescadollatami charinchic— nircacuna.

³⁵ Shina nicpi Jesusca gentecunataca: —Chai pambapi tiyarichic— nishpami mandarca.

³⁶ Shina nishpami canchis tandata, asha pescadota japishpa, Taita Diosta pagui nirca. Chai q'uipaca chaupishpa chaupishpami, paipac yachacuccunamanca curca. Paicunaca gentecunamanmi cararcacuna.

³⁷ Chashna caracpica, mana nictami micurcacuna. Ña mana micushpa puchuchishcataca, canchis taza jundatami yachacuccunaca tandarcacuna.

³⁸ Chaipi micuccunaca huarmicunata, huahuacunata mana yupashpami, chuscu huaranga runacuna carca.

³⁹ Chai q'uipami Jesusca gentecunata “caya minchacaman” nishpa cacharca. Chai q'uipaca canoapi tiyarishpami, Magdala llactaman rirca.