SAN LUCAS 19 - Nuevo Testamento en Quichua Cañar 1996

Zaqueo runahuan Jesús parlanacushcamanta

¹ Jesús ña Jericoman yaicushpaca, chai pueblo chaupitami ricurca.

² Chai pueblopimi Roma*f** llactaman impuestota japiccunata mandac, Zaqueo shuti chayuc runapish causarca.

³ Chai Zaqueo runaca uchilla cashcamantami, Jesusta ricusha nishpapish, tauca gentecuna Jesushuan cacpi mana ricui pudirca.

⁴ Chaimanta ñaupashpa callpashpa rishpami, Jesusta ricungapac sicómoro yura jahuaman huichicurca. Jesusca chaitami rina carca.

⁵ Ña chaita Jesús pasacushpami, yura jahuata huichailla ricushpaca: —Zaqueo, utca uricui. Cunanca cambac huasipimi pozangapac rina cani— nirca.

⁶ Chashna nicpi Zaqueo uricushcahuanmi, Jesustaca cushicushpa paipac huasiman pushashpa rirca.

⁷ Chaita ricuc tucui gentecunami: —Juchasapa runapac huasiman Jesús yaicushpaca, mana allitami ruhuan— nishpa, huashalla rimarcacuna.

⁸ Chai q'uipami Zaqueoca jatarishpa, Apunchic Jesustaca cashna nirca: —Apunchic Jesús, ñuca charishcacunamantaca chaupitami huacchacunaman cugrini. Shinallatac maijancunamanta umashpa shuhuashcatapish, chuscu cutin yallihuanmi cutichisha nini— nirca.

⁹ Chashna nicpimi Jesusca: —Cai runapish, ñaupa taita Abrahampac huahua huahuatacmi can. Cunan punzhami quishpirinaca cai huasipi causaccunaman chayamushca.

¹⁰ Runa Tucungapac shamushca*f** ñucaca, juchapi chingarishcacunata mashcashpa, quishpichingapacmi shamurcani— nirca.

Chunga cullquimanta Jesús chimbapurashpa parlashcamanta

¹¹ Jesús ña Jerusalenman chayagricushcamantami, chai tucuita uyacuccunaca: “Taita Dios mandanaca ñami chayamugrin” nishpa yuyarcacuna. Chaimantami Jesusca cai yuyaita japina parlota parlarca:

¹² “Mandaccunapuramanta shuc alli nishca runami, paipac llactata mandanata chasquishpa, cutimungapac caru llactaman rirca.

¹³ Chai runa manarac rishpami, paita serviccunamanta chunga runacunata c'ayashpaca: ‘Caicachic, cai cullquicunahuan randishpa, c'atushpa, ñuca cutimungacaman mirachicuichic’ nirca. Chashna nishpami, caishucman chaishucman shuc mina*f** cullquita saquirca.

¹⁴ Pai ña ricpica, chai llactapi causac gentecuna paita p'iñashcamantami: ‘Cai runa ñucanchicta mandac shamuchunca, mana munanchicchu’ nishpa, huillaccunata q'uipaman cacharcacuna.

¹⁵ Chashna nishpa cachacpipish, chai runaca mandac tucushpami cutimurca. Ña cutimushpaca, chai saquishca cullquicunamanta mashna mirachishcata yachangapacmi, tucui chunga runacunata c'ayachun cacharca.

¹⁶ Chashna c'ayachicpimi, punta shamuc runaca: ‘Amito, can saquishca cullquitaca, chunga cutinhuanmi mirachircani’ nirca.

¹⁷ Chashna nicpi chai mandacca: ‘Canca alli runami cangui. Allitami ruhuashcangui. Ashallata mingacpipish, alli ruhuashcamantaca chunga pueblocunatami mandangui’ nirca.

¹⁸ Cutin shuc shamushpaca: ‘Amito, can saquishca cullquitaca, pichca cutinhuanmi mirachircani’ nirca.

¹⁹ Chashna nicpi chai mandacca: ‘Shinallatac canca pichca pueblocunatami mandangui’ nirca.

²⁰ Cutin shuc shamushpaca: ‘Amito, caipimi cambac cullqui. Ñucaca alli quipishpami huacaichircani.

²¹ Imatapish cambac nishcahuan manapish cushpa chasquiclla, manapish tarpushpa tandaclla cashcamantami, canta manchashpa chashna ruhuarcani’ nirca.

²² Chashna nicpi chai mandacca: ‘Mana allita ruhuac runami cangui. Chashna nishpaca, canllatacmi llaquita apangui. Ñuca nishcahuanca manapish cushpa chasquiclla cashcata, manapish tarpushcata tandaclla cashcataca yachashcanguimi.

²³ ¿Chaita yachashca jahuachu ñuca saquishca cullqui mirarichunca, bancollapipish mana churarcangui? Ñuca cutimushpaca, chai mirarishca cullquindicmi chasquiman carcani’ nirca.

²⁴ Chashna nishpami, chaipi caccunataca: ‘Cai runamanta cullquita quichushpa, chai chunga cullquita mirachicman cuichic’ nirca.

²⁵ Chashna nicpi chai runacunaca: ‘Amito, paica ñamari chunga cullquita charin’ nircacuna.

²⁶ Chashna nicpi, chai mandacca cashnami nirca: ‘Charicmanmi, ashtahuan cushca canga. Mana charicmantaca, ashallata charishcatapish quichushcami canga, ninimi.

²⁷ Chashnallatac ñucata p'iñashcamanta mana mandac cachun niccunataca caiman apamushpa, ñuca ñaupapi cungata p'itishpa huañuchichic’ ” nirca.

Jerusalén puebloman Jesús yaicushcamanta

²⁸ Chashna nishca q'uipami, Jesusca yachacuccunapac ñaupata Jerusalenman rirca.

²⁹ Betfagé pueblo, Betania pueblo cuchulla, Olivos urcumanmi chayarcacuna. Chaimantaca Jesusca paipac yachacuccunapuramanta ishcaitami cacharca. Chashna cachashpaca:

³⁰ —Chai chimbapi cac ashalla huasicunaman richic. Chaiman chayacpica, pi manarac montashca shuc burromi huatashca shayacunga. Chai burrota cacharishpa apamugrichic.

³¹ Cacharicucpi maijanpish ricushpa: ‘¿Imapactac aparicunguichic?’ nicpica: ‘Apunchic Jesús apamugrichic nicpimi, apacunchic’ ninguichiclla— nirca.

³² Chashna nicpi yachacuccuna ña rishpaca, Jesús nishca shinallatacmi burro shayacucta tarircacuna.

³³ Ña cacharicucpimi, dueñocunaca: —¿Imapactac burrotaca cacharicunguichic?— nircacuna.

³⁴ Chashna nicpica: —Apunchic Jesús apamugrichic nicpimi, apacunchic— nircacuna.

³⁵ Ña Jesuspacman apamushpaca, churanacunata burropi sudashpami, Jesusta montachircacuna.

³⁶ Jesús montashca ricucpimi, paihuan riccunaca paicunapac churanacunata Jesús rina ñanpi tendircacuna.

³⁷ Jesús Olivos urcu cuchuta urai rishpa, Jerusalenman ña chayagricucpimi, tucui paita c'atishpa riccunaca cushicushpa Taita Diosta “allimari cangui” nishpa caparircacuna. Pi mana ruhuaipaccunata Jesús ruhuashcata ricushcamantami, chashna caparircacuna.

³⁸ Chashna Jesusta caparicushpaca: —Taita Dios cachashca shamucuc Jatun Mandac, ¡cantaca alli nishca cachun! ¡Jahua pachapipish alli sumac cushicui cachun! ¡Taita Diostapish alli nishca cachun!— nishpami caparircacuna.

³⁹ Chashna caparinacucpimi, gentecunapuramanta maijan fariseocunaca:*f** —Yachachic, cambac yachacuccunataca upalla cachun niyari— nircacuna.

⁴⁰ Chashna nicpi Jesusca: —Paicuna upallacpica, rumicunami caparinga— nirca.

⁴¹ Jesús ña Jerusalenman chayagrishpaca, chai pueblota ricushpami cashna nishpa huacarca:

⁴² “¡Cai pueblopi causaccunalla! Taita Dios cancunaman sumac causaita cuna cashcata cunan punzhallapish yachashpaca, allichari canguichicman, ashtahuanpish cancunaca yuyai pacashca shina cashpami, mana entendinguichic.

⁴³ Llaqui punzhacuna chayamucpica, cancunata p'iñaccuna shamushpaca, muyundicta jarcashpami macangacuna.

⁴⁴ Cai pueblota urmachishpa, tucui caipi causaccunata huañuchingacunami. Shuc rumillapish pircashcaca mana saquiringachu. Taita Dios quishpichingapac shamucpi mana chasquishcamantami, chashna llaquita apanguichic” nirca.

Diosman mañana huasipi c'atuccunata llucchishpa cachashcamanta

⁴⁵ Chai q'uipami Jesusca Diosman mañana huasiman yaicushpa, tucui chaipi c'atuccunatapish, randiccunatapish llucchishpa cachai callarirca.

⁴⁶ Chashna ruhuashpaca: “Dios quillcachishcapica: ‘Ñuca huasica, ñucaman mañana huasimi canga’ ninmi. Ashtahuanpish cancunaca cai huasitaca, shuhuacuna miticuna machai shinatami ruhuashcanguichic” nirca.

⁴⁷ Jesusca tucui punzhacunami Diosman mañana huasipi yachachic carca. Chashna yachachicucpipish curacunata mandac curacunapish, mandashcacunata yachachiccunapish, llactata mandaccunapish Jesustaca ima shina huañuchinatami yuyacurcacuna.

⁴⁸ Ashtahuanpish Jesús huillacucta tucui gentecuna alli uyacushcamantami, paicunaca imata mana ruhuai pudircacuna.