MARCOS 7 - Nuevo Testamento en Quichua Cañar 1996

“Mana alli yuyaicunami juchayucta ruhuan” nishcamanta

¹ Chai q'uipami fariseocunapish,*f** mandashcacunata maijan yachachiccunapish Jesuspacman tandanacumurcacuna. Chai yachachiccunaca Jerusalén pueblomantami shamushca carcacuna.

² Chai runacunaca Jesuspac maijan yachacuccuna maquita mana jahuashpa micucucta ricushpami: “Chai yachacuccunaca ‘maquita jahuashpami micuna’ nishpa mandashcata mana cazushpami, chashna micuncuna” nishpa juchanchircacuna.

³ (Fariseocunapish, tucui israelcunapish*f** ñaupa taitacuna yachachishcata c'atishcamantaca, paicunapac maquita jahuashpallami micuccuna carca.

⁴ Chashnallatac micunata randishpa cutimushpapish, maquita mana jahuashpaca, mana micuccunachu carca. Shinallatac shuctac yachachishcacunatapish pactachiccunami carca. Shina cashpami vasocunatapish, jarrocunatapish, platocunatapish jahuaccuna, shinallatac camacunatapish tacshaccuna carca).

⁵ Chashna ruhuaccuna cashpami fariseocunapish, mandashcacunata yachachiccunapish Jesusta tapushpaca: —Ñucanchic ñaupa taitacunaca: ‘Maquita jahuashpami micuna canguichic’ nishcami. Cutin cambac yachacuccunaca, ¿ima nishpatac chashna nishcataca mana cazushpa, maquita mana jahuashpa micuncuna?— nircacuna.

⁶ Shina tapucpimi, Jesusca paicunata cashna nirca: —¡Cancunaca mishqui shimi, jayac shungucunami canguichic! Diosmanta ñaupa huillac Isaías cancunamanta quillcashpaca, allillatatacmi cashna nishca: “Cai gentecunaca jahua shimillahuanmi ñucataca alli nincuna. Ashtahuanpish paicunapac shunguca ñucamanta carupimi.

⁷ Paicunaca ñucata alli ningapac tandanacushpapish, yangallami tandanacuncuna. Shinallatac paicuna yachachishpapish, runacuna yachachishcallatami yachachincuna” nishcami.

⁸ Chashna ruhuashpami, cancunaca Taita Dios mandashcacunata saquishpa, runacuna yachachishcallata c'aticunguichic— nirca.

⁹ Shina nishpami, Jesusca caitapish nirca: —Taita Dios mandashcacunataca yangata ruhuashpami, cancunapac ñaupa taitacuna yachachishcallata cazunguichic.

¹⁰ Moisés mandashpaca: ‘Cambac taita mamata c'uyangui. Maijanpish taita mamata mana alli nictaca, huañuchishcami canga’ nishcami.

¹¹ Ashtahuanpish cancunaca: ‘Taita mama imata mañacpica, “ñuca ima charishcacunaca Corbán nishcallami. Chaimanta imahuan mana ayudai pudinichu” ’ niccunami canguichic. (Corbán nishpaca: ‘Taita Diosman cunami’ nisha ninmi).

¹² Chashna yachachishpami, taita mamaman imata cuchunca mana saquinguichic.

¹³ Chashna cashpami, Taita Dios mandashcacunata yangata ruhuashpa, cancunapac munaillata caishuc chaishuc yachachinacunguichic. Ima ashtahuan shuc chashna layacunatapish ruhuaccunami canguichic— nirca.

¹⁴ Shina nishpami, tucui chaipi cac gentecunata c'ayashpa Jesusca: —Tucui mashna caita uyashpa, alli entendichic:

¹⁵ Imapish shimita yaicucca mana juchayucta ruhuanchu, ashtahuanpish shungu ucumanta llucshic mana alli yuyaicunami juchayuctaca ruhuan.

¹⁶ Rinrita chariccunaca, cai ñuca huillashcata alli uyaichic— nirca.

¹⁷ Chai tucui gentecunata saquishpa, Jesús huasiman yaicucpica, paipac yachacuccunaca: — Can ñacalla parlacushca ima nisha nishcataca, ¿manachu alli yachachinguiman?— nishpa tapurcacuna.

¹⁸ Shina tapucpimi, Jesusca paicunataca: —Cancunapish ñuca huillacushca ima nisha nishcataca, ¿manaracchu entendinguichic? Ima micunapish shimita yaicucca mana juchayucta ruhuactaca, ¿manachu entendinguichic?

¹⁹ Imapish shimita yaicucca shunguman mana yaicushpami, huicsallaman yaicun. Q'uipamanca llucshinllami— nirca. Chashna nishpaca, ima micunatapish micunallami nishpami, Jesusca yachachirca.

²⁰ Paillatacmi caitapish nirca: —Shungu ucumanta llucshic, mana alli yuyaicunami juchayuctaca ruhuan.

²¹ Shungu ucumanta millai yuyaicuna llucshicpimi, cazarashca jahua shuc-huan huacllirinacuncuna, manarac cazarashca cashpapish huacllirinacuncuna, huañuchincuna,

²² shuhuancuna, yallita charicyana yuyailla cancuna, pitapish llaquichincuna, umancuna, pingai illacpish tucuncuna, shuccuna ama charichun nishpa munancuna, imatapish llullashpa purincuna, quiquinlla alli cashcata yuyancuna, yuyai illacpish tucuncuna.

²³ Tucui cai millai yuyaicuna shungumanta llucshishpami, juchayuctaca ruhuan— nirca.

Sirofenicia huarmi crishcamanta

²⁴ Chai llactamanta rishpaca Tiro llacta, Sidón llactamanmi Jesusca chayarca. Chai llactapica, caiman shamushcataca pipish ama yachashca cachunmi, shuc huasiman yaicurca. Chashna cacpipish gentecunaca Jesús maipi cashcata yachac chayarcacunallatacmi.

²⁵ Chaimantami ñapish shuc huarmica Jesús chaipi cacta yachashpa, paipac ñaupaman shamushpaca cungurircalla. Chai huarmica supai japishca shuc huarmi huambratami charirca.

²⁶ Chai huarmica Sirofenicia llactapimi causarca. Paica mana israelcunapuramantachu*f** carca. Chai huarmica: —Ñuca huahuamanta supaita llucchishpa cachashpa cui— nishpami, Jesusmanca mailla mañarca.

²⁷ Shina nicpi Jesusca chimbapurashpa parlashpaca: —Saqui, huahuacunarac micuchun. Huahuacuna micucucta quichushpa, allquitocunaman caranaca mana allichu— nirca.

²⁸ Shina nicpi chai huarmica: —Ari, Apunchic Jesús. Shina cacpipish allquitocunaca huahuacuna micucushpa urmachishcataca micunllami— nirca.

²⁹ Shina nicpimi, Jesusca cashna nirca: —Canca allitami nishcangui. Cambac huahuamantaca, supaica ñami llucshirca. Cunanca huasiman rilla— nishpami cacharca.

³⁰ Shina nicpi huasiman rishpaca, paipac huambra ña alli tucushca camapi siricuctami ricurca. Supaica chai huambramantaca ñami llucshishca carca.

Jesusca shuc rinri mana uyac, c'allu huatarishca runata alliyachishcamanta

³¹ Jesusca Tiro llactamanta cutimushpaca, Sidón llactata rishpa, Decápolis llactata shamushpami, Galilea jatun cuchaman chayamurca.

³² Jesús chaipi cacpimi, rinripish mana uyac, shimipish huatarishca runata paipacman pushamushpaca: —Cai runapac uma jahuapi cambac maquita churashpa, alliyachishpa cui— nishpa mañarcacuna.

³³ Chashna mañacpimi, Jesusca chaipi cac gentecunamanta chai runallata ashata caruyachishpa, paipac c'allupi t'ucata churashpa, ishcai rinricunapi dedocunata satirca.

³⁴ Chashna ruhuashpami, Jesusca jahua pachata huichailla ricushpa, shungupi llaquirishpa: —¡Efata!— nirca. “Efata” nishpaca: “Pascari” nisha ninmi.

³⁵ Chashna nicpica, chai runapac rinricunaca alliyashpa pascarircallami. Huatarishca c'allupish alli tucucpi, ña alli rimarcallami.

³⁶ Chashna alliyachishpaca Jesusca: —Pacta piman huillanguichicman— nishpami, gentecunataca cutin cutin nirca. Chashna nishcapish, paicunaca ashtahuanmi pimanpish parlashpa purircacuna.

³⁷ Chashna parlacpica, tucui mashna munai mancharishpami: “Paica tucuitami allita ruhuan. Rinri mana uyaccunatapish uyachin, shimi mana rimaccunatapish rimachinmi” nircacuna.