MARCOS 15 - Nuevo Testamento en Quichua Cañar 1996

Mandac Pilatopac ñaupaman Jesusta apashcamanta

¹ Tutamanta ña pacarimucucpimi, Israel*f** curacunata mandac curacunaca cunac yuyaccunahuanpish, mandashcacunata yachachiccunahuanpish, shinallatac caishuc mandaccunahuanpish parlanacungapac tandanacurcacuna. Chai q'uipami, mandac Pilatopac ñaupaman Jesustaca huatashpa aparcacuna.

² Chaiman chayachicpimi Pilatoca: —¿Canchu israelcunata Jatun Mandac cangui?— nishpa tapurca. Shina tapucpi Jesusca: —Ari, canllatac nishcanguimi— nirca.

³ Shina nicpi, curacunata mandac curacunaca caita chaita nishpami juchanchircacuna.

⁴ Chashna juchanchicpi Pilato cutin tapushpaca: —Canta munai juchanchicucpipish, ¿manachu imata ningui?— nirca.

⁵ Chashna nicpipish, Jesusca upalla carcallami. Chaimantami Pilatoca mancharishpa, mana amirirca.

Jesusta “huañunami cangui” nishcamanta

⁶ Pascua*f** fiesta punzhapi gentecuna shuc prezuta cacharichun nishpa mañacpica, mandac Pilatoca cacharicllami carca.

⁷ Chaipica Barrabás runami, caishuc runacunahuan tandanacushpa macanacuita callarishca carca. Chai macanacuipi huañuchishcamantami, tucui mashna carcelpi tiyacurcacuna.

⁸ Pilato chashna cachariclla cacpimi, achca gentecuna paipacman shamushpa: —Canca cachariclla cashca shinallatac, cunanpish shuc prezuta cacharilla— nishpa mañarcacuna.

⁹ Chashna nicpi Pilatoca: —¿Israelcunata*f** Jatun Mandactachu cacharichun ninguichic?— nishpa tapurca.

¹⁰ Curacunata mandac curacuna Jesusta p'iñashcallamanta paipacman apamushcata Pilato ña yachashcamantami, chashnaca nirca.

¹¹ Ashtahuanpish chai mandac curacunaca tucui chaipi caccunatami: “ ‘Jesuspac randica, Barrabasta cachari’ ninguichic” nishpa cunarcacuna.

¹² Pilatoca tucui chaipi caccunaman cutin tapushpaca: —Cancuna israelcunata Jatun Mandac nishpa c'ayana runataca, ¿imatatac ruhuachun ninguichic?— nirca.

¹³ Chashna tapucpica: —¡Paitaca cruzpi chacatachunmi ninchic!— nishpami caparircacuna.

¹⁴ Chashna caparicucpimi Pilatoca: —Cai runaca, ¿ima mana allitatac ruhuashcayari?— nishpa tapurca. Chashna nicpicarin: —¡Cai runataca chacatailla!— nishpami, ashtahuan caparircacuna.

¹⁵ Gentecuna chashna caparicpimi, Pilatoca paicunahuan alli saquiringaraicu Barrabastaca cacharirca. Jesustaca azutichircami. Chashna azutichishca q'uipaca, cruzpi chacatachunmi soldadocunaman curca.

¹⁶ Chaimantaca Pilato mandashpa tiyana jatun huasi pungu pambamanmi soldadocunaca Jesusta chayachishpa, tucui soldadocunatapish chaiman tandachircacuna.

¹⁷ Chaipimi soldadocunaca burlata ruhuangapac, mandaccuna churarina morado churanata Jesusman p'achallichishpa, shinallatac cashayuc sacha angutapish ahuashpa, coronapac randica umapi churachircacuna.

¹⁸ Chashna churachishpaca: —¡Israelcunata Jatun Mandac, canca allimari cangui!— nishpa capari callarircacuna.

¹⁹ Chashna nishpami, Jesustaca umapi garrutishpa, t'ucashpa paipac ñaupapi cunguric tucushpa, mañac tucurcacuna.

²⁰ Chashna pucllashpa asishca q'uipami, morado liensota surcuchishpa, paipac churanallatatac cutin churachishpa, Jesustaca cruzpi chacatangapac apashpa rircacuna.

Jesusta cruzpi chacatashcamanta

²¹ Jesusman cruzta apachishpa ricucpimi, chagramanta cuticuc Simón runa tuparca. Chai runamanmi cruzta apachishpa rircacuna. Paica Cirene pueblomantami carca, shinallatac Alejandropac, Rufopac taitami carca.

²² Jesustaca Gólgota urcumanmi pushashpa rircacuna. “Gólgota” nishpaca, “Uma Tullu” nisha ninmi.

²³ Chai urcupimi Jesusmanca, mirrahuan*f** chapushca vinota ubiachishun nircacuna. Shina cucpipish Jesusca mana ubiarcachu.

²⁴ Chashna ruhuashca q'uipami, soldadocunaca Jesusta cruzpi chacatarcacuna. Chai q'uipaca: “Jesuspac churanacunata maijanmi japinchic” nishpami, paicunapura suerteta ruhuarcacuna.

²⁵ Iscun horas tutamanta cacpimi, Jesustaca chacatarcacuna.

²⁶ Imamanta chacatashcatapish caspipi quillcashpami: “Caica Israelcunata Jatun Mandacmi” nishpa churarcacuna.

²⁷ Ishcai huañuchic shuhua runacunatapish, shuctaca alli maquiman, shuctaca lluqui maquiman Jesushuan pactami chacatarcacuna.

²⁸ Chashna paicunahuan chacatacpimi: “Millaita ruhuaccunata shinami llaquichishca canga” nishpa, Dios ñaupaman quillcachishca pactarca.

²⁹ Jesusta cruzpi chacatashca q'uipaca, chaita ricuccunaca umata cuyuchishpami, cashna rimashpa c'amircacuna: —¡Jai, canca ‘Diosman mañana huasita urmachishpaca, quimsa punzhallapi cutin shayachishallami’ nircanguicarin!

³⁰ ¡Shina cashpaca, chacatashcamanta uricushpa, canllatac quishpiriyari!— nircacuna.

³¹ Curacunata mandac curacunapish, mandashcacunata yachachiccunapish chashnallatacmi Jesustaca asinacushpa, paicunapura cashna nishpa parlanacurcacuna: —Paica shuccunataca quishpichircami. Cunanca paillatacca mana quishpirinata pudinchu.

³² ¡Israelcunata Jatun Mandac Quishpichic Cristo cashpaca, cunanllatac chacatashcamanta uricuiyari, chashna uricucta ricushpaca, ñucanchicpish crinchicmanmi!— nircacuna. Jesushuan pacta chacatashca runacunapish, paitaca c'amishpa rimarcacunami.

Jesús huañushcamanta

³³ Chaupi punzhamanta quimsa horas chishi tucungacamanmi, tucui cai pachaca amsayarca.

³⁴ Chai horasllatacmi Jesusca: —Eloí, Eloí, ¿lama sabactani?— nishpa, sinchita caparirca. Cai rimarishcaca: “Ñuca Dios, ñuca Dios, ¿ima nishpatac ñucallata saquinguiyari?” nisha ninmi.

³⁵ Jesús chashna caparicta maijan chaipi caccuna uyashpaca: —Uyaichic, ñaupa huillac Eliastami c'ayacun— nircacuna.

³⁶ Chashna Jesús caparicpimi, shuc runaca esponjata apamungapac callparca. Chaitaca jayac vinopi satishpami, caspi puntapi churashpa, Jesús ubiachun nishpa shimiman chayachirca. Shina ruhuashpaca: —Saquichic, Eliasca cruzmanta uricuchingapac shamunchu, imami, ricungapac— nirca.

³⁷ Chai horasmi Jesusca sinchita caparishcahuan huañurcalla.

³⁸ Jesús huañucpica, Diosman mañana huasi ucupi jarcachishca jatun liensoca jahuamanta uraimanmi chaupita lliquirirca.

³⁹ Jesusta cruzpi chacatashca ñaupapica, pasac soldadocunata mandac Roma*f** llactamanta soldadomi shayacurca. Paimi Jesús ima shina caparishpa huañuctapish ricurca. Shina ricushpami: —Cai runaca Diospac Churitacmi cashca— nirca.

⁴⁰ Chashnallatac Jesús chacatashcataca, tauca huarmicunami carullamanta ricushpa shayacurcacuna. Chai huarmicunapurapica, Magdala pueblomanta Mariapish, q'uipa Jacobopac, Josepac mama Mariapish, shinallatac Salomepish chaipimi carca.

⁴¹ Chai huarmicunami Galilea llactapi Jesús puricucpica, ayudashpa Jesusta c'atishpa puriccuna carca. Shinallatac Jerusalén puebloman paihuan shamuc tauca shuctac huarmicunapish chaipimi carca.

Jesusta enterrashcamanta

⁴² Cayandic samana punzhapac*f** allichirina punzhaca, ñami chishiyacurca.

⁴³ Chai chishillatacmi Arimatea pueblomanta José runaca mana manchashpa, mandac Pilatopacman shamushpa, Jesuspac cuerpota enterrangapac mañarca. Paica mandaccunapura tandanacushcapica, mai alli nishca runami carca. Paipish Taita Dios mandacucta ricusha nishpami shuyacurca.

⁴⁴ Pilatoca “Jesusca ñami huañushca” nicta uyashpami, mancharishpa: “¿Huañushcatacchu canga, imashi?” nishpa, pasac soldadocunata mandacta c'ayashpaca: —¿Ñachu huañun?— nishpa tapurca.

⁴⁵ Chashna tapucpi, pasac soldadocunata mandacca: —Ari, ñami huañushca— nirca. Shina nicpi Pilatoca: —Shinashpaca rilla, enterragri— nishpa, Josetaca cacharca.

⁴⁶ Chaimanta rishpami, Joseca shuc jatun lienso pañuta randishpa, Jesuspac cuerpotaca cruzpi chacatashcamanta uricuchishpa pilluchirca. Chashna pilluchishpami, Jesuspac cuerpota rumi quinrai jutcushcapi churarca. Chaimantaca shuc jatun rumita singuchishpami, chai jutcu pungutaca jarcarca.

⁴⁷ Jesusta maipi churactaca, Magdala pueblomanta Mariapish, shinallatac Josepac mama Mariapish ricucurcacunami.