SAN MATEO 1 - Nuevo Testamento en Quichua Cañar 1996

Jesucristopac ñaupa taitacunapac shuticunami

¹ Taita Abrahammanta jatun mandac Davidcaman, Davidmanta Jesucristocamanca, Jesucristopac ñaupa taitacunapac shuticunaca caicunami:

² Abrahamca Isaacpac taitami carca. Isaacca Jacobopac taitami carca. Jacoboca Judapac, shinallatac caishuc paipac huauquicunapac taitami carca.

³ Judaca Farespac, shinallatac Zarapac taitami carca. Paicunapac mamaca Tamar shuti carca. Faresca Esrompac taitami carca. Esromca Arampac taitami carca.

⁴ Aramca Aminadabpac taitami carca. Aminadabca Naasonpac taitami carca. Naasonca Salmonpac taitami carca.

⁵ Salmonca Boozpac taitami carca. Boozpac mamaca Rahab shuti carca. Boozca Obedpac taitami carca. Obedpac mamaca Rut shuti carca. Obedca Isaipac taitami carca.

⁶ Isaica jatun mandac Davidpac taitami carca. Jatun mandac Davidca Salomonpac taitami carca. Paipac mamaca Uriaspac huarmimi carca.

⁷ Salomonca Roboampac taitami carca. Roboamca Abiaspac taitami carca. Abiasca Asapac taitami carca.

⁸ Asaca Josafatpac taitami carca. Josafatca Jorampac taitami carca. Joramca Uziaspac taitami carca.

⁹ Uziasca Jotampac taitami carca. Jotamca Acazpac taitami carca. Acazca Ezequiaspac taitami carca.

¹⁰ Ezequiasca Manasespac taitami carca. Manasesca Amonpac taitami carca. Amonca Josiaspac taitami carca.

¹¹ Josiasca Jeconiaspac, shinallatac caishuc paipac huauquicunapac taitami carca. Paicuna causacui punzhapimi, israelcunataca*f** Babilonia llactaman prezu aparcacuna.

¹² Shina apashca q'uipami, Jeconiasca Salatiel nishca churita charirca. Salatielca Zorobabelpac taitami carca.

¹³ Zorobabelca Abiudpac taitami carca. Abiudca Eliaquimpac taitami carca. Eliaquimca Azorpac taitami carca.

¹⁴ Azorca Sadocpac taitami carca. Sadocca Aquimpac taitami carca. Aquimca Eliudpac taitami carca.

¹⁵ Eliudca Eleazarpac taitami carca. Eleazarca Matanpac taitami carca. Matanca Jacobopac taitami carca.

¹⁶ Jacoboca Josepac taitami carca. Joseca Mariapac cusami carca. Mariaca Jesuspac mamami carca. Jesusca Quishpichic Cristomi can.

¹⁷ Chashna cashpami, Abraham causacui punzhamanta David causai punzhacamanca, chunga chuscu taitacuna cashca. David causacui punzhamanta israelcunata Babilonia llactaman prezu apangacamanca, chunga chuscu taitacunami cashca. Chai punzhamanta Quishpichic Cristo huacharingacamanca, chunga chuscu taitacunami cashca.

Jesucristo ima shina huacharishcamanta

¹⁸ Jesucristo huacharinaca cashnami carca: Paipac mama Mariaca Josehuan cazarangapacmi ari ninacushca carca. Josehuan manarac tandanacushpami, Mariaca Diospac Espíritu llanducpi, huicsayuc taririrca.

¹⁹ Paipac cusa cana Joseca cashcata ruhuac cashcamantami, mana pimanpish yachachishpa, Mariataca pacalla shitasha nicurca.

²⁰ Pai chashna yuyacucpipish, Taita Dios cachashca angelmi muscuipi ricurishpaca: “Davidpac huahua huahuapuramanta José, Mariahuanca cazarailla, ama manchaichu. Pai charigricuc huahuaca, Diospac Espiritumantami.

²¹ Paica shuc c'ari huahuatami charinga. Chai huahuataca JESÚS shutitami shutichingui. Paimi tucui pai acllashcacunataca juchacunamanta quishpichinga. Chaimantami chai shutica canga” nirca.

²² Tucui chaicunaca Taita Dios paimanta huillacman ñaupa huillachishca pactachunmi, chashnaca tucurca.

²³ Pai huillashpaca: “Manarac c'arihuan chayarinacushca shuc solterami, huicsayuc tucushpa, shuc c'ari huahuata charinga. Chai huahuaca Emanuel shutimi canga” nishcami. (Emanuel nishpaca: “Dios ñucanchichuan” nisha ninmi).

²⁴ José riccharishpaca, Taita Dios paipac angelman huillachishcata cazushpami, Mariahuanca cazararca.

²⁵ Joseca chashna cazarashpapish mana chayarinacushpami, María chai huahuata charingacamanca causarca. Chai huahuataca JESÚS shutitami shutichirca.