SAN LUCAS 11 - Nuevo Testamento en Quichua Cañar 1996

Taita Diosman mañanata Jesús yachachishcamanta

¹ Shuc punzhami Jesusca Taita Diosman mañacurca. Ña mañashca q'uipaca shuc yachacucca: —Apunchic Jesús, Bautizac Juan ima shinami paipac yachacuccunaman yachachic carca, shinallatac ñucanchicmanpish Taita Diosman mañanata yachachi— nirca.

² Chashna nicpi, Jesusca cashna nirca: —Cancuna Taita Diosman mañashpaca, cashna ninguichic: ‘Jahua pachapi cac ñucanchic Taitalla, cambac sumaimana shutitaca tucuilla alli nishca cachun. Can mandana punzha shamuchun. Ima shinami jahua pachapi can munashca ruhuaricun, shinallatac cai pachapipish can munashca ruhuarichun.

³ Ñucanchic punzhanta micuna tandataca, cunan punzhapish carai.

⁴ Ima shinami ñucanchicta mana alli ruhuaccunata perdonanchic, shinallatac ñucanchic juchacunatapish perdonai. Ama ima millaipi urmachun saquinguichu, ashtahuanpish tucui mana allimanta huacaichingui’ nishpa mañanguichic— nirca.

⁵ Yachacuccuna yuyaita japichun nishpami, Jesusca cashna nirca: —Maijan cancunamanta shuc ricsishca runata charishpa, paipac huasiman chaupi tutata rishpaca: ‘Uyai, quimsa tandata mañachi.

⁶ Ñucapac shuc ricsishca runami, cunanlla carumanta ñuca huasiman chayamun. Ima caranata mana charishpami, mañac shamuni’ ninguichicmanmi.

⁷ Chashna nicpi, ucumanta huasiyucca: ‘Pungu huichcashcami. Ñuca huahuacunahuan ñami camapi canchic. Chaimantami canman mañachingapacca, mana jatari pudini’ ninmanmi.

⁸ Chashna cashpapish alli ricsishca cashcamantaca mana mañachinmanchu, ashtahuanpish ama p'iñachichun nishpallami, jatarishpa ima mañashcata cunman.

⁹ Chashnallatac cancunaca Taita Diosman mañaichic, paica cungami. Mashcaichic, taringuichicmi. Huasiyuc nichic, paica pascangami.

¹⁰ Chashna maijanpish mañacca japinmi. Maijanpish mashcacca tarinmi. Shinallatac maijanpish huasiyuc nictaca yaicuchinmi.

¹¹ Cancunapuramanta maijan taita cashpapish, cambac huahua tandata mañacpica, mana rumita cunguichicmanchu. Pescadota mañacpica, mana culebrata cunguichicmanchu.

¹² Chashnallatac ruruta mañacpica, mana alacranta cunguichicmanchu.

¹³ Cancuna mana allicuna cashpapish, huahuacunamanca imatapish allitami cunguichic. Jahua pachapi cac Taita Dioscarin, maijanpish paipac Espirituta mañaccunamanca cungallami— nirca.

Jesustaca “diablohuanmi cangui” nishcamanta

¹⁴ Chai q'uipami, Jesusca shuc runamanta supaita llucchishpa cacharca. Chai runataca supaimi upata ruhuashca carca. Supaita Jesús llucchishpa cachacpica, chai runa ña rimaricpica, chaipi caccunaca mana amirircacunami.

¹⁵ Chashna ruhuacta ricushpami maijancunaca: —Cai runaca supaicunata mandac Beelzebuhuan*f** cashpami, supaicunataca llucchishpa cachanlla— ninacurcacuna.

¹⁶ Shinallatac maijancunaca Jesús ima mana allita nicpica juchanchingaraicumi: —Jahua pacha Taita Dios cachashca cashpaca, pi mana ruhuaipacta ruhuashpa ricuchi— nircacuna.

¹⁷ Chashna ninacucta Jesús yachashcamantami cashna nirca: —Maijan llactata mandaccunapura chaupirishpa caishuc chaishuc p'iñanacushpa macanacucpica, paicuna mandacushcaca chingarinmanllami. Shinallatac shuc huasi ucu causaccunapura p'iñanacushpaca, llaqui tucunmanllami.

¹⁸ Chashnallatac supaicunata mandac Satanaspish*f** supaicunata caita chaita mandacpi paicunapura p'iñanacucpica, pai mandacucca chingarinmanllami. Ñucata ‘Beelzebuhuan cashpami, supaicunata llucchishpa cachan’ nishcamantami, chashnaca nini.

¹⁹ Chashna cacpica, cancunapac yachacuccunapish Beelzebuhuan cashpachari, supaicunataca llucchishpa cachanyari. Paicuna chashna ruhuashpaca, cancuna pandaricushcatami ricuchincuna.

²⁰ Ashtahuanpish ñucaca Taita Dioshuan cashpami, supaicunataca llucchishpa cachani. Chashna ruhuashpaca, cancunapurapi Taita Dios mandai callarishcatami ricuchicuni.

²¹ Shuc sinchi runa imahuanpish macangapaclla paipac huasita cuidacucpica, huasi ucupi ima charishcatapish mana pi apanmanchu.

²² Ashtahuanpish pai charicushca ima macanacunahuanca ‘atishallami’ nicucpipish, shuc ashtahuan sinchi runa shamushpaca, chai runata macashpa, paipac macanacunatapish quichushpa, tucui imalla charishcacunatapish chaupinacunmanllami.

²³ Maijanpish mana ñucahuan tandaricca, ñucata p'iñacmi. Shinallatac maijanpish mana ñucahuan tandachicca, ñuca tandachishcatapish shiguashpa cachacmi.

Shuc runamanta supai llucshishpapish, cutimuc cashcamanta

²⁴ Shuc runamanta supai llucshishpaca, shitashca mai pambacunapimi samarinata mashcashpa purin. Samarinata maipi mana tarishpaca: ‘Ñuca maipimi punta causacurcani, chaillamantac cutishalla’ nishpami yuyarin.

²⁵ Ña supai cutimushpaca, sumacta p'ichashpa, allichishca huasi shinatami chai runataca tarin.

²⁶ Chashna tarishpaca, paita yalli ashtahuan millai caishuc canchis supaicunata pushashpami, chai runapica causac shamun. Chaimantami chai runaca ñaupa causacushcatapish yalli, ashtahuan millai runa tucun— nirca.

Imamanta cushicunatac cashcamanta

²⁷ Jesús chashna huillacucpiracmi, paita uyac gentecunapac chaupimanta shuc huarmi caparishpa Jesustaca: —Maijan huarmi cashpapish, canta chuchuchishpa huiñachicmanca, ¡mai cushicuimi!— nirca.

²⁸ Chashna nicpi Jesusca: —Maijanpish Taita Dios ima nishcata uyashpa cazuccunamanmi, ashtahuan cushicuica— nirca.

Millai runacuna Jesusta “pi mana ruhuaipacta ruhuai” nishcamanta

²⁹ Achca gentecuna ashtahuan tandanacumucpimi, Jesusca cashna nirca: “Cunan punzha causaccunaca millaicunami. Paicunaca: ‘Pi mana ruhuaipacta ruhuashpa ricuchi’ nishpami mañancuna. Chashna cashpapish imata mana ricungacunachu, ashtahuanpish Diosmanta ñaupa huillac Jonás ima shina tucushcallatami ricungacuna.

³⁰ Ima shinami Jonasca Nínive pueblopi causaccunamanca yuyarina tucurca, Runa Tucungapac shamushca*f** ñucatapish, cunan punzha causaccunaca chashnallatacmi tucucta ricungacuna.

³¹ Sabá llactata jatun mandac huarmipish, alli yachac Salomón ima nishcata uyangapacmi caru llactamanta shamurca. Cunan ñucaca Salomontapish yallimi caipica cani. Chaimantami Taita Dios taripana punzhapica cunan punzha causaccunata taripacpica, chai huarmipish jatarishpa, cunan punzhapi causaccunataca: ‘Cancunaca mana allitachu ruhuashcanguichic’ nishpa juchanchinga.

³² Chashnallatac Ninivepi causac gentecunapish Dios ima nishcata Jonás huillacpica, juchayuc cashcamanta llaquirishpa, Taita Diosman cutirircacunami. Ñucacarin, Jonastapish yallimi caipica cani. Chaimanta Taita Dios taripana punzhapi Nínive pueblopi ñaupa causaccunami jatarishpa, cunan punzhapi causaccunataca: ‘Cancunaca mana allitachu ruhuashcanguichic’ nishpa juchanchingacuna.

Runapac shunguca luz shina cashcamanta

³³ Luztaca pacalla ucupi churangapac, mana cashpaca cajonhuan tapangapacca, pipish mana japichinchu, ashtahuanpish ucuman yaicucpi achicyachichunmi, pata jahuapi churan.

³⁴ Cambac ñahuicunaca cuerpopac luz shinami. Ñahuicuna alli cacpi, tucui cuerpomi achiclla shina canga, ashtahuanpish cambac ñahui mana alli cacpica, amsapi shinami causacungui.

³⁵ Alli yuyaringui, pacta ‘achicpi cani’ nicushpapish, amsapi canguiman.

³⁶ Cambac tucui shungupi luz shina alli yuyai tiyacpica, ima amsa mana tiyangachu. Luzta japichicpi achicyachic shinami, canpi tiyac luzhuan tucuita alli ricungui” nirca.

Fariseocunatapish, mandashcacunata yachachiccunatapish Jesús rimashcamanta

³⁷ Jesús chashna parlashca q'uipaca, shuc fariseo*f** runami paipac huasipi micungapac Jesusta ‘jacu’ nirca. Jesús chaiman chayashpaca, mizapimi tiyarirca.

³⁸ Fariseocuna micungapacca, maquitaracmi alli jahuaccuna carca. Jesús mana chashna ruhuacpimi, chai runaca mancharirca.

³⁹ Chaimantami Apunchic Jesusca cashna nirca: —Cancuna fariseocunaca vasota, platota jahuallatami jahuanguichic, ashtahuanpish cancunapac shungu ucutaca shuhuana yuyai, imapish mana allita ruhuana yuyaicunallami junda canguichic.

⁴⁰ Yuyai illaccuna, ¿manachu yachanguichic? Ucutapish, jahuatapish Taita Diosmi ruhuarca.

⁴¹ Cancunaca imalla charishcata huacchacunaman caraccuna caichic. Chashna cacpica, tucuimi jahuashca shina chuyanlla canga.

⁴² ¡Aij, fariseocunalla, imachari tucunguichic! Cancunaca mentatapish, rudatapish, shinallatac ima micuna sachatapish pasacmanta chungata Taita Diosman cucmi canguichic. Chashna ruhuashpapish, shuccunaman ima allita mana ruhuashpaca, Taita Diostapish mana c'uyanguichicchu. Taita Diosman cunata mana saquishpa, shuccunamanpish allita ruhuashpami, Taita Diostapish c'uyana canguichic.

⁴³ ¡Aij, fariseocunalla, imachari tucunguichic! Cancunaca tandanacuna huasicunapipish, punta alli tiyarinapi tiyarinata munaccunami canguichic. Shinallatac ñancunapi tupaccunapish, tucui c'uyaihuan alabaduchun munaccunami canguichic.

⁴⁴ ¡Aij, mandashcacunata yachachiccunalla, fariseocunalla, imachari tucunguichic! Cancunaca mishqui shimi, jayac shungucunami canguichic. Shinallatac huañushcacunata enterrashca jutcu shinami canguichic. Chai enterrashca jahuata puriccunaca, ucupi ima tiyashcata mana yachashpa purincunallami— nirca.

⁴⁵ Chashna nicpi, mandashcacunata yachachiccunapuramanta shuc runaca: —Yachachic, can chashna nishpaca, tucui ñucanchictapish juchanchishpa rimashcangui— nirca.

⁴⁶ Chashna nicpi, Jesusca cashnami nirca: —¡Aij, imachari tucunguichic, cancuna yachachiccunapish! Pi mana aparipac llashacta apachic shinami, shuccunataca imatapish ruhuachunlla ninguichic, ashtahuanpish cancunaca dedollahuanpish mana tuparisha nic shinami, chaicunataca mana ruhuashun ninguichicchu.

⁴⁷ Shinallatac Diosmanta ñaupa huillaccunata enterrashca bovedata allichiccunami canguichic. Cancunaca, ¡aij, imachari tucunguichic! Chai huillaccunataca cancunapac ñaupa taitacunami huañuchircacuna.

⁴⁸ Paicuna chashna huañuchicpipish, cancunaca chai ñaupa huillaccunata pambashca bovedacunata allichiccunallami canguichic. Chashna ruhuashpaca, cancunapac ñaupa taitacuna mana allita ruhuashca cacpipish, allitami ruhuashca nic shinami ruhuanguichic.

⁴⁹ Chaimantami Taita Diosca tucuita yachac cashpa, cashna nirca: ‘Ñuca ima nishcata huillaccunatapish, shinallatac ñuca acllashca huillaccunatapish cachashami. Chai cachashcacunamanta maijancunataca huañuchingacunami, maijancunataca mana ricunachishpa llaquichingacunami’ nirca.

⁵⁰ Taita Dios cai pachata ruhuashca punzhamanta pacha cunancamanmi, paimanta huillaccunata ñaupa taitacuna huañuchishpa yahuarta jichashcamantaca, cunan punzha causaccunataca Taita Dios taripashpa llaquichinga.

⁵¹ Abelta huañuchishca yahuarmanta callarishpa, Zacariasta huañuchishca yahuarcamanmi, Taita Diosca cunan punzha causaccunataca taripashpa llaquichinga, chashnami canga. Zacariastaca, Diosman mañana huasi ucupi tiyac altar ladopi cacpipish huañuchircacunami.

⁵² ¡Aij, imachari tucunguichic, mandashcacunata yachachiccunalla! Cancunami Diosmanta yachana yuyaitaca huichcac shina jarcanguichic. Cancunapish mana yachanata munanguichicchu. Shinallatac shuccuna yachachunpish, mana saquinguichicchu— nirca.

⁵³ Chashna nicpica mandashcacunata yachachiccunapish, fariseocunapish munai p'iñarishpami, Jesustaca caita chaita tapushpa, p'iñachi callarircacuna.

⁵⁴ Ima mana allita nicpica, juchanchingapacmi chashnaca tapurcacuna.