SAN LUCAS 15 - Nuevo Testamento en Quichua Cañar 1996

Chingarishca ovejamanta Jesús chimbapurashpa parlashcamanta

¹ Roma*f** llactaman impuestota japiccunapish, israelcuna*f** ch'icanyachishca caishuc juchayuccunapish, achcacunami Jesús huillashcata uyangapac paipacman cuchuyarcacuna.

² Chaita ricushpami fariseocunapish,*f** mandashcacunata yachachiccunapish: —Cai runaca ñucanchic ch'icanyachishca juchayuccunahuan tandarishpa micunllami— nishpa, huashalla rimarinacurcacuna.

³ Chashna ninacucpi, Jesusca yuyaita japina parlohuan parlashpaca:

⁴ “Maijan cancunapuramanta pasac ovejacunata charishpa shuc oveja chingaricpica, caishuc iscun chunga iscunta michina pambapi saquishpa, chai chingarishca ovejata taringacaman, ¿manachu mashcangapac ringuichicman?

⁵ Ña tarishpaca cushicushpami, gugutishpa apamunguichicman.

⁶ Ña huasiman chayamushpaca, cuchullapi causaccunatapish, alli ricsishcacunatapish tandachishpami: ‘Ñami chai chingarishca ovejataca tarimuni. Shamuichic, cushicushun’ ninguichicmanmi.

⁷ Cancunaman huillanimi: Chashnallatacmi iscun chunga iscun ‘ña mana llaquirishpa, Diosman cutirinachu canchic’ niccunamanta yalli, shuc juchayuc llaquirishpa Diosman cutiricpica, ashtahuan cushicui jahua pachapica tiyan.

Chingarishca cullquimanta Jesús chimbapurashpa parlashcamanta

⁸ Shinallatac maijan huarmipish, chunga cullquita charicushpa chaimanta shuc chingaricpica, ¿manachu michata japichishpa, huasi ucuta p'ichashpa, taringacaman mashcanman?

⁹ Ña tarishpaca, paipac alli ricsishcacunatapish, cuchulla causaccunatapish tandachishpa: ‘Chai chingarishca cullquitaca tarinimi. Shamuichic, ñucahuan cushicungapac’ ninmanmi.

¹⁰ Cancunaman huillanimi: Chashnallatacmi shuc juchayuc llaquirishpa Diosman cutiricpica, Taita Diospac angelcunapish mai cushicuncuna” nirca.

Chingarishca churimanta Jesús chimbapurashpa parlashcamanta

¹¹ Shinallatac Jesusca cashnapish parlarcami: “Shuc runami ishcai churicunata charirca.

¹² Chai ishcai churimanta q'uipa churica taitataca: ‘Taitito, ñuca japina cashcataca cunan cui’ nicpi, taitaca tucui charishcacunatami chaupishpa curca.

¹³ Chai q'uipa churica asha punzhacuna q'uipa tucui pai japishcacunata c'atushpa, cullquita tandachishpaca, caru llactamanmi rirca. Chai caru llactapimi maipish cachun causashpa, tucui pai charishcacunataca tucuchirca.

¹⁴ Chashna tucui tucuchishca q'uipaca, chai llactapi ima mana p'ucucpimi yarcai tiyarca. Shina cacpimi, paipish llaquilla causai callarirca.

¹⁵ Chaimantami chai llactapi causac shuc amopacman rishpa, imalla ruhuanata mañarca. Chashna mañacpimi, chai amoca paipac allpapi cuchicunata michichun cacharca.

¹⁶ Paica yarcaihuan huañucushpami, cuchicuna micunata micusha nishpa yuyacurca. Chashna yuyacucpipish, pi mana imata cararcachu.

¹⁷ Chashna puricushpallami: ‘¡Ñuca taitapac huasipica, paipac serviccunaca micunata atichicunchari! Ñucaca caipi yarcaihuan huañucuni.

¹⁸ Ñuca taitapacman cutishpa rishalla. Chaiman chayashpaca: “Taitito, Diostapish, cantapish p'iñachishpami, mana allita ruhuashcani.

¹⁹ Cunanca ña mana cambac churi shinachu cani. Canta servic runa shinalla cachun chasqui” nishami’ nishpa yuyarirca.

²⁰ Chashna yuyarishpami ñanta japishpa, paipac taitapacman cutimurca. Ña cutimucucpica, paipac taitaca caruta shamucuctami ricurca. Paita ricushpaca mai llaquishpami, tupangapac callparca. Chashna tupashpaca, ucllarishpami mucharca.

²¹ Chashna muchacpimi churica: ‘Taitito, Diostapish, cantapish p'iñachishpami, mana allita ruhuashcani. Cunanca ña mana cambac churi shinachu cani’ nirca.

²² Chashna nicpipish, taitaca paipac serviccunata c'ayashpaca: ‘Tucuita yalli alli churanacunata utca apamushpa churachichic. Maqui dedopipish sortejata, shinallatac chaquipica ushutata churachichic.

²³ Cunanca jatun micuita ruhuashpa cushicungapac, shuc alli huira huagrata apamushpa huañuchichic.

²⁴ Cai ñuca churica, huañushca shina chingarishcami carca. Cunanca causaric shinami cutimushca’ nirca. Chaimantaca munaimi cushicui callarircacuna.

²⁵ Chashna ruhuacucpica, caishuc punta churica chagrapimi carca. Chagramanta huasiman ña chayamucushpaca, tocaccunatapish, tulun ninacushpa bailacuccunatapish uyarcami.

²⁶ Chaita uyashpaca, paipac taitapac serviccunamanta shucta c'ayashpami: ‘¿Imatatac ruhuacuncuna?’ nishpa tapurca.

²⁷ Chashna tapucpica: ‘Cambac huauquimi chayamushca. Pai allilla chayamushcamantami, cambac taitaca huira huagrata huañuchichishpa cushicucun’ nirca.

²⁸ Shina nicpi chai huauquica munai p'iñarishpami, mana yaicusha nirca. Chaimantami taita llucshishpaca: ‘Yaicuiyari’ nishpa mañarca.

²⁹ Chashna nicpica: ‘Taita, ñucaca cai tucui huatacunatami can ima nishcata ruhuashpa servishcani. Chashna cacpipish ñuca ricsishcacunahuan cushicuchunca, shuc chivollatapish mana cushcanguichu.

³⁰ ¿Chai cambac churica mana alli huarmicunahuan purishpa, can cushca charishcacunatapish tucuchishpa shamucpichu, canca chai huira huagrata huañuchichishpa cushicucungui?’ nirca.

³¹ Chashna nicpi taitaca: ‘Huahua, canca tucui punzhacuna ñucahuan cashcamantaca, tucui ñuca imalla charishcacunaca cambacmi.

³² Cai cambac huauquica, chingarishcamantaca huañushca shinami carca. Cunan cutimushpaca, causarishca shinami. Chashna cashcamantami jatun micuita ruhuashpa, cushicuna canchic’ ” nirca.