SAN JUAN 9 - Nuevo Testamento en Quichua Cañar 1996

Ñahui mana ricuc huacharishca runata Jesús alliyachishcamanta

¹ Jesús chaimanta rishpaca, huacharishca pachamanta ñahui mana ricuc shuc runatami ricurca.

² Chaita ricushpami, Jesuspac yachacuccunaca: —Yachachic, ¿ima nishpatac cai runaca ñahui mana ricuc huacharirca? ¿Taita mamapac juchamantachu, mana cashpaca paipac juchallamantachu shina huacharishca canga?— nishpa tapurcacuna.

³ Shina tapucpimi, Jesusca cashna nirca: —Paica mana paipac juchamanta, shinallatac mana paipac taita mamapac juchamantachu chashnaca tucushca, ashtahuanpish Taita Dios imata ruhuana cashcata cai runapi ricuchingapacmi, chashnaca huacharirca.

⁴ Punzha tiyacpiracmi, ñucata Cachacpacta imatapish ruhuana canchic. Ña tutayacpica, pi imata mana ruhuangachu.

⁵ Cai pachapi cashcacamanca cai pachapi causaccunata achicyachic luzmi cani— nirca.

⁶ Chashna nishca q'uipami, Jesusca pambapi t'ucashpa turuta ruhuashpaca, ñahui mana ricuc runapac ñahuipi llutarca.

⁷ Shina ruhuashca q'uipaca: —Cunanca ri, chai Siloé nishca uchilla cucha ruhuashca yacupi jahuarigri— nirca. (“Siloé” nishpaca, “cachashca” nisha ninmi). Chai ñahui mana ricuc runa jahuaringapac rishpaca, ña ricucuc ñahuihuanmi cutimurca.

⁸ Chai runapac cuchullapi causaccunapish, imatapish mañashpa tiyacta ricuccunapish chaita ricushpaca: —Cai runaca, ¿manachu imatapish mañashpa tiyacuclla carca?— ninacurcacuna.

⁹ Maijancunaca: —Ari, paimi— shinallatac maijancunaca: —Mana paichu. Shina cashpapish, paillatacmi yuyachin— ninacurcacunami. Shina ninacucpi paica: —Ari, ñucallatacmi cani— nircami.

¹⁰ Shina nicpi paicunaca: —¿Ima shinatac ñahuica pascarirca?— nishpami tapurcacuna.

¹¹ Shina nicpi, pai huillashpaca: —Chai Jesús nishca runami turuta ruhuashpa ñahuipi llutarca. Chashna ruhuashpaca: ‘Ri, Siloé uchilla cuchapi jahuarigri’ nirca. Chashna rishpa ñahuita jahuarishpaca, ña ricurcanillami— nirca.

¹² Chashna nicpi paicunaca: —¿Maipitac chai runaca?— nircacuna. Shina nicpi paica: —Mana yachanichu— nirca.

Ñahui mana ricuc cashca runaman fariseocuna tapushcamanta

¹³ Chai ñahui mana ricuc cashca runataca fariseocunapacmanmi*f** pusharcacuna.

¹⁴ Jesusca samana punzhapimi*f** chai runataca alliyachishca carca.

¹⁵ Chai fariseocunapish tapushpaca: —¿Ima shinatac cunanca ricucungui?— nircacuna. Shina nicpi paica: —Turutami ñahuipi llutarca. Chashna ruhuacpica, jahuarircanimi. Chaimantami cunanca ricucuni— nirca.

¹⁶ Shina nicpi maijan fariseocunaca: —Samana punzhata mana cazushpa, caita ruhuacca mana Diosmantachu shamushca canga— nircacuna. Cutin maijancunaca: —Shuc juchayuc runaca, ¿ima shinatac pi mana ruhuaipaccunataca ruhuangayari?— nircacuna. Chashna ninacushpami, paicunapura ch'icanyarinacui tiyarca.

¹⁷ Cutinllatac chai ñahui mana ricuc cashca runaman fariseocuna tapushpaca: —Cambac ñahuita alliyachic runataca, ¿canca imatatac ningui?— nircacuna. Shina nicpi paica: —Diosmanta huillacmi— nirca.

¹⁸ Ashtahuanpish mandac israelcunaca*f** pai ñahui mana ricuc cashpa, cunan ñahui ña ricucushcataca mana crircacunachu. Chaimantami paipac taita mamatapish c'ayachircacuna.

¹⁹ Shina c'ayachishpaca: —¿Caitachu cancunaca ñahui mana ricuc huacharishca huahua ninguichic? ¿Cunanca ima shinatac ricucunyari?— nishpa tapurcacuna.

²⁰ Shina tapucpi, paipac taita mamaca: —Ari, caica ñucanchic huahuami. Pai ñahui mana ricuc huacharishcataca yachanchicmi.

²¹ Shina cashpapish ima shina cunan pai ricucushcatapish, pai ricuchun pi ñahuita alliyachishcatapish, ñucanchicca mana yachanchicchu. Paillamantac tapuichic. Paica ña juizhu runami. Paimi ima cashcatapish ninga— nircacuna.

²² “Maijanpish ‘Jesusca Quishpichic Cristomi’ nishpa huillacpica, israelcunapac tandanacuimanta llucchishpa cachashcami canga” nishpami, mandac israelcunaca ñaupaman yuyarinacushca carca. Chaimantami mandac israelcunata manchashpa, taita mamaca chashna nirca.

²³ Shina cashcamantami paipac taita mamaca: “Paillamantac tapuichic. Paica juizhu runami” nircacuna.

²⁴ Shina nicpi, cutin chai ñahui mana ricuc cashca runata mandac israelcuna c'ayashpaca: —Diospac ñaupapi mana llullashpa huillai. Ñucanchicca chai runataca juchayuc cashcatami yachanchic— nircacuna.

²⁵ Shina nicpi paica: —Chai runaca juchayucchari, manachari juchayuc, chaitaca mana yachanichu, ashtahuanpish ñuca ñahui mana ricuc cashcata alliyachicpi, cunan ricucushcallatami yachani— nirca.

²⁶ Shina nicpi, paicuna cutin tapushpaca: —¿Imatatac ruhuarca? ¿Ima shinatac ñahuita alliyachirca?— nircacuna.

²⁷ Shina nicpi paica: —Ña huillanicarin. ¿Manachu uyanguichic? ¿Ima nishpatac cutin huillachun ninguichic? ¿Cancunapish paita c'aticcunachu tucushun ninguichic?— nirca.

²⁸ Shina nicpi, paicuna p'iñarishpaca: —Canmi paita c'atic cangui. Ñucanchicca Moisesta c'aticcunami canchic.

²⁹ Moisesman Taita Dios rimashcataca yachanchicmi, ashtahuanpish chai runataca pai maimanta cashcallatapish mana yachanchicchu— nircacuna.

³⁰ Shina nicpi, chai runaca cashnami nirca: —Pai maimanta shamushcata cancuna mana yachanaca shuc mancharinami. Paimi ñuca ñahuita alliyachirca.

³¹ Diosta mana cazuccuna mañashcata Taita Dios mana uyac cashcataca, allimi yachanchic. Ashtahuanpish maijan paita cazushpa pai munashcata ruhuac mañashcataca uyanmi.

³² Ñahui mana ricuc huacharishca shuc runata alliyachishcataca, jaicapi pi mana uyashcachu.

³³ Chai runa mana Diosmanta shamushca cashpaca, imatapish mana ruhuanmanchu— nirca.

³⁴ Shina nicpi paicunaca: —Canca juchasapami huacharishcangui. ¿Chashna cashca jahuachu ñucanchicta juchanchisha ningui?— nircacuna. Chashna nishpami, paitaca paicunapac tandanacuimanta llucchishpa cacharcacuna.

Diosta mana ricsicca ñahui mana ricuc shina cashcamanta

³⁵ Chai ñahui mana ricuc cashca runata tandanacuimanta llucchishpa cachashcata Jesús yachac chayashpaca, paita mashcarcami. Ña tupashpaca: —¿Canca Runa Tucungapac shamushcataca*f** cringuichu?— nishpa tapurca.

³⁶ Shina tapucpi paica: —¿Pitac chaica, ñuca paita cringapac, amito?— nirca.

³⁷ Shina nicpi Jesusca: —Ña ricucunguillatacmi. Ñuca canhuan rimacucllatacmi cani— nirca.

³⁸ Shina nicpi, paica cungurishpami: —Apunchic Jesús, crinimi— nirca.

³⁹ Chashna nishca q'uipami Jesusca: —Ñucaca cai pachapi causac gentecuna ima shina cashcata ricuchingapacmi shamurcani. Ñahui mana ricuc shina causaccuna ricuchun, shinallatac ricuccunaca mana ricuc shina tucuchunmi shamurcani— nirca.

⁴⁰ Maijan fariseocuna*f** chaita uyashpaca: —¿Shinashpaca ñucanchicpish ñahui mana ricuccunachu canchic, imatacyari?— nishpa tapurcacuna.

⁴¹ Shina nicpi Jesusca: —Cancuna ñahui mana ricuccuna cashpaca, manachari juchayuccuna canguichicman. Ashtahuanpish ‘ñahuihuan ricushpami causacunchic’ nishcamantacarin, juchayuccunami canguichic— nirca.