SAN LUCAS 4 - Nuevo Testamento en Quichua Cañar 1996

Jesusta diablo pandachisha nishcamanta

¹ Jesusca Jordán yacupi bautizarishpaca, Diospac Espirituhuanmi cutirca. Shinallatac Diospac Espíritu rina yuyaillata cucpimi, shitashca pambaman rirca.

² Chaipi chuscu chunga punzhacunata cacpimi, supaicunata mandac Satanasca*f** Jesusta pandachisha rirca. Chai tucui punzhacunata mana micushca cashpami, Jesusca yarcachirca.

³ Chashna yarcaihuan cacpimi, Satanasca: —Can Diospac Churitac cashpaca, cai rumita tanda tucuchun niyari— nirca.

⁴ Chashna nicpi Jesusca: —Dios Quillcachishcapica: ‘Gentecunaca mana micunallahuanchu causanga’ ninmi— nirca.

⁵ Chashna nishca q'uipami, Satanasca jatun urcu jahuaman Jesusta pushashpa, shuc ñahui quimllaillapi cai pachapi tiyac tucui llactacunata ricuchirca.

⁶ Chashna ricuchishpaca: —Cai tucui sumac llactacunata mandanataca, ñucamanmi cushca. Chaimanta ñucaca piman cusha nishpapish cushallami.

⁷ Can ñucata cungurishpa ‘allimari cangui’ nicpica, tucui caicunata canman cushallami— nirca.

⁸ Chashna nicpimi Jesusca: —Dios Quillcachishcapica: ‘Canta Mandac Diosllata “allimari cangui” ningui, paillata servingui’ ninmi— nirca.

⁹ Chashna nishca q'uipami, cutin Satanasca Jesusta Jerusalén puebloman pushashpa, Diosman mañana huasi jahuapi churashpaca: —Can Diospac Churitac cashpaca, caimanta shitari.

¹⁰ Dios Quillcachishcapica: ‘Ama huactarichunca, Taita Diosca paipac angelcunata jarcachun cachangami.

¹¹ Can ama chaquillatapish rumipi chugririchunca, paicunami maquipi chasquinga’ ninmi— nirca.

¹² Shina nicpi Jesusca: —Chashnallatac Dios quillcachishcapica: ‘Canta Mandac Taita Diostaca, ama caita chaita ruhuai nichun’ nicunmi— nirca.

¹³ Satanasca Jesusta pandachisha nicushpapish mana pudishpaca, asha punzhacunacaman saquishpa rircami.

Galilea llactapi Jesús huillai callarishcamanta

¹⁴ Jesusca Diospac Espirituhuan cashpami, Galilea llactamanca imatapish ruhuaipaclla cutirca. Paimantaca tucui chai llactapi causaccunami parlanacurcacuna.

¹⁵ Jesusca israelcuna*f** tandanacuna huasicunapipish yachachircallami. Chashna yachachicpimi, tucui gentecuna paitaca “allitami yachachicun” nircacuna.

Nazaret pueblopi Jesusta mana crishcamanta

¹⁶ Chai q'uipami Jesusca pai huiñashca Nazaret pueblomanca rirca. Samana punzhapi*f** israelcuna*f** tandanacuna huasiman ric cashca shinallatac, chai punzhaca tandanacuna huasiman yaicurca. Chaipimi Dios quillcachishcata rizangapac shayarirca.

¹⁷ Pai rizachunca, Diosmanta ñaupa huillac Isaías quillcashcatami curcacuna. Chaita pascashpa ricushpaca, cashna nishcatami tarirca:

¹⁸ “Ñucaca Diospac Espirituhuanmi cani. Taita Diosca ñucata acllashpaca, llaquilla causac huacchacunaman alli huillaita huillachun, shungupi llaquirishpa causaccunatapish alliyachichunmi cacharca. Prezu caccunamanpish, ña chaimanta llucshina tiyashcata huillachun, ñahui mana ricuccunata ricucta ruhuachun, llaquichishca causacuccunata llaquimanta cacharichichunpish cacharcami.

¹⁹ Chashnallatac Taita Dios quishpichina punzha chayamushcata huillachunmi, ñucataca cacharca” nishcatami rizarca.

²⁰ Chaita rizashpa huillashca q'uipaca, quillcashcata huichcashpami, tandanacuna huasita cuidac runaman cushpa tiyarirca. Chai huasipi tucui caccunaca Jesusta ricuracurcacunami.

²¹ Chashna ricuracucpimi Jesusca: —Cunan punzhallatacmi, cancuna uyashca quillca pactashcataca ricucunguichic— nirca.

²² Shina sumacta rimashcamantami, tucui chaita uyaccunaca mana amirishpa, Jesustaca alli nircacuna. Chashna nicushpapish: —¿Caica manachu Josepac churi?— nircacuna.

²³ Chashna nicucpimi Jesusca: —Maijancuna nic shinaca: ‘Jambic runa canllatac jambiri’ nic shinachari nicunguichic. Shinallatac Capernaum pueblopi ñuca imalla ruhuashcacunata cancuna uyashcamantaca: ‘Cai can huiñashca llactapipish chashnallatac ruhuaiyari’ nicunguichicmi— nirca.

²⁴ Jesusca caitapish nircami: —Diosmanta huillactaca, paipac quiquin llactapi causaccunallatacmi mana uyashun nincuna. Chaica chashnatacmi can.

²⁵ Cai Israel*f** llactapica, ñaupa huillac Elías huillacui punzhacunapica achca viuda huarmicunami tiyarca. Chai huatacunapica, quimsa huata sucta quillata mana tamiacpi, tucui llactacunapimi yarcai tiyarca, chashnami tucurca.

²⁶ Chashna cacpipish Taita Diosca israelcunapurapi tiyac viuda huarmicunapacmanca, maijanpacmanpish Eliastaca mana cacharcachu, ashtahuanpish Sidón pueblo cuchullapi tiyac Sarepta pueblopi causac viuda huarmipacllamanmi cacharca.

²⁷ Shinallatac ñaupa huillac Eliseo huillacui punzhacunapipish, israelcunapurapica lepra*f** ung:uihuan ungushcacunaca achcacunami tiyarca. Eliseoca chai ungushcacunataca shucllatapish mana alliyachircachu, ashtahuanpish Siria llactamanta Naamán shuti runallatami alliyachirca— nirca.

²⁸ Jesús chashna nicpimi, tucui chai tandanacuna huasipi caccunaca munai p'iñarircacuna.

²⁹ Chashna p'iñarishpaca huaica jatarishpami, Jesusta chai pueblomanta llucchishpa, ucu huaicuta shitangapac aparcacuna. Chai puebloca urcu jahuapimi carca.

³⁰ Chashna apacucpipish, Jesusca paicunapac chaupillatatac rircallami.

Supai japishca runata Jesús alliyachishcamanta

³¹ Chai q'uipami Jesusca Galilea llactapi tiyac Capernaum puebloman rirca. Chaipimi samana punzhacunapi*f** gentecunaman yachachirca.

³² Paillatac mandac cashpa allita yachachicpimi, tucui uyaccunaca munai mana amirircacuna.

³³ Israelcuna*f** tandanacuna huasi ucupica, supai japishca runami tiyacurca. Chai runaca supai japishca cashcamantami sinchita caparishpa:

³⁴ —Nazaret pueblomanta Jesús, ¿canca imatatac ñucanchictaca nic shamungui? ¿Llaquichingapacchu shamungui, imatacyari? ¡Ñucanchictaca ama imata ruhuaichu! Ñucaca canta ricsinimi. Canca Dios cachashca Jucha Illacmi cangui— nirca.

³⁵ Chashna nicpi Jesusca: —¡Upallai, cai runamanta llucshi!— nishpa sinchita rimacpimi, supaica chai runata tucuipac ñaupapi pambaman shitashpa, imata mana ruhuashpa, llucshishpa rircalla.

³⁶ Jesús chashna ruhuacpi, tucui chaipi caccunaca: —Cai runaca, ¿ima shinatac chashna rimarinchu, imatacyari? Supaicunatapish rimashpalla, llucchishpa cachanlla— nishpami mancharircacuna.

³⁷ Jesús chashna ruhuashcataca, tucui chai llacta muyundicpi causaccunami parlanacushpa, caishuc chaishuc yachanacurcacuna.

Pedropac suedrata Jesús alliyachishcamanta

³⁸ Jesusca chai tandanacuna huasimanta llucshishpaca, Simonpac huasimanmi yaicurca. Chai huasipica, Simonpac suedrami fiebrehuan ancha ungushca carca. Chashna ungushca cacpimi, Jesusmanca “alliyachishpa cui” nishpa mañarcacuna.

³⁹ Jesusca chai ungushcapacman cuchuyashpa cumurishpami, chai ung:uitaca “anchuri” nishpa rimarca. Chai ung:ui anchuricpica, ña alliyashpa, paicunaman micunata carai callarircallami.

Achca ungushcacunata Jesús alliyachishcamanta

⁴⁰ Ña inti tigracucpimi, tucui laya ung:uicunahuan cac gentecunata Jesuspacman apamurcacuna. Chashna apamucpimi, Jesusca chai tucui ungushcacunapac uma jahuapi maquita churashpa alliyachirca.

⁴¹ Chai ungushcacunamantaca, achcacunamantami supaicunaca llucshirca. Chai supaicuna llucshishpaca: —¡Canca Diospac Churimi cangui!— nishpami caparircacuna. Chashna caparicucpimi Jesusca: —¡Upallaichic!— nirca. Quishpichic Cristo cashcata yachashcamantami, supaicunataca mana imata rimachun saquirca.

Galilea llactapi Jesús huillashcamanta

⁴² Jesusca tutamanta ña achicyamucucpimi, pai maipi cashca pueblomanta llucshishpa, pipish mana causana pambaman rirca. Chashna ricpica, tucui gentecunami Jesusta mashcashpa, pai maipi cashcaman chayarcacuna. Chashna tarishpaca, ama maiman richun nishpami, Jesustaca jarcanata munarcacuna.

⁴³ Ashtahuanpish Jesusca: —Ñucaca Taita Dios mandacucmanta alli huillaitaca, shuc pueblocunapipish huillagrinami cani. Ñucataca chashna huillachunmi, Taita Diosca cacharca— nirca.

⁴⁴ Jesusca chashnami Galilea llactapi tiyac tandanacuna huasicunapi huillashpa purirca.