SAN LUCAS 23 - Nuevo Testamento en Quichua Cañar 1996

Mandac Pilatopac ñaupaman Jesusta apashcamanta

¹ Chaimantaca tucui chaipi caccuna huaica jatarishpami, Jesustaca mandac Pilatopacman aparcacuna.

² Paipac ñaupapica Jesustaca juchanchishpami: —Cai runaca ñucanchic israelcunata*f** mana allita ruhuachicuctami japircanchic. Paica: ‘Jatun Mandac Quishpichic Cristomi cani’ ninmi. Shinallatac jatun mandac Cesarman*f** pagana impuestotapish ama pagachun ninmi— nircacuna.

³ Chashna nicpimi Pilatoca: —¿Canchu israelcunata Jatun Mandac cangui?— nishpa tapurca. Shina nicpimi, Jesusca: —Ari, ña canllatac ninguimi— nirca.

⁴ Shina nicpi Pilatoca curacunata mandac curacunatapish, chaipi cac tucui gentecunatapish: —Cai runapica, imapish mana alli ruhuashcataca mana tarinichu— nirca.

⁵ Chashna nicpica, ashtahuanmi juchanchishpa tucui chaipi caccunaca: —Paica Galilea llactamanta callarishpa, tucui cai Judea llactacunata purishpa, gentecunaman mana allita yachachishpami, p'iñanacuipi churacun— nircacuna.

Mandac Herodespacman Jesusta apashcamanta

⁶ “Galilea” nicta Pilato uyashpaca: —Shinashpaca cai runaca, ¿Galilea llactamantachu?— nishpami tapurca.

⁷ Chashna tapucpica: —Ari, Galilea llactamantami— nircacuna. Shina nicpimi, Jesustaca Galilea llactata mandac Herodespacman cacharca. Chai punzhacunapica, Herodespish Jerusalenllapitacmi carca.

⁸ Herodesca ñaupamanmi: “Jesusca pi mana ruhuaipaccunatami ruhuan” nishcata uyashca carca. Chaimanta ña Jesusta ricushpaca, munai cushicushpa: “Cunanca pi mana ruhuaipacta ruhuacta ricushami” nirca.

⁹ Shina cashcamantami Herodesca caita chaita tapurca. Chashna tapucpipish, Jesusca imata mana nircachu.

¹⁰ Curacunata mandac curacunapish, mandashcacunata yachachiccunapish chaillapitacmi carcacuna. Paicunaca caita chaita nishpami, Jesustaca munai juchanchircacuna.

¹¹ Chai q'uipami Herodespish, paipac soldadocunapish Jesustaca p'iñashpa pucllashpa, jatun mandacman shina alli sumac churanata p'achallichirca. Chashna p'achallichishpaca, cutinllatacmi Pilatopacman cutichishpa cacharca.

¹² Chai punzhamantami Pilatoca Herodeshuan alli tucurcacuna. Ñaupamanca p'iñanacushcami carcacuna.

Jesusta “huañunami cangui” nishcamanta

¹³ Shina paipacman cachacpimi, curacunata mandac curacunatapish, llactata mandaccunatapish, tucui chaipi cac gentecunatapish tandachishpa,

¹⁴ Pilatoca: —‘Gentecunata mana allita ruhuachicun’ nishpami, cancunaca cai runataca juchanchishpa apamushcanguichic. Shina nicucpipish, cancunapac ñaupapi tapushpaca, cancuna juchanchishca shina ima mana allitaca mana tarinichu.

¹⁵ Paita huañuchichunca, ima mana allitaca mana ruhuashcachu. Chaimantami Herodespish ima mana alli juchanchipactaca mana tarishpa, ñucanchicpacmanca cutichishpa cachashca.

¹⁶ Chaimanta paitaca macachishpallami cacharigrini— nirca.

¹⁷ Pilatoca pascua*f** punzhapica prezucunamanta shucta cachariclla cashcamantami, maijantapish cacharina carca.

¹⁸ Ashtahuanpish chaipi caccunaca tucuimi: —¡Jesustaca huañuchilla! ¡Barrabastami cacharichun ninchic!— nishpa caparircacuna.

¹⁹ Chai Barrabás runataca, chai pueblopura macanacuchingapac jatarichishcamantapish, shinallatac huañuchishcamantapishmi carcelpi churashca carca.

²⁰ Pilatoca Jesusta cacharina yuyaihuan cashpami, gentecunamanca cutin tapurca.

²¹ Shina tapucpipish tucuimi: —¡Chacatailla, chacatailla!— nishpa, ashtahuan caparircacuna.

²² Chashna caparicucpipish, Pilatoca caihuanca quimsa cutinmi: —¿Ima mana allitatac ruhuashcayari? Paita huañuchingapacca, ima mana allita mana tarinichu. Paitaca macachishpallami cacharigrini— nirca.

²³ Chashna nicpipish: —¡Chacatashpa huañuchilla!— nishpa, ashtahuan caparicushpallami, paicuna munashcata pactachircacuna.

²⁴ Pilatoca paicuna munashcata pactachishpami, Jesustaca: “Huañunami cangui” nishpa, mana cacharirca.

²⁵ Chai pueblopura macanacuchingapac jatarichic cashcamantapish, shinallatac huañuchishcamantapish prezu charicushca runatami, paicuna mañashca shinallatac cacharirca, ashtahuanpish Jesustaca paicuna munashca shina chacatachunmi curca.

Jesusta cruzpi chacatashcamanta

²⁶ Jesusta chacatangapac ña apacushpami, chagramanta shamucuc Cirene pueblomanta Simón runata japircacuna. Paitaca Jesuspac huashata cruzta apachishpami pusharcacuna.

²⁷ Chashna pushashpa ricucpica, achcacunami c'aticurcacuna. Achca huarmicunapish Jesusta llaquishcamanta caparishpa, huacashpami c'aticurcacuna.

²⁸ Chai huacacuc huarmicunata Jesús tigraricushpa ricushpaca: —Jerusalenpi causac huarmicunalla, ama ñucamantaca huacaichicchu, ashtahuanpish cancunallamantatac, cancunapac huahuacunamantapish huacaichic.

²⁹ ‘Huahuata charisha nishpa, mana huahuata charic huarmicunapish, manarac huicsayuc tucuccunapish, shinallatac chuchuchiccunapish cushicuichic’ nina punzhacuna chayamungami.

³⁰ Chai punzhacuna chayamucpica, huañusha nishpami gentecunaca urcucunatapish, lomacunatapish: ‘Urmashpa pacaichicyari’ ningacuna.

³¹ Ñuca verde yura shina cacpipish cashna ruhuashpaca, cancuna chaquishca yura shina cactacarin, ¿imatachari ruhuangacuna?— nirca.

³² Jesusta chacatashpa huañuchingapacca, ishcai huañuchic millai runacunatapish chacatangapac aparcacunami.

³³ Ña Uma Tullu nishca urcuman chayashpaca, Jesusta chacatarcacunami. Shinallatac chai ishcai huañuchiccunatapish, shuctaca alli maquiman, shuctaca lluqui maquiman chacatarcacunami.

³⁴ Chashna chacatacpipish Jesusca: —Ñuca Taitalla, perdonai. Cai gentecunaca ima ruhuacushcata mana yachancunachu— nirca. Cutin soldadocunaca Jesuspac churanacunata japinacungapacca, suertetami ruhuarcacuna.

³⁵ Tucui chaipi cac gentecunami Jesustaca chaparacurcacuna. Mandaccunapish burlashpami: —Paica shuccunata quishpichic cashca jahuachu, paillatacca mana quishpirin. Taita Dios cachashca Quishpichic Cristo cashpaca, paillatac quishpirinmanmi— nircacuna.

³⁶ Soldadocunapish Jesustaca: “Mandacmi cangui” nic tucushpami, jayac vinota ubiachishun nircacuna.

³⁷ Chashna ruhuashpaca: —¡Canca israelcunata*f** Jatun Mandac cashpaca, canllatac quishpiriyari!— nircacuna.

³⁸ Jesusta chacatashca uma jahua caspipica, griego*f** rimaipi, latín*f** rimaipi, hebreo*f** rimaipi: “Caica Israelcunata Jatun Mandacmi” nishpa, quillcashca tiyacurca.

³⁹ Shuc huañuchic runaca chacatashca cashpapish Jesustaca: —¡Can Quishpichic Cristo cashpaca, canllatac quishpirishpa, ñucanchictapish quishpichiyari!— nishpami rimarca.

⁴⁰ Shina nicpica, caishuc huañuchic runaca: —Canpish pai shinallatac llaquita apacushpapish, ¿manachu Diostaca manchangui?

⁴¹ Ñucanchicca millaita ruhuashcamanta llaquita apana cashcamantami, cashna llaquita apacunchic, ashtahuanpish cai runaca ima millaita mana ruhuashcachu— nirca.

⁴² Shina nishpami chai runaca: —Can mandangapac shamushpaca, ñucataca yuyaringuiyari— nirca.

⁴³ Chashna nicpimi Jesusca: —Cunanllatacmi jahua pacha sumac llactapica ñucahuan cagringui. Chaica chashnatacmi canga— nirca.

Jesús huañushcamanta

⁴⁴ Ña chaupi punzhamanta quimsa horas chishicamanmi, tucui cai pachaca amsayarca.

⁴⁵ Intipish mana achicyachircachu. Diosman mañana huasi ucupi cac jarcachishca jatun liensopish, jahuamanta uraiman chaupitami lliquirirca.

⁴⁶ Chashna tucushca q'uipami, Jesusca sinchita caparishpa: —Taitalla, cambac maquipimi ñuca espirituta mingani— nirca. Shina nishpaca huañurcallami.

⁴⁷ Mandac soldado chai tucuita ricushpaca, Taita Diosta “allimari cangui” nishpami: —Cai runaca allita ruhuactacmi cashca— nirca.

⁴⁸ Tucui chaipi cac gentecunapish chai tucuita ricushpaca, manchaihuan shungupi huactarishpami, chaimantaca cutircacuna.

⁴⁹ Jesuspac tucui ricsishcacunapish, Galilea llactamanta Jesushuan shamuc huarmicunapish carullapi shayashpami, chai tucuitaca ricucurcacuna.

Jesusta enterrashcamanta

⁵⁰ Chai punzhacunallapitacmi Judea llactapi tiyac Arimatea pueblomanta, Taita Diosta alli cazuc, shinallatac gentecunapacpish alli nishca José runa causarca. Paica israelcunata*f** mandaccunapuralla tandanacushcapuramantami carca.

⁵¹ Mandaccunapura cashpapish, paicunapura yuyarinacushpa Jesusta japichishcaca mana allichu nishpami yuyacurca. Paica Taita Dios mandacucta ricusha nishpami shuyacurca.

⁵² Chai Josemi Pilatopacman rishpa, Jesuspac cuerpota enterrangapac mañagrirca.

⁵³ Chaimantaca Jesuspac cuerpota cruzmanta uricuchishpa liensohuan pillushpami, shuc jatun rumi quinraipi jutcushca sepulturapi churarca. Chaipica pitapish manarac enterrashcami carca.

⁵⁴ Chashna ruhuacucpica, samana punzhapac*f** allichirina punzhaca ñami chishiyacurca.

⁵⁵ Galilea llactamanta Jesushuan shamushca huarmicunapish Joseta c'atishpa rishpami, Jesuspac cuerpota ima shina sepulturapi churacta ricucurcacuna.

⁵⁶ Chai huarmicunaca ña huasiman cutimushpaca, sumac mishquilla ashnacuccunata Jesuspac cuerpopi churangapacmi allichircacuna. Samana punzha ña chayamucpica, mandashcapi nishca shinami samarircacuna.