SAN LUCAS 10 - Nuevo Testamento en Quichua Cañar 1996

Huillachun canchis chungacunata Jesús cachashcamanta

¹ Chai q'uipami Apunchic Jesusca canchis chungacunata acllashpa, tucui pai chayana pueblocunaman, llactacunaman huillachun, ishcai ishcaita ñaupachishpa cacharca.

² Paicunataca: “Grano tandanaca achcami. Tandaccunaca ashallacunami. Chashna cashcamanta ashtahuan tandaccunata cachachun, Chagrayucman mañaichic.

³ Cancunataca pactalla ovejacunata atuccunapac chaupita cachac shinami cachani. Shina cacpipish richiclla.

⁴ Cancunaca cucayu muchilatapish, cullquitapish, shinallatac ushutallatapish ama apashpa ringuichicchu. Ñanpi pihuan tupashpa: ‘¿Allillachu cangui?’ ninacushpapish, ama unaiyanguichicchu.

⁵ Mai huasiman chayashpaca: ‘Cai huasipica, Taita Dios sumac causaita cuchun’ nishpa, punta alabadunguichic.

⁶ Chashna nicpi, chai huasipi alli causaita maijanpish chasquishpaca, allitami causanga. Paicuna mana chasquicpica, cancuna chashna nishcapish yangallami canga.

⁷ Pi runapish imallata ruhuashcamantaca, japinata charinmi. Shina cashcamanta mai huasipi alli chasquicpica, chaillapitac imata carashcatapish micushpa pozanguichiclla. Cancunaca pacta huasi huasi puricunguichicman.

⁸ Mai puebloman chayacpi alli chasquicpica, imalla carashcatapish micunguichiclla.

⁹ Chai pueblopi ungushcacuna tiyacpipish, alliyachinguichic. Shinallatac ‘Taita Diosca ñami cancunata mandagrin’ nishpa huillanguichic.

¹⁰ Mai puebloman cancuna yaicucpi mana chasquishun nicpica, ñanman llucshishpa:

¹¹ ‘Ñucanchic chaquicunapi c'atirishca allpatapish, cancuna llaquita apana cashcata ricuchingapacmi, caillapitac chaspishpa saquinchic. Ashtahuanpish Taita Dios cancunata ña mandagricushcataca, alli yuyaringuichic’ nishpa huillanguichic.

¹² Ñucaca ninimi: Sodoma pueblopi causac millai gentecuna ima shinami llaqui tucurca, chaitapish yallimi chai pueblopi causaccunataca Taita Dios taripana punzhapica llaquichishca canga.

Jesús huillashcata mana cazuccunamanta

¹³ ¡Corazín pueblopi causaccunalla! ¡Betsaida pueblopi causaccunalla, aij imachari tucunguichic! Pi mana ruhuaipaccunata cancunapac pueblocunapi ruhuashca shinata Tiro pueblopi, Sidón pueblopi ñuca ruhuashca cacpica, paicuna llaquirishcata ricuchingapacca, utcamanmi sharpa churanata churarishpa, uchupapi tiyarishpa, Taita Diosman cutirinman carcacuna.

¹⁴ Taita Dios taripana punzhapica Tiro pueblopi, Sidón pueblopi causaccunata yallimi, cancunaca llaquichishca canguichic, ninimi.

¹⁵ Shinallatac Capernaum pueblopi causaccuna, cancunaca: ‘Jahua pachaman rishunmi’ nishpami yuyacunguichic, ashtahuanpish ucu pachamanmi shitashca canguichic” nirca.

¹⁶ Jesusca paipac yachacuccunataca: “Maijanpish cancuna ima nishcata uyacca, ñuca nishcatami uyan. Shinallatac cancunata p'iñacca, ñucatami p'iñan. Ñucata p'iñacca, ñucata cachac Taitatapish p'iñanmi” nirca.

Jesús cachashca canchis chungacuna cutimushcamanta

¹⁷ Chai q'uipami, Jesús cachashca canchis chungacuna cushicuihuan cutimushpaca: —Apunchic Jesús, ñucanchic cambac shutita nicpica, supaicunapish manchashpa llucshinllami— nircacuna.

¹⁸ Chashna nicpi Jesusca: —Ari, Satanastaca*f** relampa shina jahuamanta urmacta ricurcanimi.

¹⁹ Ñucami cancunataca culebracunata, alacrancunata sarushpapish, mana ima tucucta ruhuarcani. Shinallatac ima millaita aticcuna cachunpish ruhuarcani. Chaimanta imapish cancunataca mana imata ruhuangachu.

²⁰ Supaicunata llucchishpa cachashcallamantaca ama cushicuichicchu, ashtahuanpish cancunapac shuticuna jahua pacha libropi quillcashca cashcamanta cushicuichic— nirca.

Jesús cushicushcamanta

²¹ Jesús chashna nicucllapitacmi, Diospac Espíritu cushichicpi munai cushicushpa: —Jahua pachatapish, cai pachatapish Mandac ñuca Taitalla, cantaca ‘allimari cangui’ ninimi. Canca cai yachanacunataca alli yuyaiyuc, alli yachaccunamanca pacashpami mana yachachishcangui, ashtahuanpish huahuacuna shinamanmi yachana yuyaita cushpa yachachishcangui. Ari, Taitito, can chashna ruhuasha nishcamantami chashnaca ruhuashcangui— nirca.

²² Chashnallatacmi Jesusca: —Ñuca Taitaca tucuitami ñucaman curca. Ñuca pipac Churi cashcataca pi mana yachanchu, ñuca Taitallami yachan. Ñuca Taita pi cashcataca, pi mana yachanchu, ñucallami yachani. Shinallatac pipish ñuca yuyaita cucllapimi, ñuca Taita pi cashcataca yachancuna— nirca.

²³ Chai q'uipami, paipac yachacuccunallaman Jesusca: —Cancunaman ninimi: Maijanpish cancuna ricucushcata ricuccunamanca, ¡mai cushicuimi can!

²⁴ Cunan cancuna ricucushcataca, taucacunami Diosmanta ñaupa huillaccunapish, jatun mandaccunapish ricunata munarcacuna. Chashna munashpapish manatac ricurcacunachu. Shinallatac cunan cancuna uyacushcata mashnata uyanata munacushpapish, manatac uyarcacunachu— nirca.

Samaria llacta alli runamanta Jesús parlashcamanta

²⁵ Chai q'uipami, mandashcacunata yachachic shuc runa shayarishpa, Jesús ima pandata nicpica juchanchingapac cashna tapurca: —Yachachic. Ñuca huiñai causaita charingapacca, ¿imatatac ruhuana cani?— nirca.

²⁶ Chashna nicpi Jesusca: —Dios quillcachishpa mandashcacunapica, ¿imata ruhuachun nishcatatac ricungui?— nirca.

²⁷ Chashna nicpi chai yachachic runaca: —‘Cambac tucui shunguhuan, tucui almahuan, tucui yuyaihuan, tucui munaihuan canta Mandac Taita Diosta c'uyangui. Can quiquinllatac ima shinami c'uyaringui, shinallatac shuccunatapish c'uyangui’ ninmi— nirca.

²⁸ Shina nicpi Jesusca chai runataca: —Allitami ningui. Chashna caicunata pactachishpaca, huiñai causaita charinguimi— nirca.

²⁹ Chashna nicpi, chai runaca paillatac alli ricurisha nishpami: —¿Pi shuctatac c'uyana cani?— nirca.

³⁰ Chashna nicpimi, Jesusca cashna parlarca: —Shuc runami Jerusalenmanta Jericó puebloman shamucucpi, shuhuacuna japishpa huañucta macashpa, pai imalla charishcacunata churarishcacunacaman quichushpa rircacuna.

³¹ Chashna huañucta macashca siricucpipish, shuc Israel*f** cura chai ñanllatatac shamushpaca, chai siricuc runata ricushpapish, caru caruta pasashpa rircallami.

³² Curacunata ayudac levita runapish, chai ñanllatatac shamushpa chai siricuc runata ricushpapish, shinallatacmi pasashpa rircalla.

³³ Ashtahuanpish chai q'uipaca, Samaria*f** llactamanta shuc runapish chai ñanllatatac shamushpa, chai siricuc runata ricushpaca mai llaquirishpami,

³⁴ chai runapacman cuchuyashpaca, chugricunata aceitehuan, vinohuan jambishpa, pañuhuan pilluchirca. Chashna ruhuashpaca, paipac burropi tiyachishpami, shuc pozana huasiman apashpa chaipi alli cuidarca.

³⁵ Cayandic punzha chai Samaria runa ña rigrishpaca, ishcai denario*f** cullquita chai huasiyucman cushpami: ‘Cai runata cuidashpa cungui. Cai cullquimanta yalli imapi yaicucpipish, ñuca cutimushpaca cushallami’ nishpami saquirca.

³⁶ Cunan cambac yuyaipica, chai ñanta ricuc quimsa runacunapuramantaca, ¿maijantac chai shuhuacuna macashca runataca quiquinta shina c'uyashca yuyachin?— nishpami, Jesusca tapurca.

³⁷ Chashna tapucpi chai yachachic runaca: —Shuhuacuna macashca runata llaquic runayari— nirca. Shina nicpi Jesusca: —Canpish chashnallatac c'uyashpa causagri— nirca.

Ñañandicpura Martapac, Mariapac huasiman Jesús rishcamanta

³⁸ Chai q'uipaca Jesús paipac yachacuccunandic rishpami, asha huasicuna tiyacman chayarcacuna. Chaiman chayacpica, Marta huarmimi paipac huasipi Jesustaca parachirca.

³⁹ Martaca María shuti ñañantami charirca. Mariaca Jesuspac ñaupapimi imalla yachachishcata uyangapac tiyarirca.

⁴⁰ María tiyacucpica, Martaca caita chaita ruhuana yuyaillami ucupica carca. Chaimantami Jesuspacman cuchuyashpaca: —Apunchic Jesús, ñuca ñañanca cai tucui ruhuanacunata ñucallaman saquishcataca, ¿manachu ricungui? Ñucata ayudachun cachaiyari— nirca.

⁴¹ Ashtahuanpish Jesusca: —Marta, Marta, canca ucupi imata ruhuanacunallapimi shunguta churashcangui.

⁴² Tucuimanta yallica, shucllatami ruhuana cangui. Mariaca allitami yuyarishca. Pai chashna uyasha nictaca, pi mana jarcangachu— nirca.