SAN LUCAS 2 - Nuevo Testamento en Quichua Cañar 1996

Jesús huacharishcamanta

¹ Chai punzhacunapica Roma*f** llactata jatun mandac Augustomi, tucui pai mandacuc llactacunapi causaccunata paicunapac shuticunata quillcachichun huillachirca.

² Shuticunata quillcachinaca, Cirenio runa Siria llactata mandacucpimi callarirca.

³ Tucui gentecunami paicunapac ñaupa taitacuna maipi causashca llactapi, quiquinpac shuticunataca quillcachigrina carca.

⁴ Chaimantami Josepish Galilea llactapi tiyac Nazaret pueblomanta llucshishpa, Judea llactapi cac Belén puebloman rirca. Chai pueblopimi ñaupa mandac Davidca huacharishca carca. Joseca Davidpac huahua huahuapura cashcamantami, chai Belén pueblomanca rirca.

⁵ Chai pueblomanca paihuan cazarangapac ari ninacushca Mariahuanmi, paicunapac shuticunata quillcachingapac rircacuna. Mariaca huicsa jundami carca.

⁶ Paicuna Belenman ña chayacpimi, María sajuarinaca pactarca.

⁷ Pozana huasi mana pactashcamantami, paipac punta c'ari huahuataca huagracuna shayana ucullapi sajuarirca. Chai huahuataca maitushpa, ucsha jahuallapimi sirichirca.

Angelcuna michiccunaman huillashcamanta

⁸ Chai Belén pueblo cuchullapica, michiccunami paicunapac ovejacunata tuta cuidacurcacuna.

⁹ Chashna cuidacucpimi, Taita Dios cachashca angelca Diospac sumaimana achiclla cashcahuan ñapish cungailla ricurishpa, tucui paicunapac muyundicta achicyachirca. Chashna ricuricpimi, michiccunaca munai mancharircacuna.

¹⁰ Shina mancharicucpimi, angelca cashna nirca: —Ama mancharichicchu. Ñucaca cancunamanca alli huillaitami huillac shamuni. Cai huillashcata uyashpaca, tucuimi cushicungacuna.

¹¹ Cunanmi David huacharishca Belén pueblopica, gentecunata Quishpichic huacharishca. Paimi tucuita Mandac, Quishpichic Cristo.

¹² Cunan cancuna rishpaca, huagracuna shayana ucupi maitushca huahua ucsha jahuapi siricuctami ricunguichic. Chashna ricushpami, paitaca ricsinguichic— nirca.

¹³ Chashna huillacucllapitacmi, ñapish jahua pacha achca angelcuna chai huillacuc angelhuan tucushpaca, Taita Diosta alli nishpaca:

¹⁴ “Jahua pachapi cac Taita Dioslla, ¡cantaca tucui alli nichun! Cai pachapipish can c'uyashca causaccunaca, ¡sumac causaita charichun!” nircacuna.

¹⁵ Chashna nishpa, angelcuna jahua pachaman rishca q'uipaca, michiccunaca caishuc chaishucmi: —Shinashpaca, Taita Dios huillashca imalla tucushcata ricungapac, Belenman jacuchic— ninacurcacuna.

¹⁶ Chashna ninacushcahuan huahuata mashcangapac rishpaca, huagracuna shayana ucupimi Josetaca Mariandic, shinallatac ucsha jahuapi siricuc huahuatapish tarircacuna.

¹⁷ Ña huahuata ricushpaca, ángel chai huahuamanta ima shina paicunaman nishca shinallatacmi parlarcacuna.

¹⁸ Michiccuna chashna parlacpica, tucui uyaccunami munai mana amirishpa saquirircacuna.

¹⁹ Ashtahuanpish Mariaca, chai tucui imalla tucushcataca paipac shungupi huacaichishpa, yuyaipi charicurcallami.

²⁰ Chai michiccunaca paicunaman huillashca shinallatac tucucta ricushpa uyashpaca, Taita Diosta “allimari cangui, sumacmari cangui” nishpami cutircacuna.

Diosman mañana huasiman huahua Jesusta apashcamanta

²¹ Ña pusac punzha tucucpica, chai huahuata circuncisionta*f** ruhuachircacunami. Chaimantaca María manarac huicsayuc cacpi, ángel huillashca shutitami JESÚS nishpa shutichircacuna.

²² Sajuarishca q'uipaca, chuyayashpa Diospac ñaupapi alli ricurina cashcamanta, Moisés mandashca shinallatacmi ruhuarcacuna. Chai q'uipaca, huahua Jesusta Taita Diosman ricuchigrina cashcamantami, Jerusalenman apashpa rircacuna.

²³ Taita Dios mandashcacunapica: “Tucui punta huacharishca c'ari huahuacunaca, Diospaclla cachun ch'icanyachishcami canga” nishcata pactachingapacmi, chashna ruhuarcacuna.

²⁴ Chashnallatac Taita Dios mandashcacunapica: “Ishcai urpita cashpa, ishcai huahua palomata cashpapish cungui” nishcata pactachingapacmi aparcacuna.

²⁵ Chai punzhacunallapitacmi, Simeón runaca Jerusalenpi causacurca. Paica Diosta manchac, paita cazuc cashpami, israelcunata*f** Taita Dios quishpichingapac shamucta shuyacurca. Simeonca Diospac Espirituhuanmi carca.

²⁶ Diospac Espiritullatacmi: “Taita Dios cachashca Quishpichic Cristota ricungacaman, canca mana huañunguichu” nishca carca.

²⁷ Simeonca Diospac Espíritu yuyaita cucpimi, Diosman mañana huasiman rirca. Pai chaipi cacpimi, mandashcacunapi nishca shina ruhuangapac, taita mamaca Diosman mañana huasiman huahua Jesushuan chayarcacuna.

²⁸ Simeonca chai huahuata marcashpaca, Diosta pagui nishpami cashna nirca:

²⁹ “Taita Dioslla, can cusha nishcataca ñami pactachishcangui. Cambacta ruhuac ñucataca, ña cunanca cushicuihuan huañuchun saquilla.

³⁰ Can cachashca Quishpichictaca, ñuca ñahuihuantacmi ña ricushcani.

³¹ Paitaca tucui llactacunapi causac gentecuna ricuchun cachashcanguimi.

³² Mana Israelpura*f** gentecunamanpish, paica achicyachic shinami yuyaita cunga. Can acllashca israelcunatapish, paimantami alli ningacuna” nirca.

³³ Huahua Jesusmanta Simeón ima nishcata uyashpaca, Josepish, Jesuspac mamapish mana amirircacunami.

³⁴ Simeonca paicunaman Taita Dios bendiciachun mañashca q'uipami, Jesuspac mama Mariataca cashna nirca: —Riqui, cai huahuamantami achca israelcuna chingaringacuna, chashnallatac achcacunami quishpiringacuna. Paica Dios munashcata ruhuashcamanta achcacuna p'iñana cashcata ricuchicmi canga.

³⁵ Shinallatac achcacunapac shungupi ima yuyaitapish ricuchingami. María, canca chai tucuita ricushpami, shuc espada cambac shunguta chaupic shina, tullu ñutcucaman llaquiringui— nirca.

³⁶ Shinallatac Taita Dios ima nishcata huillac, yuyac Ana huarmipish chaipimi carca. Paica ñaupa taita Aserpac aillupuramanta Fanuelpac ushimi carca. Cazarashcamanta canchis huatallapimi, cusaca huañurca.

³⁷ Shinami, ña pusac chunga chuscu huatata viuda causarca. Chai yuyac huarmica Diosman mañana huasiman rinata mana saquishpami, tutapish, punzhapish Diosta servishpa, ayunashpa, Taita Diosman mañashpa causac carca.

³⁸ Simeón chashna nicucpi, ñapish Ana shamushpa huahuata ricushpaca, Taita Diosta pagui nishpami mañarca. Shinallatac tucui Jerusalenpi causaccuna Quishpichicta shuyaccunaman, huahua Jesusmanta parlai callarirca.

Nazaret puebloman cutishcamanta

³⁹ Taita Dios mandashcacunata pactachishca q'uipaca, Joseca Mariandic paicuna causana Nazaret pueblomanmi cutircacuna. Chai puebloca Galilea llactapimi carca.

⁴⁰ Taita Dios c'uyashcamantami, huahua Jesusca huiñashpa, sinchiyashpa, ashtahuan yachac tucushpa c'atirca.

Jesús huambra cashpa, Diosman mañana huasiman rishcamanta

⁴¹ Jesuspac taita mamaca, pascuata*f** yuyaringapac huatantami Jerusalenman ric carcacuna.

⁴² Chaimantami chunga ishcai huatata Jesús charicpipish, chaiman rircacuna.

⁴³ Chai yuyarina punzhacuna ña tucuricpi, taita mama huasiman cutimucucpimi, Jesusca paicuna mana yachacpi, Jerusalenllapitac saquirishca carca.

⁴⁴ “Cai ñucanchichuan shamucuc gentecunahuan shamucunga” yuyashpami, paicunaca tucui punzha rircacunalla. Chai q'uipami familiacunamanpish, ricsishcacunamanpish caishucman, chaishucman tapushpa Jesusta mashcarcacuna.

⁴⁵ Ña mana tarishpaca, Jerusalenllapitacmi mashcangapac cutin rircacuna.

⁴⁶ Ña quimsa punzhata mashcacushpallami, Diosman mañana huasi ucupi mandashcacunata yachachiccunahuan, paicunata uyashpa, tapushpa tiyacucta tarircacuna.

⁴⁷ Jesusca yuyaisapa cashpami, ima tapushcatapish alli cutichirca. Chashna cutichicpimi, paita tucui uyaccunaca mana amirircacuna.

⁴⁸ Jesús chaipi tiyacucta paipac taita mama ricushpaca, paicunapish mancharishpami mana amirircacuna. Chaimantami paipac mama Mariaca: —Huahua, ñucanchicca llaquillami mashcacurcanchic. ¿Ima nishpatac ñucanchictaca cashnaca ruhuangui?— nirca.

⁴⁹ Chashna nicpi Jesusca: —¿Ima nishpatac ñucataca chashna mashcacurcanguichic? Ñucaca ñuca Taitapac huasipi cana cashcataca, ¿manachu yacharcanguichic?— nirca.

⁵⁰ Jesús chashna nicpipish, taita mamaca imata nisha nishcata mana entendircacunachu.

⁵¹ Jesusca taita mamandic ña Nazaret puebloman cutimushpaca, paicunata alli cazushpami causarca. Paipac mamaca tucui imalla tucushcata shungupi huacaichishpa causacurcallami.

⁵² Jesusca ashtahuan huiñashpa, ashtahuan yachac tucushpami c'atirca. Taita Diospacpish, gentecunapacpish mai c'uyashcami carca.