MARCOS 10 - Nuevo Testamento en Quichua Cañar 1996

Cusandic huarmindicca mana raquirinacunamanta

¹ Jesusca Capernaum pueblomanta llucshishpaca, Jordán yacuta pasashpa, Judea llactamanmi rirca. Paipacman achca gentecuna tandanacumucpimi, Jesusca pai yachachic cashca shinallatac cutin yachachi callarirca.

² Shina yachachicucpimi, ima mana allita nicpica, juchanchingaraicu maijan fariseocuna*f** shamushpaca: —Mandashcacunapi nishca shinaca, ¿cusaca paipac huarmimanta raquirinaca allichu canga?— nishpa, Jesusman tapurcacuna.

³ Shina tapucpi Jesusca: —Moisés mandashcapica, ¿imatatac cancunamanca ninyari?— nishpa tapurca.

⁴ Shina tapucpi fariseocunaca: —Moisesca: ‘Firmata cushpaca, huarmimantaca raquirinallami’ nishcami— nircacuna.

⁵ Shina nicpi Jesusca: —Cancuna sinchi shungucuna cacpimi, Moisesca chashna ruhuachunca saquishca.

⁶ Ashtahuanpish Taita Diosca cai pachata ruhuashpaca, c'aritapish, huarmitapish ruhuarcami.

⁷ Chaimantami c'arica taita mamata saquishpa, huarmihuan tandarishpa causanga.

⁸ Chashna tandanacushpaca, ishcaimanta shucllami tucunga. Shinashpaca ña mana ishcaichu, ashtahuanpish shucllami can.

⁹ Chashna cashcamanta Taita Dios tandachishcataca, pi mana ch'icanyachinachu can— nirca.

¹⁰ Paipac yachacuccunaca Jesushuan ña huasipi cashpami, cutin chaillamantatac tapurcacuna.

¹¹ Shina tapucpi Jesusca: —Maijanpish paipac quiquin huarmimanta raquirishpa shuc-huan cazarashpaca, juchallishpami causan.

¹² Shinallatac maijan huarmipish paipac cusamanta raquirishpa, shuc-huan cazarashpaca, juchallishpami causan— nirca.

Huahuacunamanta Jesús mañashcamanta

¹³ Chai q'uipami, huahuacunapac uma jahuapi maquita churachun nishpa, Jesuspacman pushamurcacuna. Ashtahuanpish chai pushamuccunataca: —Ama p'iñachic shamuichicchu— nishpami, yachacuccunaca jarcashpa rimarcacuna.

¹⁴ Chashna jarcacucta ricushpami, Jesusca p'iñarishpa paipac yachacuccunataca: —Saquichic, huahuacuna ñucapacman shamuchun ama jarcaichicchu. Cai huahuacuna shina caccunami Taita Dios mandacucmanca yaicunga.

¹⁵ Maijanpish shuc huahua chasquic shina, Taita Dios Mandac cachun mana chasquicca, Taita Dios mandacucmanca mana yaicungachu. Chaica chashnatacmi canga— nirca.

¹⁶ Shina nishpami, Jesusca huahuacunata marcashpa, paicunapac uma jahuapi maquita churashpa, Taita Dios paicunata bendiciachun nishpa mañarca.

Shuc chayuc runa Jesusman tapushcamanta

¹⁷ Jesús chaimanta llucshishpa ñanta ricucpimi, shuc moso paipac ñaupaman callpamushpa cungurirca. Shina cungurishpaca: —Alli yachachiclla, ñuca huiñai causaita charingapacca, ¿imatatac ruhuana cani?— nishpa tapurca.

¹⁸ Shina tapucpimi Jesusca: —¿Ima nishpatac ñucata alli ningui? Shucllami allica tiyan, chaica Taita Diosmi.

¹⁹ Mandashcacunapi ima shina nicuctaca, canllatac yachanguimi. Chaipica: ‘Ama huaclliringui, ama huañuchingui, ama shuhuangui, ama llullangui, ama umangui, cambac taita mamata c'uyangui’ nicunmi— nirca.

²⁰ Jesús chashna nicpimi, chai runaca: —Yachachic, tucui caicunataca huahuamanta pachami pactachicuni— nirca.

²¹ Chashna nicpimi, Jesusca chai runata c'uyailla ricushpaca: —Can chashna ruhuashca cashpapish, caitami ruhuanarac cangui: Cambac tucui ima charishcacunata c'atushpa, huacchacunaman cugri. Chashna cushpaca, jahua pachapica achcatami charingui. Chashna cushpaca, ñucata c'atingapac shamuilla— nirca.

²² Jesús chashna nicpi chai runaca mai chayuc cashcamantami, llaquilla tucushpa rircalla.

²³ Chaimanta Jesús muyundic gentecunata ricushpa, paipac yachacuccunamanca: —¡Chayuccunaca Taita Dios mandacucmanca mana utca yaicui pudingachu!— nirca.

²⁴ Chaita uyashpami yachacuccunaca munai mancharircacuna. Shina mancharicucpimi, Jesusca cutinllatac rimashpaca: —¡Huahuacunalla! Maijanpish ima charishcallapi shunguta churacca, Taita Dios mandacucmanca mana utca yaicui pudincunachu.

²⁵ Shuc chayuc runa Dios mandacucman yaicunapac randica, shuc camello*f** animalchari auja rinrita mana jarcarishpa pasarinmanlla— nirca.

²⁶ Shina nicpicarin, yachacuccunaca ashtahuan mancharishpami: —Shinashpaca, ¿pitac quishpiringayari?— nishpa, caishuc chaishuc tapunacurcacuna.

²⁷ Chashna mancharicpi Jesús paicunata ricushpaca: —Gentecunapac yuyaipica, maita mana quishpiripacchu, ashtahuanpish Taita Diosmanca imapish ruhuaipacllami— nirca.

²⁸ Chashna nicpi Pedroca: —Ñucanchicca tucui imalla charishcacunata saquishpami, cantaca c'aticunchic— nirca.

²⁹ Shina nicpi Jesusca: —Maijanpish quishpirinamanta alli huillaita chasquishcamanta ñucata c'atingaraicu huasita, huauquicunata, panicunata, taita mamata, huarmita, huahuacunata, allpata saquishpaca,

³⁰ cai pachapica pasac cutinhuanmi huasicunata, huauquicunata, panicunata, mamacunata, huahuacunata, allpacunatapish chasquinga. Chashnallatac ñucata c'aticushcamanta gentecuna p'iñashpa llaquichicpipish, shamuc punzhapica huiñai causaitami charinga. Chaica chashnatacmi canga.

³¹ Shina cacpipish achcacunami cunan alli nishcacunaca, yangalla cangacuna. Yangalla nishcacunaca, alli nishcami cangacuna— nirca.

Jesús cutin “ñucataca huañuchingacunami” nishcamanta

³² Jesusca Jerusalén puebloman ñanta ricushpaca, paipac yachacuccunapac ñaupatami ricurca. Paicunaca manchai manchaillami Jesustaca c'aticurcacuna. Chashna manchaihuan c'aticucpimi, Jesusca chai chunga ishcai yachacuccunallata c'ayashpa, pai ima tucunata cutin huillai callarirca:

³³ —Cunanca Jerusalenman ricushcataca, cancunallatac yachanguichicmi. Chaipimi Runa Tucungapac shamushca*f** ñucataca, curacunata mandac curacunapacmanpish, mandashcacunata yachachiccunapacmanpish japishpa apangacuna. Paicunaca ñucataca ‘huañunami cangui’ nishpami, mana israelcunaman*f** cungacuna.

³⁴ Paicunaca ñucata pucllashpa asingacunami, macangacunami, t'ucangacunami, huañuchingacunami. Chashna huañuchicpipish, quimsa punzhapica causarishallami— nirca.

Jacobopish, Juanpish mañashcamanta

³⁵ Chashna nishca q'uipami, Zebedeopac churicunapuramanta Jacobopish, Juanpish Jesuspacman cuchuyashpaca: —Yachachic, ¿ñucanchic mañashcata manachu ruhuanguiman?— nishpa tapurca.

³⁶ Shina nicpi Jesusca: —¿Imatatac ruhuachun ninguichic?— nirca.

³⁷ Chashna nicpi paicunaca: —Sumac mandanapi can tiyarishpaca, ¿manachu ñucanchictaca, shuctaca cambac alli maquiman, shuctaca cambac lluqui maquiman tiyachinguiman?— nircacuna.

³⁸ Shina nicpi Jesusca: —Cancunaca imata mañacushcataca mana yachanguichicchu. Jayacta ubiac shina, bautizaric shina llaquicunataca, ¿ñuca shina apai pudinguichicchu?— nirca.

³⁹ Chashna nicpi paicunaca: —Ari, chashna ruhuashunllami— nirca. Chashna nicpi Jesusca: —Ari, cancunaca jayacta ubiac shina, bautizaric shina llaquicunataca, ñuca shina apanguichicmi.

⁴⁰ Ashtahuanpish maijanta ñuca alli maquiman, lluqui maquiman tiyachinataca, Taita Diosmi maijanman allichishca cashpaca tiyachinga, ashtahuanpish mana ñucaca— nirca.

⁴¹ Jesús chashna nicta caishuc chunga yachacuccuna uyashpaca, Jacobohuanpish, Juanhuanpish p'iñarircacunami.

⁴² Chaimantami Jesusca paicunata c'ayashpa cashna nirca: —Cai pachapi mandaccunallami, paicunapac llactapi causaccunataca paicuna munashcata ruhuachishpa charincuna. Shinallatac mandaccunapurapipish, maijan ashtahuan jatun cashpaca, paicunatapish mandanllami. Chaitaca cancunallatac yachanguichicmi.

⁴³ Ashtahuanpish cancunapurapica, mana chashnachu cana canguichic. Maijanpish punta mandac casha nishpaca, caishuccunata servinami canguichic.

⁴⁴ Shinallatac cancunapurapi maijanpish punta mandangapac alli nishca casha nishpaca, caishuccunata servinami canguichic.

⁴⁵ Runa Tucungapac shamushca*f** ñucaca, mana servichingapacchu shamurcani, ashtahuanpish servingapac, shinallatac achcacunamanta huañushpa quishpichingapacmi shamurcani— nirca.

Ñahui mana ricuc Bartimeo runata Jesús alliyachishcamanta

⁴⁶ Chaimantaca Jericó pueblomanmi chayarcacuna. Jericomanta Jesusca paipac yachacuccunandic, caishuc achca gentecunandic llucshishpa ricucpica, paicuna rina ñanpimi Timeopac churi Bartimeo runa tiyacurca. Paica ñahui mana ricuc cashpami, imallatapish mañashpa tiyacurca.

⁴⁷ “Nazaret pueblomanta Jesusmi shamucun” nicta uyashpami, chai runaca: —Mandac Davidpac aillupuramanta Apunchic Jesús, ¡ñucataca llaquiyari!— nishpami, capari callarirca.

⁴⁸ Chashna caparicucpica: —¡Ama caparichu, upallai!— nishpami, achcacuna rimashpa jarcarcacuna. Paicuna chashna jarcacpipish, chai runaca: —Mandac Davidpac aillupuramanta Apunchic Jesús, ¡ñucata llaquiyari!— nishpa, ashtahuan caparirca.

⁴⁹ Chashna caparicucpimi, Jesús chaillapi shayarishpaca: —Paita c'ayamugrichic— nishpa cacharca. C'ayangapac riccuna chai runataca: —Jatari, ama manchaichu. Jesús c'ayacunmi— nircacuna.

⁵⁰ Chashna nicpimi, chai runaca pai pillurishcata chaillapi shitashpa, jatarishcahuan Jesuspacman chayarirca.

⁵¹ Chashna chayaricpi Jesusca: —¿Imatatac ruhuachun ningui?— nishpa tapurca. Shina nicpi chai ñahui mana ricuc runaca: —Yachichic, ñuca ñahuicunata alliyachishpa cui— nirca.

⁵² Shina nicpi Jesusca: —Ña rilla, ñuca alliyachinata crishcamantaca, ñami alliyashcangui— nirca. Chashna nicpi paipac ñahui ña ricucpica, Jesusta c'atishpa ñanta rircallami.