MARCOS 1 - Nuevo Testamento en Quichua Cañar 1996

Shitashca pambapi Bautizac Juan huillashcamanta

¹ Taita Diospac Churi Jesucristomanta alli huillanaca, cashnami callarin:

² Ñaupa punzhacunapi Diosmanta huillac Isaiasman quillcachishpaca, Taita Diosca cashnami nishca: “Ñucamanta huillactaca, Quishpichic shamuna ñanta allichichun nishpami, ñaupachishpa cachani.

³ Shitashca pambapi shuc caparishca uyarishpaca: ‘Quishpichic shamuna ñanta allichichic. Quingu ñancunatapish derechaichic’ ” nishcami.

⁴ Chai ñaupachishpa cachashca huillacca, Bautizac Juanmi carca. Paimi shitashca pambapi gentecunata bautizacurca. Shinallatac: —Cancunaca juchayuc cashcamanta llaquirishpa, Diosman cutirichic, bautizarichic. Chashna ruhuacpimi, Taita Diosca cancunapac juchacunata perdonanga— nishpami huillacurca.

⁵ Juanpacmanca Jerusalén pueblomantapish, Judea llactamantapish tucuimi pai huillashcata uyangapacca shamuccuna carca. Chai shamuccunataca llaquirishpa, juchacunata huillaccunatami Juanca, Jordán yacupi bautizarca.

⁶ Camello*f** animal millmamanta ruhuashca churanatami, Juanca churashca carca. Shinallatac cara chumbihuanmi chumbillishca carca. Paica langostacunata,*f** shinallatac bunga mishquitapish micucmi carca.

⁷ Juanca cashna nishpami huillarca: —Ñucapac q'uipa shamucca, ñucata yalli imatapish ruhuacllami canga. Shina cashcamanta ñucaca cumurishpa, paipac ushuta huatashcallatapish mana pascaipacmi cani.

⁸ Ñucaca cancunataca yacullahuanmi bautizani, ashtahuanpish ñucapac q'uipa shamucca, Diospac Espirituhuanmi cancunataca bautizanga— nirca.

Jesusta bautizashcamanta

⁹ Bautizac Juan huillacui punzhacunallatacmi, Jesusca Galilea llactapi cac Nazaret pueblomanta llucshishpa, Juanpacman shamurca. Chaipimi Juanca Jordán yacupi Jesustaca bautizarca.

¹⁰ Ña yacumanta llucshicushpami, Jesusca jahua pacha pascaricta, shinallatac Diospac Espíritu paloma shina paipac jahuaman uriyamucucta ricurca.

¹¹ Shinallatac jahua pachamanta rimashpaca: “Canmi ñuca c'uyashca Churica cangui. Canllami ñucataca cushichingui” nishcami uyarirca.

Jesusta diablo pandachisha nishcamanta

¹² Bautizashca q'uipaca, Diospac Espíritu rina yuyaita cucpimi, Jesusca shitashca pambaman rirca.

¹³ Chai sacha animalcunalla tiyac shitashca pambapi Jesús chuscu chunga punzhacunata cacpimi, Satanasca*f** caita chaita ruhuai nishpa, pandachisha nirca. Chaipica angelcunami Jesustaca servingapac shamurcacuna.

Galilea llactapi Jesús huillai callarishcamanta

¹⁴ Bautizac Juan carcelpi cacpimi, Jesusca Galilea llactaman chayashpa, Taita Dios mandacucmanta alli huillaita huillarca.

¹⁵ Chashna huillacushpaca: —Cunanmi, chai alli huillai punzhaca chayamushca. Taita Diosca ñami mandagrin. Cancunaca juchayuc cashcamanta llaquirishpa, Taita Diosman cutirishpa, alli huillaita crichic— nirca.

Pescadota japic chuscu runacunata Jesús c'ayashcamanta

¹⁶ Jesusca Galilea jatun cucha patata puricushpami, Simontapish, Simonpac huauqui Andrestapish ricurca. Paicunaca pescadota japiccuna cashpami, linchita yacupi shitacurcacuna.

¹⁷ Chaita ricushpami Jesusca: —Ñucahuan jacuchic. Cancunataca pescadota japiccuna shina, gentecunata Diospacman pushamuccuna cachun yachachisha— nirca.

¹⁸ Shina nicpica, linchicunata chai pambapi saquishpa, Jesusta c'atishpa rircacunallami.

¹⁹ Jesusca chaimanta ashtahuan chainicman rishpaca, Zebedeopac churicunatami Jacobotapish, Juantapish ricurca. Paicunaca canoapimi pescadota japina linchicuna lliquirishcata siracurcacuna.

²⁰ Paicunatapish Jesús c'ayacpica, paicunapac taita Zebedeotaca, paicunaman pescadota japic runacunandic chai canoapi saquishpa, Jesusta c'atishpa rircacunallami.

Supai japishca runata Jesús alliyachishcamanta

²¹ Chaimanta rishpaca, Capernaum pueblomanmi chayarcacuna. Chaipi cashpami, samana punzhapi*f** Jesusca israelcuna*f** tandanacuna huasiman yaicushpa yachachirca.

²² Jesusca mandashcacunata yachachiccuna shinallaca mana yachachircachu, ashtahuanpish paillatac mandac cashpami, allita yachachirca. Chaimantami tucui uyaccunaca mancharishpa, mana amirircacuna.

²³ Chai tandanacuna huasipica, supai japishca runami tiyacurca. Chai runa caparishpaca:

²⁴ —Nazaret pueblomanta Jesús, ¿ñucanchictaca imatatac nic shamunguiyari? ¿Canca ñucanchictaca llaquichingapacchu shamungui? Ñucaca canta ricsinimi. Canca Taita Dios cachashca Jucha Illacmi cangui— nirca.

²⁵ Chashna nicpi Jesusca: —¡Upallai, cai runamanta llucshi!— nishpami, sinchita rimarca.

²⁶ Chashna rimacpica, chai supaica chai runata munai chucchuchishpa, sinchita caparichishpami llucshishpa rircalla.

²⁷ Chashna tucucta ricushpaca, tucui gentecunami mancharinacushpa: “¿Caica imatac? ¿Mushuc yachachinatachu yachachicun, imami?” nishpa, caishuc chaishuc tapunacurcacuna. Shinallatac: “Llucshi nishpa pai mandacpica, millai supaicunapish cazushpa llucshinllami” nishpa ninacurcacuna

²⁸ Jesús chashna ruhuashcataca, Galilea llacta muyundicpi tucui causaccunaca manarac mashnapimi yachac chayarcacuna.

Pedropac suedrata Jesús alliyachishcamanta

²⁹ Tandanacuna huasimanta llucshishpaca, Jesusca Jacobohuan, Juanhuan, Simonpac, Andrespac huasimanmi rircacuna.

³⁰ Chai huasipica, Simonpac suedrami fiebrehuan ungushca, camapi carca. Chaitami Jesusmanca huillarcacuna.

³¹ Chashna huillacpi, Jesús chai ungushcapacman cuchuyashpa, maquimanta japishpa jatarichicpica alliyarcallami. Ña alliyashpaca, paicunaman micunata carai callarircallami.

Achca ungushcacunata Jesús alliyachishcamanta

³² Ña inti tigrashpa tutayamucucpica, tucui ungushcacunatapish, supai japishcacunatapish Jesuspacman pushamurcacunami.

³³ Chai pueblomantaca tucui gentecunami, Jesús tiyacuc huasi punguman tandanacumurcacuna.

³⁴ Chaipimi Jesusca ima ung:uihuan caccunatapish, achcacunata alliyachirca. Supai japishca caccunamantapish, supaicunata llucchishpa cacharcami. Jesusca pai pi cashcata supaicuna yachacpimi, ama imata rimarichun nirca.

Galilea llactapi Jesús huillashcamanta

³⁵ Jesusca manarac achicyamucpi, amsa amsapirac jatarishpami, chai pueblomanta llucshishpa, pipish mana causana pambapi Taita Diosman mañagrirca.

³⁶ Chashna ricpimi, Simonca paihuan caccunandic Jesustaca mashcagrircacuna.

³⁷ Jesús maipi cashcaman chayashpaca: —Tucui gentecunami cantaca mashcacun— nircacuna.

³⁸ Shina nicpi Jesusca: —Caishuc cuchulla llactacunamanpish jacuchic. Chaicunapipish ñucaca huillangapacmi shamurcani— nirca.

³⁹ Jesusca tucui Galilea llactata purishpami, israelcuna*f** tandanacuna huasicunapi huillarca. Shinallatac supai japishca gentecunamantapish, supaicunata llucchishpa cacharcami.

Lepra ung:uihuan cac runata Jesús alliyachishcamanta

⁴⁰ Lepra*f** ung:uihuan cac shuc runa Jesuspacman cuchuyashpa, paipac ñaupapi cungurishpaca: —Can ñucata alliyachisha nishpaca, alliyachinguimanllami— nishpa, mailla mañarca.

⁴¹ Shina nicpi Jesusca chai runata llaquishpami, maquihuan tuparishpaca: —Ari, alliyachisha ninimi, alliyai— nirca.

⁴² Chashna nicpi, lepra ung:uica chai ungushca runamanta anchurircallami.

⁴³ Chai alliyashca runata Jesús cachacushpaca, cutin cutin alli rimashpami:

⁴⁴ —Riqui, pi canta alliyachishcataca, pacta piman huillanguiman. Cunanca ri, Israel*f** curaman ricuchigri. Can alliyashcata paicuna ricuchunca, Taita Diosman cuna cashcata Moisés mandashca shinallatac cugringui— nirca.

⁴⁵ Ashtahuanpish chai runaca, ima shina alliyashcataca tucui gentecunamanmi parlarca. Chaimantami Jesusca mai pueblomanpish gentecuna ricucucpica mana yaicui pudishpa, maipi mana gente tiyaillapi puricurca. Jesús chaipi cacpipish, maimanta cashpapish paipacmanca shamurcacunallami.