SAN MATEO 10 - Nuevo Testamento en Quichua Cañar 1996

Chunga ishcai yachacuccunata Jesús acllashcamanta

¹ Jesusca paipac chunga ishcai yachacuccunata c'ayashpaca, supaicunata llucchicllacunata, imapish ung:uicunata, nanaicunata alliyachicllacunatami ruhuarca.

² Jesusmanta huillachun acllashca chunga ishcaicunaca caicunami: Pedro nishca Simón, paipac huauqui Andrés, shinallatac Zebedeopac churicuna huauquindicpura Jacobopish, Juanpish carcami.

³ Shinallatac Felipe, Bartolomé, Tomás, impuestota*f** japic Mateo, Alfeopac churi Jacobo, Tadeo nishca Lebeopish carcami.

⁴ Simón Celote*f** nishcapish, shinallatac Judas Iscariotepish carcami. Paimi q'uipataca Jesustaca huañuchiccunaman japichirca.

Chunga ishcai yachacuccunata huillagrichun Jesús cachashcamanta

⁵ Chai chunga ishcaicunatami Jesusca cashna nishpa cacharca: —Mana israelcunapacmanca*f** ama ringuichicchu. Shinallatac Samaria llactapi tiyac pueblocunamanpish, ama yaicunguichicchu.

⁶ Ashtahuancarin chingarishca ovejacuna shina cac, israelcunapacman*f** ringuichic.

⁷ Cancuna rishpaca: ‘Jahua pacha Taita Diosca ñami mandagrin’ nishpa huillanguichic.

⁸ Shinallatac lepra*f** ung:uihuan caccunatapish, ima ung:uihuan caccunatapish alliyachinguichic, huañushcacunatapish causachinguichic, supaicunatapish llucchishpa cachanguichic. Chashna ruhuaclla cangapacca, ñucamantami yanga japishcanguichic. Chaimantami cancunapish yanga ruhuana canguichic.

⁹ Cancuna rishpaca, imata randingapacca curitapish, cullquitapish, cobretapish ama apanguichicchu.

¹⁰ Shinallatac cucayu muchilatapish, yanandic churanatapish, ushutatapish, tauna caspitapish ama apanguichicchu. Maipipish imata ruhuacca, japinata charinmi.

¹¹ Cancuna mai pueblopi, mai llactapi yaicushpaca, maijanpish cushilla chasquic runata mashcashpa, chai huasipi maiman ringacaman chaipi canguichiclla.

¹² Chai huasipi chayashpaca: ‘Cai huasipica, Taita Dios sumac causaita cuchun’ nishpa yaicunguichic.

¹³ Chai huasiyuc cancunata alli chasquicpica, cancuna nishcaca mana yangachu canga. Mana chasquicpica, cancuna nishcaca yangallami canga.

¹⁴ Mai pueblopi cashpa, mai huasipi cashpa cancunata mana chasquishpa, cancuna huillashcata mana uyashun nicpica, chaimanta llucshishpa, cancunapac chaquipi c'atirishca allpatapish chaillapitac chaspishpa ringuichic.

¹⁵ Sodoma pueblopi shinallatac Gomorra pueblopi causac millai gentecuna ima shinami llaqui tucurca, chaitapish yallimi chai pueblopi causaccunataca, Taita Dios taripana punzhapica llaquichishca canga. Chaica chashnatacmi canga.

“Cancunataca p'iñangacunami” nishcamanta

¹⁶ Riquichic, ñucaca cancunataca ovejacunata atuccunapac chaupita cachac shinami cachani. Chaimanta cancunaca culebra shina yuyaisapacuna caichic, shinallatac paloma shina c'uyaillacuna caichic.

¹⁷ Cancunataca, llactata mandaccunamanpish japichingacunami. Paicunaca tandanacuna huasicunaman apashpapish macangacunami. Chaimanta alli yuyaihuan puringuichic.

¹⁸ Ñucata c'aticushcamantami, cancunataca llactata mandaccunapacmanpish, jatun mandaccunapacmanpish apangacuna. Shina cacpimi paicunamanpish, shuctac mana israelcunamanpish*f** ñucamanta huillanguichic.

¹⁹ Chashna mandaccunaman japichicpica: ‘¿Imatatac nishun?’ nishpa, ama chai yuyailla canguichicchu. Cancuna rimai callaricpica, Taita Dios imata rimana yuyaita cucpica rimanguichicllami.

²⁰ Chaica, mana cancunapac yuyaimantachu rimanguichic, ashtahuanpish cancunapac Taita Dios cushca paipac Espiritumi, cancunamanca rimana yuyaita cunga.

²¹ Huauquica quiquin huauquillatatac, taitaca quiquin huahuacunallatatac huañuchichunmi japichinga. Shinallatac huahuacunapish taita mamata p'iñashpami, huañuchichun japichingacuna.

²² Cancuna ñucata c'aticushcamantaca, tucui gentecunami p'iñangacuna. Shina cacpipish tucuringacaman llaquicunata apaccunami quishpiringa.

²³ Maijan pueblopi cancunata llaquichicpica, caishuc puebloman ringuichic. Cancuna Israel*f** llactapi manarac tucuiman huillashpa puricpimi, Runa Tucungapac shamushca*f** ñucaca cutimusha. Chaica chashnatacmi canga.

²⁴ Maijan yachacucpish, yachachicta mana yalli ashtahuan yachanchu. Servicpish, amota yalli alli nishcaca mana canchu.

²⁵ Yachacuc ña yachachic shina tucushpaca, cushillami canman. Shinallatac shuc servicpish amo shina tucushpaca, cushillami canman. Huasipi taita shina pushac ñucatapish, ‘supaicunata mandac Beelzebumi*f** cangui’ nicushpaca, chai huasipi causac huahua shina cac cancunatacarin, ¡imatachari ningacuna!

Taita Diosta manchana cashcamanta

²⁶ Gentecuna llaquichigricushcata yachashpapish, mana manchanachu canguichic. Ima pacalla ruhuashcapish, mana pacalla saquiringachu. Imata pacalla ruhuashcapish, tucuimi ricuringa.

²⁷ Ñuca cancunaman amsapi nishcataca, achic punzhapimi huillanguichic. Shinallatac pacallapi huillashcataca, pata jahuaman huichicushpa caparishpami huillanguichic.

²⁸ Cuerpota huañuchiccunataca mana manchanachu canguichic. Cuerpota huañuchishpapish, cancunapac almataca mana huañuchi pudingacunachu. Ashtahuancarin almatapish, cuerpotapish ucu pachaman cachac Taita Diostami manchana canguichic.

²⁹ Ishcai zhutacunataca, ashalla valic shuc cullquipimi c'atuncuna. Shina cacpipish cancunapac Taita mana munacpica, shucllapish pambamanca mana urmanchu.

³⁰ Cancunapac umapi mashna accha tiyashcapish yupashcami can.

³¹ Chashna cashcamanta gentecunataca mana manchanachu canguichic. Cancunacarin, achca zhutacunatapish yalli valicmari canguichic.

Jesusmanta huillanata mana pingana cashcamanta

³² Maijanpish gentecunaman ñucata c'aticushcata huillacpica, ñucapish jahua pachapi cac ñuca Taitapac ñaupapica: ‘Paimi ñucata c'atic’ nishami.

³³ Maijanpish gentecunaman ‘mana c'aticchu cani’ nicpica, ñucapish jahua pachapi cac ñuca Taitapac ñaupapica: ‘Paica mana ñucata c'aticchu’ nishami.

“Ñucata c'aticpica p'iñangacunami” nishcamanta

³⁴ Ñucataca ‘sumac causaita cungapacmi, cai pachamanca shamushca’ nishpaca, ama yuyanguichicchu. Ñucaca mana sumac causaita cungapacchu shamurcani, ashtahuanpish p'iñanacui tiyachunmi shamurcani.

³⁵ Churica taitata, huarmi huahuaca mamata, nueraca suedrata p'iñachunmi ñucaca shamurcani.

³⁶ Shina p'iñaccunaca huasi ucullamantatacmi canga.

³⁷ Maijanpish paipac taita mamata ñucata yalli c'uyacca, mana ñucapacchu canga. Shinallatac maijanpish paipac huahuacunata ñucata yalli c'uyacca, mana ñucapacchu canga.

³⁸ Maijanpish cruzpi chacatashca huañuna shina llaquita apana cashpapish ñucata mana c'atishpaca, mana ñucapacchu canga.

³⁹ Maijanpish quiquin causaita llaquicca chingaringami, ashtahuanpish ñucata c'aticushcamanta quiquin causaita mana llaquicca quishpiringami.

Imata japina cashcamanta

⁴⁰ Maijanpish cancunata chasquicca, ñucatami chasquin. Shinallatac ñucata chasquicca, ñucata cachac Taita Diostami chasquin.

⁴¹ Taita Diosmanta huillac runa cacpi, chai huillacta chasquicca, Taita Diosmanta huillac runa chasquina cashcallatatacmi, chai chasquic runapish chasquinga. Cashcata ruhuac runa cacpi, chai cashcata ruhuacta chasquicca, cashcata ruhuac runa chasquina cashcallatatacmi, chai chasquic runapish chasquinga.

⁴² Shinallatac ñucata c'atic cashcamanta, cai yangalla shinacunaman asha chiri yacullatapish cucmanca, Taita Diosca pai japina cashcata cungami. Chaica chashnatacmi canga— nirca.