SAN JUAN 4 - Nuevo Testamento en Quichua Cañar 1996

Samaria llacta huarmihuan Jesús parlashcamanta

¹ “Jesusca tauca c'aticcunata charin, shinallatac Juanta atishpami bautizacun” nishpa fariseocuna*f** puricushcatami, Jesusca yachac chayarca.

² Shina nicucpipish, Jesusca mana bautizacchu carca, ashtahuanpish paipac yachacuccunami bautizac carca.

³ Chaita yachashpami, Jesusca Judea llactamanta llucshishpa, Galilea llactaman cutin rirca.

⁴ Chaiman ringapacca Samaria llactatami rina carca.

⁵ Chashna ricushpaca, Samaria llactapi tiyac, Sicar pueblomanmi chayarca. Chai puebloca ñaupa taita Jacobo paipac churi Joseman cushca allpa cuchullapimi carca.

⁶ Chaipimi ñaupa taita Jacobopac yacu junduca tiyarca. Ña chaupi punzha shina cacpimi, Jesusca shaicushca cashpa, yacu jundu cuchullapi samaringapac tiyarirca.

^7-8 Chai pachaca paipac yachacuccunaca micunatami randingapac puebloman rishca carca. Jesús chaipi tiyacucpimi, Samaria llactamanta huarmica yacuta apangapac chayarca. Chaipimi Jesusca: —Ashalla yacuta carai— nirca.

⁹ Chashna nicpi chai huarmica: —¿Ima shinatac canca israelcunapura*f** cashca jahua ñucamanca yacuta mañangui? Ñucaca Samaria huarmimi cani— nirca. Israelcunaca Samaria llactapi causaccunahuan mana apanacuc cashcamantami, chashnaca nirca.

¹⁰ Shina nicpi Jesusca: —Canca Taita Dios imata cusha nicushcatapish, shinallatac pi yacuta mañacushcatapish mana yachanguichu. Yachashpacarin, canracmi ñucaman ‘yacuta carai’ nishpa mañanguiman. Chashna mañacpica, causaita cuc yacutami cuiman— nirca.

¹¹ Shina nicpi, chai huarmica cashnami nirca: —Amito, yacu jundupish ucumi. Imahuan huishinallatapish, mana charinguica. Shina cashpaca, ¿ima shinatac causaita cuc yacutaca cunguiyari?

¹² Cai yacu jundutaca ñucanchic ñaupa taita Jacobomi saquirca. Caillamantatacmi paipish, paipac huahuacunapish ubiaccuna carca. Shinallatac animalcunamanpish, caillamantatacmi ubiachiccuna carca. ¿Canca taita Jacobotapish atishpachari, ashtahuan yalli canguiyari?— nirca.

¹³ Shina nicpi Jesusca: —Maijanpish cai jundumanta yacuta ubiashpaca, cutin yacunachingami.

¹⁴ Ashtahuanpish ñuca cusha nishca yacuta maijanpish ubiacca, jaicapi mana yacunachingachu. Ñuca cusha nishca yacuca paipica huiñai causaita cuc, tucyacuc yacu shinami tiyanga— nirca.

¹⁵ Shina nicpi chai huarmica: —Shinashpaca amito, ama cutin cai jundumanta yacuta apac shamungapac, shinallatac ama cutin yacunachingapacpish, chai yacuta cuiyari— nirca.

¹⁶ Shina nicpi Jesusca: —Ri, cambac cusata c'ayamugri— nirca.

¹⁷ Shina nicpi chai huarmica: —Ñucaca mana cusayucchu cani— nirca. Shina nicpi Jesusca: —‘Mana cusayucchu cani’ nishpaca, allillatatacmi ningui.

¹⁸ Canca pichca cusatami charircangui. Cunan canhuan causacuc runapish, mana cambac cusachu. Shina nishpaca, mana llullashcanguichu— nirca.

¹⁹ Shina nicpi chai huarmica: —Amito, canca Diosmanta huillacmi yuyachingui.

²⁰ Ñucanchic ñaupa taitacunaca, cai urcupimi Taita Diosman mañangapac tandanacuccuna carca. Cutin cancunaca ‘Jerusalenpimi Taita Diosman mañana canchic’ ninguichicmi— nirca.

²¹ Shina nicpimi, Jesusca chai huarmitaca cashna nirca: —Cai ñuca nishcataca criyari: Mana cai urcullapi, mana Jerusalenllapi Taita Diosman mañana punzhacuna chayamucunmi.

²² Samaria llactapi causac cancunaca Taita Diosman mañangapac tandanacushpapish, piman mañacushcata mana yachanguichicchu. Ñucanchicca piman mañacushcataca yachanchicmi. Taita Diosca israelcunapuramantami Quishpichicta cachasha nishca.

²³ Taita Diosman mana nic tucushpalla mañana punzhaca ñami chayamucun, cunanllatacmi chai punzhaca. Shina cacpica, Diospac Espíritu yuyaita cucpimi, Taita Dios ima shina cashcata yachashpatac mañangacuna. Chashna mañaccunatami Taita Diosca munan.

²⁴ Taita Diosca Espiritumi. Shina cashcamantami paiman mañaccunaca Diospac Espíritu yuyaita cucpi, pai ima shina cashcata yachashpatac mañana can— nirca.

²⁵ Shina nicpi chai huarmica: —Quishpichic Cristo nishca Mesías shamuna cashcataca yachanimi. Pai shamushpami, tucuita alli huillanga— nirca.

²⁶ Shina nicpi Jesusca: —Chaica canhuan parlacucllatacmi cani— nirca.

²⁷ Shina parlacucpimi, paipac yachacuccunaca cutimushpa, chai huarmihuan Jesús parlanacucucta ricushpa mana amirircacuna. Chashna cacpipish: “¿Imatatac tapucungui? ¿Imatatac chai huarmihuanca parlacungui?” nishpaca, pi mana imata tapurcachu.

²⁸ Chai huarmica yacuta apana puñuta chaipi saquishpami, puebloman cutishpa, chaipi causac gentecunamanca:

²⁹ —Shamuichic, shuc runata ricunguichic. Paica tucui ñuca imata ruhuashpa causacushcatami huillan. ¿Manachu paica Quishpichic Cristo canga?— nirca.

³⁰ Shina huillacpimi, chai pueblomantaca llucshishpa, Jesushuan tupangapac shamurcacuna.

³¹ Chai gentecuna manarac chayamucpimi, Jesuspac yachacuccunaca: —Yachachic, micuiyari— nircacuna.

³² Shina nicpi Jesusca: —Ñucaca cancuna mana ricsishca micunatami charini— nirca.

³³ Shina nicpimi yachacuccunaca: —¿Pishi micunata carashca canga?— ninacurcacuna.

³⁴ Shina nicpi, Jesusca cashnami nirca: —Ñuca micuna shinaca ñucata cachac Taita Diospac munaita ruhuanami, shinallatac pai imata ruhuachun nishcata tucuchinami.

³⁵ Cancunaca: ‘Chairac chuscu quillami grano tandanapacca tiyan’ ninguichicmi. Chashna cacpipish ñucaca: Chagrata alli ricushpaca, grano ña tandanalla cashcata ricuichic, ninimi.

³⁶ Granota tandacca, japina cashcata charinmi. Shinallatac chai tandashca granoca huiñai causaipacmi. Chaimantami granota tandacca tarpuc-huan ishcai tucushpa cushicunga.

³⁷ Gentecuna nishca shinaca shucca tarpun, shucca granota tandacmi. Chaica chashnatacmi.

³⁸ Ñucaca cancunataca mana cancuna trabajashca chagrapi granota tandachunmi cachani. Shuccunami llaquita apashpa trabajarcacuna. Shina cacpipish cancunami chai trabajashcamantaca japiccuna canguichic— nirca.

³⁹ Chai huarmi “ñuca imata ruhuashpa causacushcatami huillan” nishcata uyashpami, Samaria llactapi tiyac pueblopi causac gentecunaca: “Jesusca Quishpichicmi” nishpa crircacuna.

⁴⁰ Chashna crishpami, gentecunaca Jesuspacman shamushpa: “Caillapi saquiriyari” nishpa mañarcacuna. Shina mañacpimi, Jesusca ishcai punzhata chaipi saquirirca.

⁴¹ Pai quiquin ima nishcata uyashpacarin, ashtahuanmi achcacuna crircacunami.

⁴² Chaimantami chai huarmitaca: —Cunancarin mana can huillashcallamantachu crinchic, ashtahuanpish ñucanchicllatac pai ima nishcataca uyashcanchic. Chaimantami cai pachapi causaccunata quishpichingapac shamushca cashcatatac yachanchic— nircacuna.

Shuc mandacpac churita Jesús alliyachishcamanta

⁴³ Jesús Samaria llactapi ishcai punzhata cashca q'uipaca, chaimanta llucshishpami Galilea llactaman rirca.

⁴⁴ “Diosmanta huillactaca quiquin llactallapitac mana alli chasquishcachu canga” nishpami, Jesusllatac ña huillashca carca.

⁴⁵ Galilea llactapi causaccunaca Jerusalenman rishpa Jesús pascua*f** punzhacunapi tucui imallata ruhuashcata ricushcamantami, paicunapac llactaman Jesús chayacpica, cushicushpa chasquircacuna.

⁴⁶ Jesusca Galilea llactapi tiyac Caná pueblomanmi cutimurca. Chai pueblopimi yacumanta vinota ruhuashca carca. Chaipimi jatun mandac churashca mandacpish causarca. Paipac churica Capernaum pueblopimi ungushca carca.

⁴⁷ Jesús Judea llactamanta Galilea llactaman shamushcata yachashpami, chai mandacca paipacman rishpaca: —Ñuca churimi ña huañugricun. Chaimanta ñuca huasiman rishpa, alliyachishpa cui— nishpa, mailla mañarca.

⁴⁸ Chashna mañacpimi Jesusca: —Pi mana ruhuaipaccunata ruhuacta manarac ricushpaca, ñuca alliyachinataca mana cringuichicchu— nirca.

⁴⁹ Shina nicpi chai mandacca: —Amito, utca jacu. Ñuca churi atishpa huañungami— nirca.

⁵⁰ Shina nicpi Jesusca: —Huasiman cutilla. Cambac churica ñami alli— nirca. Chashna nishcata uyashpaca, crishpami huasiman cutircalla.

⁵¹ Pai ña huasiman cuticucpica, paipac serviccuna tupangapac llucshishpaca: —Cambac churica ñami alli tucun— nircacuna.

⁵² Chashna huillacpica: —¿Ima horasmantatac alli tucurcayari?— nishpa tapucpica: —Caina chaupi punzha shina yallitami fiebreca p'itirirca— nircacuna.

⁵³ Chaimantami ungushca huahuapac taitaca, chai horasllapitacmi Jesusca: “Cambac churica ñami alli” nishcata yuyarishpa paipish, paipac tucui huasi ucupuracunandic Jesusta crircacuna.

⁵⁴ Caihuanca ña ishcai cutinmi Jesusca Judea llactamanta Galilea llactaman shamushpaca, pi mana ruhuaipacta ruhuarca.