SAN JUAN 7 - Nuevo Testamento en Quichua Cañar 1996

Jesuspac quiquin huauquicuna paita mana crishcamanta

¹ Chai q'uipaca, Galilea llactapimi Jesusca puricurca. Mandac israelcuna*f** huañuchishun nishpa chapacushcamantami, Judea llactapi canataca mana munarca.

² Israelcuna carpa huasipi Diosman mañana punzhacunaca ñami chayamucurca.

³ Chaipimi Jesuspac huauquicunaca cashna nirca: —Caimanta llucshishpa Judea llactaman ri, canta c'aticcuna chaipipish can imalla ruhuashcata ricuchunca.

⁴ Pi mana ruhuaipaccunata shuctac llactacunapipish ruhuashpa, gentecunaman ricuchiyari. Maijanpish alli ricurisha nishpaca, mana pacallapi imatapish ruhuanchu— nircacuna.

⁵ Jesuspac quiquin huauquicunapish paitaca mana crircacunachu. Chaimantami Jesusca cashna nirca:

⁶ —Ñuca caimanta rina pachaca manarac pactanchu. Cancunapac rinami ima pachapish rinalla.

⁷ Cai pachapi causaccunaca cancunataca mana p'iñanchu, ashtahuanpish paicuna mana allita ruhuashcata ñuca huillashcamantami, ñucataca p'iñancuna.

⁸ Chai fiestamanca richiclla. Ñuca rina pacha manarac chayamushcamantami, ñucaca mana rini— nirca.

⁹ Chashna nishpaca, Galilea llactallapitacmi saquirirca.

Israelcunapac fiesta punzhacunapi Jesús yachachishcamanta

¹⁰ Shina saquirishpapish, paipac huauquicuna fiestaman rishca q'uipaca, Jesuspish rircami. Shina rishpapish, mana pi yachacllapimi pacalla rirca.

¹¹ Mandac israelcuna*f** chai fiestapi mashcashpaca: —Chai runaca, ¿maipishi canga?— nishpami, gentecunaman tapurcacuna.

¹² Gentecunapurapica caishuc chaishuc parlanacushpaca: “Chai runaca alli runami” nircacunami. Cutin maijancunaca: “Paica mana alli runachu. Gentecunata umashpami purin” nircacunami.

¹³ Shina ninacushpapish, mandac israelcunata manchashcamantami, pipish imata mana nishpa paicunapuralla Jesusmantaca parlanacurcacuna.

¹⁴ Chai fiesta punzhacuna ña chaupiyamucucpimi, Jesusca Diosman mañana huasiman yaicushpa yachachi callarirca.

¹⁵ Jesús shina yachachicpimi, israelcunaca mana amirishpa: —Cai runaca yachacungapacllapish mana rishpaca, ¿ima shinashi cai tucuitaca yachanlla?— nircacuna.

¹⁶ Shina nicpi Jesusca cashnami nirca: —Ñuca yachachishcaca mana ñuca munaimantachu, ashtahuanpish ñucata cachac Taita Diosmantami.

¹⁷ Maijanpish Diospacta ruhuana munaita chariccunami, ñuca yachachishcaca ñuca quiquin munaimanta cashcata, mana cashpaca Diosmanta cashcata yachac chayancuna.

¹⁸ Quiquin munaillamanta rimacca, gentecunapi alli llucshingaraicullami riman. Shina cacpipish Cachacta allipi llucchicmi, imapish cashcata nin. Paica jaicapi mana llullanchu.

¹⁹ Moisesmi cancunamanca mandashcacunataca curca. Shina cacpipish cancunapurapica shucllapish mana cazunguichicchu. ¿Ima nishpatac ñucataca huañuchishun ninguichic?— nirca.

²⁰ Shina nicpi gentecunaca: —¡Supai japishcami cangui! ¿Pitac cantaca huañuchisha nicun?— nircacuna.

²¹ Shina nicpimi, Jesusca cashna nirca: —Samana punzhapi*f** pi mana ruhuaipacta ñuca ruhuacta ricushpami, tucui cancunaca mana amiringuichic.

²² Shina cacpipish Moisesca: ‘Circuncisiontaca*f** ruhuachinami canguichic’ mandashcami. Chaitaca mana Moiseschu mandarca, ashtahuanpish cancunapac ñaupa taitacunami chaitaca ruhuachiccuna carca. Chaitami cancunaca samana punzha cachunpish, c'ari huahuacunataca circuncisionta ruhuachinguichic.

²³ Cancunaca Moisés mandashcata mana p'aquingaraicumi, samana punzhapipish circuncisionta ruhuachinguichic. Shinashpaca, ¿ima nishpatac samana punzhapi ungushca runata ñuca alliyachishcamantaca p'iñaringuichic?

²⁴ Ñahuita ricushpalla ama juchanchinguichicchu. Ima juchanchina cacpica, imatapish cashcatatac ricushpa juchanchinguichic— nirca.

Pai maimanta cashcataca Jesusllatac parlashcamanta

²⁵ Chai pachallatacmi Jerusalén pueblopi causac maijan israelcuna*f** parlanacushpaca: —¿Manachu cai runaca huañuchingapac mashcacushca runa?

²⁶ Riquichic, cunanca chaipimi tucuipac ñaupapi, pipish mana imata nishca rimaricun. ¿Paitaca mandaccunapish Quishpichic Cristomi nishpachu crincuna?

²⁷ Shina cacpipish ñucanchicca pai maimanta cashcataca yachanchicmi. Ashtahuanpish shamuna cashca Quishpichic Cristo shamucpica, maimanta shamushcataca pi mana yachangachu— ninacurcacuna.

²⁸ Chaita uyashpaca, Diosman mañana huasi ucupi yachachicushpami Jesusca sinchita cashna nirca: —Ñuca maimanta cashcatapish, pi cashcatapish yachanchicmi nishpami yuyanguichic. Shina cacpipish ñuca quiquinllamantatacca mana shamurcanichu, ashtahuanpish cashcata ruhuac Taita Dios cachacpimi shamurcani. Paitaca cancunaca mana ricsinguichicchu.

²⁹ Taita Dios cachashca, paimanta shamushca cashcamantami, paitaca ricsini— nirca.

³⁰ Jesusta manarac prezuna pacha chayamushcamantami, prezushun nicushpapish paitaca pi mana japirircacuna.

³¹ Chaipi cac achca gentecuna paita crishpami: —Quishpichic Cristo shamushpaca, ¿cai runa ruhuashcamanta yallichu pi mana ruhuaipaccunataca ruhuanga, imashi?— nircacuna.

Fariseocuna Jesusta prezushun nishcamanta

³² Gentecuna Jesusta cashnami, chashnami ninacucta fariseocuna*f** uyashpami fariseocunapish, curacunata mandac curacunapish soldadocunata japimuchun cacharcacuna.

³³ Chaimantami Jesusca cashna nirca: —Ashacamanllami cancunahuanca cagrini. Q'uipataca ñucata Cachacpacmanmi rigrini.

³⁴ Ñuca maipi cashcamanca mana chayanata pudinguichicchu. Chaimantami cancunaca ñucata mashcashpapish manatac taringuichic— nirca.

³⁵ Shina nicpi, chai israelcunaca*f** paicunapura caishuc chaishuc tapunacushpaca: —Ñucanchic mana tarichunca, ¿maimanshi risha nin? Ñucanchicpuramanta Grecia llactapi chagrurishpa causaccunapacman rishpa, ¿chaipi mana israelcunamanchu yachachisha nin, imashi?

³⁶ ‘Ñuca maipi cashcamanca mana chayanata pudinguichicchu. Chaimantami cancunaca ñucata mashcashpapish mana taringuichic’ nishpaca, ¿imatashi nisha nin?— ninacurcacuna.

Causaita cuc yacumanta

³⁷ Carpa huasipi Diosman mañana punzhacuna ña tucurimucucpica, tucuita yalli jatun punzhami carca. Chai punzhapimi Jesusca jatarishpa sinchita rimashpaca: —Maijanpish yacunachicca ñucapacman shamushpa, yacuta ubiaichic.

³⁸ Dios quillcachishcapica: ‘Maijanpish ñucata cricpac shungumantaca, causaita cuc yacu shinami llucshinga’ ninmi— nirca.

³⁹ Jesús chashna nishpaca, Diospac Espirituta paita criccuna chasquina cashcatami nisha nirca. Jesusta Taita Dios manarac jahua pachaman pushacpimi, Diospac Espirituca manarac shamushca carca.

Gentecuna caita chaita yuyashcamanta

⁴⁰ Chaita uyashpami maijan gentecunaca: —Cai runacarin ñucanchic shuyacushca Diosmanta huillactacmi— nircacuna.

⁴¹ Cutin shuccunaca: —Paica Quishpichic Cristomi— nircacunami. Shina cacpipish maijancunaca: —Quishpichic Cristoca mana Galilea llactamantaca shamungachu.

⁴² ¿Manachu Dios quillcachishcapica: ‘Quishpichic Cristoca mandac Davidpac aillupuramanta, pai huacharishca Belén pueblomanta shamunga’ nin?— nircacuna.

⁴³ Chashnami gentecunapurapica shucca shuctac, shucca shuctac yuyashpa ch'icanyarinacui tiyarca.

⁴⁴ Maijancunaca Jesusta prezu apashun yuyacushpapish, pi mana imata ruhuarcachu.

Mandac israelcuna Jesusta mana crishcamanta

⁴⁵ Ña chai japichun cachashca soldadocuna fariseocunapacman,*f** curacunata mandac curacunapacman cutimucpi paicunaca: —¿Ima nishpatac Jesustaca mana japimunguichic?— nircacuna.

⁴⁶ Shina nicpi soldadocunaca: —Pai rimashca shinaca, jaicapi pi mana rimashcachu— nircacuna.

⁴⁷ Shina nicpi fariseocunaca: —¿Cancunatapish chai runaca crichircachu?

⁴⁸ ¿Mandac israelcunapish,*f** ñucanchic fariseocunapuramantapish crishcachu, imatacyari?

⁴⁹ Shina cacpipish Moisés mandashcacunata mana yachashpa causac gentecunaca, Dios mana alli nishca gentecunami— nircacuna.

⁵⁰ Shina ninacucpimi, shuc tuta Jesuspacman ric, fariseocunapuramanta Nicodemo shuti runaca:

⁵¹ —Ñucanchicta mandashcapi nishca shinaca, ima ruhuashcata manarac alli yachashpaca, pitapish mana juchanchinallachu canchic— nirca.

⁵² Shina nicpi paicunaca: —Shinashpaca, ¿canpish Galilea llactamantachu cangui? Shina cashpaca, Dios quillcachishcata ricui. Chaipica: ‘Pi Diosmanta huillacca mana Galileamanta shamushcachu’ ninmi— nircacuna.

⁵³ Chai q'uipaca gentecunaca quiquin huasiman rircacunallami.