MARCOS 11 - Nuevo Testamento en Quichua Cañar 1996

Jerusalén puebloman Jesús yaicushcamanta

¹ Jerusalén puebloman ña chayagricushpaca, Betfagé puebloman, shinallatac Betania pueblomanmi chayagrircacuna. Chaillapitacmi Olivos urcupish carca. Chaiman chayashpami, Jesusca paipac yachacuccunapuramanta ishcaita cacharca.

² Paicunataca: —Chai chimbapi cac ashalla huasicunaman richic. Chaiman chayashpaca, pi manarac montashca shuc burro huatashca shayacuctami ricunguichic. Chai burrota cacharishpa apamugrichic.

³ Cancuna cacharicucpi maijan ‘¿imapactac apacunguichic?’ nicpica: ‘Apunchic Jesusmi apachun cachan, chaimantami apacunchic. Ñallami saquic shamushun’ ninguichic— nirca.

⁴ Paicuna rishpaca, huasi ñaupalla ñan pambapi shuc burro huatashca shayacucta tarishpami cacharicurcacuna.

⁵ Chashna cacharicucpimi, maijan chaipi caccunaca: —¿Ima nishpatac burrotaca cacharicunguichic?— nircacuna.

⁶ Chashna nicpi, chai ishcai yachacuccunaca Jesús ima shina nichun nishca shinallatacmi nircacuna. Chashna nicpica, apachun saquircacunallami.

⁷ Ña Jesuspacman chayamucpica, burrotaca churanacunahuanmi sudarcacuna. Ña sudashca burropimi, Jesusca montashpa rirca.

⁸ Achcacunami paicunapac churanacunata Jesús rina ñanpi tendishpa churarcacuna. Shinallatac shuccunaca sacha ramacunatami p'itishpa, ñanpi churarcacuna.

⁹ Chashna churashpaca, Jesuspac ñaupata riccunapish, huashata c'atishpa riccunapish: —¡Taita Dios cachashca shamucucca, alli nishca cachun! ¡Sumac cushicui cachun!

¹⁰ ¡Ñucanchic ñaupa mandac David mandashca shina mandangapac shamucucca, alli nishca cachun! ¡Jahua pachapipish alli nishca cachun!— nircacunami.

¹¹ Jesusca chashna Jerusalenman chayashpami, Diosman mañana huasiman yaicurca. Chai ucupi tucuita ricushpaca, ña tutayagricpimi, paipac chunga ishcai yachacuccunandic Betania puebloman rirca.

Mana p'ucuc higo yurata chaquichishcamanta

¹² Cayandic punzha paipac yachacuccunandic Betania pueblomanta ña llucshicushpami, Jesusca yarcachirca.

¹³ Chashna yarcaihuan ricushpaca, carumanta shuc p'angasapa higo yura shayacuctami ricurca. “Chai yuraca ñami p'ucushca canga” nishpami, ricungapac rirca. Chai yuraman chayashpa ricucpica, manarac p'ucuna punzhacuna pactashcamanta chushac p'angallami junda carca.

¹⁴ Chaimantami Jesusca chai yurataca: —Cunanmanta pacha cai yuramantaca, mana pi ashtahuan micungachu— nirca. Chashna rimactaca, paipac yachacuccunaca uyacurcacunami.

Jesusca Diosman mañana huasimanta c'atuccunata llucchishpa cachashcamanta

¹⁵ Chai q'uipaca Jerusalén pueblomanmi chayamurcacuna. Chaipimi Jesusca Diosman mañana huasiman yaicushpa c'atuccunatapish, randiccunatapish llucchishpa cacharca. Shinallatac cullquita cambiaccunapac mizacunatapish, palomacunata c'atuccunapac tiyarinacunatapish tigrachishpami shitarca.

¹⁶ Chashnallatac Diosman mañana huasi ucupica, pitapish imata apashca purichunca mana saquircachu.

¹⁷ Jesusca chaipi caccunataca yachachishpami: —Dios quillcachishcapica: ‘Ñuca huasica tucui llactacunamanta shamuccuna ñucaman mañana huasimi canga’ ninmi, ashtahuanpish cancunaca shuhuacuna miticuna machai shinatami ruhuashcanguichic— nirca.

¹⁸ Chashna nicta uyashpaca, mandashcacunata yachachiccunapish, curacunata mandac curacunapish Jesustaca ima shina huañuchinatami yuyaricurcacuna. Tucui gentecuna “Jesusca allitami yachachin” ninacucta uyashcamantami, manchashpa huañuchinata munarcacuna.

¹⁹ Ña tutayamucpica, Jesusca paipac yachacuccunandicmi Jerusalenmanta llucshishpa rirca.

Jesús rimashca higo yura chaquishcamanta

²⁰ Cayandic tutamanta ñanta ricushpaca, higo yurataca tucui sapindic chaquishcatami ricurcacuna.

²¹ Chaita ricushpami, Pedroca Jesús nishcata yuyarishpaca: —Riqui, Yachachic. Can ‘cai yuramanta ama pi micuchun’ nishca yuraca, ña chaquishcami— nirca.

²² Shina nicpi Jesusca: —Taita Diosca imatapish ruhuaclla cashcata crichic.

²³ Maijan cancunamanta tucui shunguhuan crishpa, mana caita chaita yuyashpa, cai urcuta ‘caimanta anchuri, jatun cuchaman shitari’ nicpica, shitarinmanllami. Chaica chashnatacmi canga.

²⁴ Chaimanta cancunaman huillanimi: Cancuna imata Taita Diosman mañashpapish, ña japishca shinata crishpa mañashpaca japinguichicmi.

²⁵ Chashnallatac cancuna Taita Diosman mañacushpaca, maijanta p'iñachishca cashpaca perdonaichic. Chashna ruhuacpimi, jahua pachapi cac cancunapac Taitapish cancunapac juchacunata perdonanga— nirca.

“¿Pitac cantaca chashna ruhuachicun?” nishpa, Jesusman tapushcamanta

²⁷ Chai q'uipami Jerusalén puebloman cutimurcacuna. Chaipica Diosman mañana huasipi Jesús puricucpimi, Israel*f** curacunata mandac curacunapish, mandashcacunata yachachiccunapish, cunac yuyaccunapish paipacman cuchuyarcacuna.

²⁸ Shina cuchuyashpaca: —¿Pi mandacpitac chashna ruhuacungui? ¿Pitac cantaca chashna ruhuachun mandarca?— nishpa tapurcacuna.

²⁹ Shina nicpi Jesusca: —Ñucapish cancunaman tapusha nini. Ñuca tapushcata cancuna cutichicpica, ñucapish pi chashna ruhuachun mandashcataca huillashallami.

³⁰ Bautizac Juan bautizachunca, ¿Dioschu cacharca, mana cashpaca runacunallachu cacharca? Cancunapish huillaichic— nirca.

³¹ Jesús chashna tapucpica, paicunapura caishuc chaishuc rimanacushpaca: —‘Taita Diosmi cachashca’ nicpica: ‘Shinashpaca, ¿ima nishpatac Juan huillashcataca mana crircanguichic?’ ningami.

³² ‘Runacunallami Juantaca cacharca’ ninapish mana allichu— ninacurcacuna. Tucui gentecuna “Juanca Diosmantatacmi huillacun” ninacucta uyashcamantami, gentecunata manchashpa imata mana ni pudircacuna.

³³ Chashna parlanacushpami Jesusmanca: —Mana yachanchicchu— nircacuna. Shina nicpi Jesusca: —Shinashpaca, ñucapish pi mandacpi chashna ruhuacushcataca mana huillashachu— nirca.