SAN LUCAS 14 - Nuevo Testamento en Quichua Cañar 1996

Ungushca runata Jesús alliyachishcamanta

¹ Chai q'uipami, samana punzhapi*f** Jesusca mandac fariseopac*f** huasipi micugrirca. Chaipi micucucpimi, caishuc fariseocunaca Jesusta ima shinapish juchanchingapac chapacurcacuna.

² Jesuspac ñaupapica, punguillichic ung:uihuan cac runami chaipi carca.

³ Chai runata ricushpami, mandashcacunata yachachiccunatapish, fariseocunatapish Jesusca: —Mandashcacunapi nishca shinaca, ¿samana punzhapi ungushcata alliyachinaca allichu canga? Mana cashpaca, ¿saquinallachu canga?— nishpa tapurca.

⁴ Chashna tapucpi imata mana nicpica, Jesusca chai ungushca runataca tuparishpalla ña alliyachishpaca: “Rilla” nishpami cacharca.

⁵ Chashna ruhuashca q'uipami, fariseocunataca: —Maijan cancunapac shuc huahua cashpa, shuc huagra cashpapish jutcupi ucuyacpica, samana punzha cachunpish, ¿manachu llucchinguichicman?— nirca.

⁶ Chashna nicpica, imata mana ni pudircacunachu.

Bodaman c'ayashcacunamanta Jesús chimbapurashpa parlashcamanta

⁷ Chai micungapac c'ayashcacuna punta tiyarinata mashcashpa mizapi tiyaricucta ricushpami, Jesusca yuyaita japichun cashna nishpa parlarca:

⁸ “Cazarana bodaman canta pi c'ayacpi rishpaca, punta alli nishcacuna tiyarinapica ama tiyaringuichu. Pacta canta atishpa ashtahuan alli nishca runa q'uipata chayamucpi,

⁹ bodayuc shamushpa: ‘Caimanta anchuri, paitami caipica tiyachigrini’ ninman. Chashna nicpica, pingaihuanmi yangallacuna tiyarinapi tiyaringui.

¹⁰ Ama chashna tucungapacca, canta bodaman c'ayacpi rishpaca, yangallacuna tiyarinapi tiyaringui. Chaimanta bodayuc shamushpa: ‘Uyai, cai ñaupaman tiyari, ari vidalla’ nicpica, canca tucui chaipi canhuan tiyacuccunapacpish alli nishcami cangui.

¹¹ Maijanpish ‘allimi cani’ nictaca, Taita Diosca ‘mana allichu cangui’ ningami. Shinallatac maijanpish ‘mana allichu cani’ nictaca, Taita Diosca ‘allimi cangui’ ningami” nirca.

¹² Shinallatac Jesusca chai micuiman c'ayac runatapish cashnami nirca: —Ima micuiman c'ayashpapish, cambac alli ricsishcacunallata, huauquicunallata, cambac quiquin familiacunallata, cambac cuchullapi causac chayuccunallataca ama c'ayanguichu. Chaicunata c'ayacpica, paicunapish canta c'ayashpa, can carashcamantaca cutichingami.

¹³ Ashtahuanpish shuc jatun micuita carangapac c'ayashpaca, huacchacunatapish, mana imata ruhuaipaccunatapish, suchucunatapish, ñahui mana ricuccunatapish c'ayangui.

¹⁴ Chashna mana cutichishpa caraipaccunaman carashcamantaca, cushicunguimi. Shina ruhuacpimi, Dios alli nishcacuna causarimui punzhapica, Taita Diosca canmanca cutichinga— nirca.

Jatun micuihuan chimbapurashpa Jesús parlashcamanta

¹⁵ Jesús chashna nicta uyashpaca, mizapi paihuan tiyacuccunapuramanta shucca: —Pipish Taita Dios maipi mandacucpi micungapac chayacca cushicungami— nirca.

¹⁶ Chashna nicpi, Jesusca cashnami parlarca: “Shuc runami jatun micuita ruhuagricushpa, achcacunata c'ayarca.

¹⁷ Ña micunalla cacpimi, paita servic runataca: ‘Ñami tucui allichishca, shamuichic nigri’ nishpa cacharca.

¹⁸ Chashna c'ayachun cachacpica, caita chaita ninacushpami, mana shamushun nircacuna. Shucca: ‘ “Cunanllami allpata randircani. Chaitami ricungapac ricuni. Chaimantami mana shamui pudini ninmi” nigrishpa cui’ nirca.

¹⁹ Cutin shucca: ‘ “Ñucaca pichca yunta huagracunatami randircani. Chai randishca huagracunatami yugushpa ricugricuni. Chaimantami mana shamui pudini ninmi” nigrishpa cui’ nirca.

²⁰ Cutin shucca: ‘ “Ñucaca cunanllami cazararcani. Chaimantami mana shamui pudini ninmi” nigrishpa cui’ nirca.

²¹ Chashna ninacucpica, chai amo cachashca runa cutimushpaca, paicuna ima nishcatami amoman huillarca. Chashna huillacpica, amoca munai p'iñarishpami: ‘Shinashpaca, cunantac rilla. Plazacunapi, pueblo ñancunapi puricuc huacchacunatapish, mana imata ruhuaipaccunatapish, suchucunatapish, ñahui mana ricuccunatapish pushamugri’ nishpa cacharca.

²² Amota servic runa ña tucui pushamushca q'uipaca: ‘Amito, ñami can mandashca shina pushamushcani. Shina cacpipish ucupica manarac jundanchu’ nirca.

²³ Chashna nicpi amoca: ‘Shinashpaca mai ñancunatapish purishpa, imallata mañashpa chaipi tiyacuccunacaman pushamushpa, ima shinapish ñuca huasipica jundachi.

²⁴ Cancunaman ninimi: Ñaupaman c'ayashcacunaca, shucllapish manatac cai ñuca micuitaca micungacunachu’ ” nirca.

Cristota c'atingapacca, imatapish saquishpa c'atina cashcamanta

²⁵ Jesusca paihuan ricuc achca gentecunata ricushpaca:

²⁶ “Maijan ñucata c'atisha nishpaca, taita mamata, huarmita, huahuacunata, huauquicunata, panicunata, paipac quiquin causaitapish yallita llaquicca, mana ñuca yachacuc cai pudinchu.

²⁷ Maijanpish cruzpi chacatashca huañuna shina llaquita apana cashpapish ñucata mana c'atishpaca, mana ñuca yachacucchu canga.

²⁸ ¿Manachu maijan cancuna huasita shayachisha nishpaca: ‘¿Cullquica pactangachu, manachu pactanga?’ nishpami, puntaca alli yuyaringuichicman?

²⁹ Mana chashna alli yuyarishcamanta huasichinata callarishpalla saquicpica, shuccuna chaita ricushpaca, burlashpa asinmancunami.

³⁰ Shina burlashpaca: ‘Cai runaca manapish tucuchingapacmi huasitaca shayachinata callarishca’ ninmancunami.

³¹ Shinallatac maijan llactata mandacpish, shuc llactata mandac-huan macanacusha nishpaca, paipac chunga huaranga soldadocunallahuan cashpa, caishuc mandacca ishcai chunga huaranga soldadocunahuan shamucucpica, manarac macanacushpami yuyarinman.

³² Mana macanacuipac cashpaca, caishuc mandac manarac chayamucpimi: ‘Mana macanacusha ninichu. Macanacunapac randica, alli tucunacushunlla’ nishpami, huillaccunata cachanman.

³³ Chashnallatac maijan cancunapish tucui charishcacunata mana saquishpaca, mana ñuca yachacuccuna cai pudinguichicchu.

Cachi ima shina cashcata Jesús huillashcamanta

³⁴ Cachica allimi. Chashna cashpapish gamuyashpaca, ¿imapac allichu canman?

³⁵ Allpapi shitangapacpish, huanupi churangapacpish mana alli canmanchu. Rinrita chariccunaca, cai ñuca nishcacunataca alli uyaichic” nirca.