SAN LUCAS 21 - Nuevo Testamento en Quichua Cañar 1996

Shuc huaccha viuda huarmi cullquita Diosman churashcamanta

¹ Diosman mañana huasipi chayuccuna Taita Diosman cullquita cushpa, churanapi churacuctami Jesusca ricurca.

² Shinallatac shuc huaccha viuda huarmipish, ishcai ashalla valic cullquita churacuctami ricurca.

³ Chashna ricushpami, yachacuccunaman Jesusca: —Cai huaccha viuda huarmimi, caishuccuna cushcata yalli Taita Diosmanca cushca. Chaica chashnatacmi.

⁴ Caipi cunan churacuc chayuccunaca puchushcallatami churashcacuna, ashtahuanpish cai huarmica paipac causaipac ashallata charishpapish, Taita Diosmanca tucuimi churashca— nirca.

“Diosman mañana huasitaca urmachishcami canga” nishpa, Jesús huillashcamanta

⁵ Chai q'uipaca tauca runacunami: “Cai Diosman mañana huasica sumac rumicunahuan ruhuashca, Diosman cushca cullquihuanpish, curihuanpish sumactami allichishca” nishpa parlanacurcacuna.

⁶ Chashna parlanacucpimi Jesusca: —Cunan cancuna ricucushcaca, shuc rumillapish mana pircashca saquirina punzhacunami chayamucun— nirca.

Cai pacha manarac tucuricpi llaquicuna tiyanamanta

⁷ Chashna nicpimi yachacuccunaca: —Yachachic, ¿ima punzhatac chashnaca tucungayari? Ña chashna tucungapacca, ¿imacunatac ricuringayari?— nishpa tapurcacuna.

⁸ Shina tapucpimi Jesusca: —Achcacunami ñuca shutipi shamushpa: ‘Ñucami Quishpichic Cristoca cani’ ningacuna. Shinallatac: ‘Cunanmi pai cutimuna punzhaca chayamun’ ningacunami. Shina pandachisha nicucpipish, cancunaca pacta c'atinguichicman, ashtahuanpish alli yuyaihuan puringuichic.

⁹ Cancunaca ‘llactapura ñami macanacugricuncuna, shinallatac shuc llactacunapica ñami macanacucun’ nicta uyashpapish, ama mancharinguichicchu. Chai llaquicunaca cai pacha manarac tucuricpi tiyanallatacmi can. Chashna tucucpipish, cai pachaca manarac tucuringachu— nirca.

¹⁰ Jesusca caitapish nircami: —Shuc llactapi causaccunaca, caishuc llactapi causaccunahuanmi macanacungacuna. Shinallatac llactacunata mandaccunapurapish macanacuchingacunami.

¹¹ Mai llactacunapica, allpa chucchushpa llaquichingami. Ima mana p'ucucpi yarcaipish, ung:uicunapish tiyangami. Shinallatac jahua cielopica, jaicapi mana ricushcacuna ricurishpapish manchachingami.

¹² Manarac chashna tucucpimi, cancuna ñucata c'aticushcamantaca p'iñashpa, mana ricunachishpa japingacuna. Cancunataca juchanchishpami, tandanacuna huasicunaman tapungapac apangacuna. Carcelpipish churangacunami. Shinallatac llactacunata jatun mandaccunapacmanpish, quiquin llactata mandaccunapacmanpish apangacunami.

¹³ Chashna cancunata apacpica, paicunamanpish ñucamanta huillanguichicmi.

¹⁴ Paicunapac ñaupapica: ‘¿Imatashi nishun?’ nishpa, ama chai yuyailla canguichicchu.

¹⁵ Ñucallatacmi cancunamanca imata rimana alli yuyaicunata cusha. Chashna allita rimacpica, cancunata p'iñaccunaca mana imata ni pudishpa, upalla saquiringacunallami.

¹⁶ Cancunataca alli ricsishcacunallatac, quiquin huasi ucupurallatac, huauquicunallatac, taita mamacunacamanmi huañuchichun japichingacuna. Chashna japichicpica, maijan cancunataca huañuchingacunami.

¹⁷ Ñucata c'aticushcamantami, cancunataca tucui gentecuna p'iñashpa mana ricunachingacuna.

¹⁸ Chashna cacpipish cancunapac shuc uma acchallapish mana chingaringachu.

¹⁹ Chashna llaquichicucpipish, tucui shunguhuan c'atirashpami quishpiringuichic.

²⁰ Cai Jerusalén pueblota achca soldadocuna muyundic shayacucta ricushpaca, ña tucui chingachishca cashca shinata yachanguichic.

²¹ Chashna tucugricpica, Judea llactapi caccunaca urcucunapi miticugrichun. Jerusalenpi caccunapish llucshishpa richun. Shinallatac chagrapi caccunapish ama cutimuchun.

²² Chai punzhacunaca, Taita Dios llaquichina punzhacunami canga. Dios quillcachishcapi tucui ima nishcacunaca chai punzhacunapimi pactanga.

²³ Chai punzhacunapi Taita Dios cai llactapi causaccunata p'iñarishpa llaquichicpica, munai llaqui huacaimi tiyanga. Chaipica huicsa junda huarmicunapish, chuchucuc huahuayuc huarmicunapish, ¡aij, imachari tucungacuna!

²⁴ Chai punzhacunapica maijancunataca macanacuipi espadahuanmi huañuchingacuna. Maijancunataca huatashpami, tucui llactacunaman prezu apangacuna. Taita Dios llaquichichun saquishca punzhacuna pactangacamanmi, Jerusalenpi causaccunataca mana israelcunaca*f** paicuna munashcata ruhuashpa llaquichingacuna.

Apunchic Jesús ima shina cutimunamanta

²⁵ Chai q'uipaca intipipish, quillapipish, shinallatac lucerocunapipish jaicapi mana ricushcacunami ricuringa. Cutin cai pacha llactacunapi causaccunaca mama cucha yacucuna caiman chaiman cuyurishpa huajiacta ricushpaca, mancharinacushpami yuyaita chingachingacuna.

²⁶ Cai pachapi chashna mai llaquicuna c'atipi shamucpi, shinallatac jahua cielopi imalla tiyaccunapish chucchucpicarin, gentecunaca ashtahuanmi mancharishpa, yuyaita chingachingacuna.

²⁷ Chashna tucucpica, Runa Tucungapac shamushca*f** ñucataca tucui imatapish ruhuaclla, sumaimana achiclla cashcahuan achicyachishpa, p'uyupi shamucuctami ricungacuna.

²⁸ Chai tucui llaquicuna callaricpica, Taita Dios cancunata ña quishpichigricushcatami yachanguichic. Chaimanta cancunaca ñahuita huichaiman churashpa chaparacuc shina, cushicuihuan chaparacuichic— nirca.

²⁹ Cai yuyaita japina parlohuanpish Jesusca cashnami parlarca: —Cancunaca higo yurata, mana cashpaca ima yuracunatapish ricushpa alli yuyarichic.

³⁰ Chai yuracunapi p'angacuna ña jundarimucta ricushpaca, ña usiai punzhacuna chayamucushcatami cancunallatac yachanguichic.

³¹ Chai shinallatacmi ñuca huillashcacuna chashna ña pactamucucta ricushpaca, Taita Dios mandana punzhacuna ña chayamucushcata yachanguichic.

³² Cunan punzha causaccuna manarac huañucpimi, cai ñuca huillashcacunaca tucui pactanga, chashnami canga.

³³ Cai pachapish, jahua pachapish tucuringami. Chashna tucucpipish, ñuca huillashcacunaca pactacungallami.

³⁴ Cancunallatac alli yuyarichic. Pacta machanallapi, micunallapi, cai pachapi imatapish charinallapi cancunapac shunguta churashpa causacunguichicman. Chashna causacucpica, pacta cancuna mana yuyashca horas chai punzhaca chayamunman.

³⁵ Tucui cai pachapi causaccunataca, shuc tucllahuan japic shinami chai punzhaca chayamunga.

³⁶ Chashna tucuna cashcamanta cancunaca allichirishca, ña rinallami cana canguichic. Chai tucui llaqui japinamanta quishpiringapacca, Runa Tucungapac shamushca ñucapac ñaupapi alli ricuringapacpish, Taita Diosman mañaracuichiclla— nirca.

³⁷ Punzhaca Diosman mañana huasipimi Jesusca yachachic carca. Tutaca Olivos urcumanmi ric carca.

³⁸ Jesús imalla yachachishcata uyashun nishpami, gentecunaca utca jatarishpa, Diosman mañana huasiman shamuc carcacuna.