SAN JUAN 3 - Nuevo Testamento en Quichua Cañar 1996

Nicodemo runa Jesushuan parlashcamanta

¹ Fariseocunapuramanta*f** Nicodemo shuti shuc runami tiyarca. Paica israelcunapurapica*f** alli nishcami carca.

² Paimi Jesuspacman tuta rishpaca: —Yachachic. Ñucanchicca can Dios cachashca yachachingapac shamushcataca yachanchicmi. Pipish can ruhuacuc shina, pi mana ruhuaipaccunataca mana Dioshuan cashpaca, mana ruhuanmanchu— nirca.

³ Shina nicpi Jesusca: —Maijanpish mana cutin huacharicca, Taita Dios mandacuctaca mana ricungachu. Chaica chashnatacmi canga— nirca.

⁴ Shina nicpi Nicodemoca: —¿Ima shinatac shuc yuyac runaca cutin huacharingayari? ¿Maitatac cutin mamapac huicsapica yaicungayari?— nirca.

⁵ Shina nicpi, Jesusca cashnami nirca: —Maijanpish yacuhuan, Diospac Espirituhuan mana huacharicca, Dios mandacucmanca manatac yaicungachu. Chaica chashnatacmi canga.

⁶ Aichayuc, tulluyucmanta huacharicca, aichayuc tulluyucllatacmi. Ashtahuanpish Diospac Espiritumanta huacharicca, Diospac Espiritutami charin.

⁷ ‘Cutin huacharinami can’ nishcamantaca, ama mancharinguichu.

⁸ Huairaca maimanta cashpapish p'ucunllami. Shina p'ucucpi uyashpapish, maimanta shamuctapish, maiman rictapish mana yachanguichu. Shinallatacmi Diospac Espiritumanta huachariccunaca— nirca.

⁹ Shina nicpi Nicodemoca: —¿Ima shinatac chashnaca tucungayari?— nirca.

¹⁰ Shina nicpi, Jesusca cashnami nirca: —¿Canca israelcunapurapi yachachic cashca jahuachu, caicunataca mana yachangui?

¹¹ Ñucanchicca imatapish yachashcatami ninchic, shinallatac imata ricushcatami huillanchic. Shina cacpipish, ñucanchic ima nishcataca mana cringuichicchu. Chaica chashnatacmi can.

¹² Cai pachapi ima tiyashcamanta huillacpi mana crishpaca, ¿ima shinatac jahua pachamanta huillacpica cringuichicyari?

¹³ Jahua pachamanca pi mana rishcachu, ashtahuanpish Runa Tucungapac shamushca*f** ñucallami jahua pachamantaca shamurcani. Ñucami jahua pachapi causacca cani.

¹⁴ Ima shinami Moisés shitashca pambapi broncemanta ruhuashca culebrata caspipi jahuaman huarcushpa ricuchirca, shinallatacmi Runa Tucungapac shamushca ñucapish, caspipi jahuaman huarcushca cana cani.

¹⁵ Maijanpish ñucata cricca huiñai causaita charichunmi, chashna ruhuashca cana cani.

Cai pachapi causaccunata Taita Dios c'uyashcamanta

¹⁶ Taita Diosca cai pachapi causaccunata mai c'uyashpami, paipac shuclla Churita cai pachamanca cacharca. Pipish paita cricca ama chingarishpa huiñai causaita charichunmi, chashnaca cacharca.

¹⁷ Taita Diosca paipac Churitaca cai pachapi causaccunata llaqui pachaman cachachunca mana cacharcachu, ashtahuanpish cai pachapi causaccunata quishpichichunmi cacharca.

¹⁸ Maijanpish Diospac Churita crictaca llaqui pachamanca mana cachangachu, ashtahuanpish paipac shuclla Churita mana crictami, pai mana crishcamanta llaqui pachamanca cachanga.

¹⁹ Paicunaca mana allita ruhuacushcamantami Achicyachic shamucpipish, paita mana munashpa amsapi causacunallata ashtahuan munarcacuna. Chashna cashpami, paicuna millaita ruhuashcamantaca llaquita apangacuna.

²⁰ Tucui mana allita ruhuaccunami Achicyachictaca p'iñancuna. Paicunapac mana allita ruhuashcacuna ama achicman ricurichunmi, mana cuchuyashun nincuna.

²¹ Taita Dios munashcata ruhuashpa causacushcata ricuchunmi, cashcata ruhuashpa causaccunaca achicman cuchuyancunalla— nirca.

Bautizac Juan huillashcamanta

²² Chai q'uipaca, paipac yachacuccunandicmi Jesusca Judea llactaman rirca. Tauca punzhacunata paicunahuan chaipi cashpami, gentecunata bautizarca.

²³ Bautizac Juanpish chai punzhacunallapitacmi, Salim llacta cuchullapi cac Enón llactapi achca yacu tiyashcamanta paipacman shamuc gentecunataca bautizacurca.

²⁴ Bautizac Juanta manarac carcelpi churacpimi, chashnaca tucurca.

²⁵ Chaipimi Juanta c'aticcunapuramanta maijancunaca, Israelmanta*f** shuc runahuan Diospac ñaupapi alli ricuringapac armarina*f** jahua rimanacurcacuna.

²⁶ Chaimanta Juanpacman rishpaca: —Yachachic. Jordán yacu chimbanicpi canhuan tupanacuc, chai can parlacushca runami bautizacun. Achca gentecunami paipacmanca shamucun— nircacuna.

²⁷ Chaita uyashpami Juanca cashna nirca: —Taita Dios imatapish mana munacpica, pipish imata mana ruhuanmanchu.

²⁸ ‘Ñucaca mana Quishpichic Cristochu cani, ashtahuanpish paipac ñaupata huillachun cachashcallami cani’ nishpa ñuca huillashcata, cancunallatacmi ña uyarcanguichic.

²⁹ Shuc bodapi cashpaca, noviaca noviopacmi. Noviopac shuc ricsishca chaipi cashpa, novio rimashcata uyashpaca cushicunmi. Shinallatacmi ñucapish Novio rimashcata uyashpaca, yallita cushicuni.

³⁰ Cunan punzhamanta pachami Quishpichic Jesusca punzhanta ashtahuan alli nishca cana can. Ashtahuanpish ñucaca punzhantami yangalla nishca cana cani— nirca.

Jahua pachamanta shamucca ima shina cashcamanta

³¹ Jahua pachamanta shamucmi tucuita yallica. Cai pachamanta cacca cai pachapi causaccuna shinallami. Shina cashpami, cai pachallamanta riman. Ashtahuanpish jahua pachamanta shamucmi tucuita yallica.

³² Paica imatapish ricushcacunallata, shinallatac imatapish uyashcacunallatami huillan. Shina cacpipish, pai huillashcataca pi mana crincunachu.

³³ Shina cashpapish pai huillashcata maijanllapish crishpaca, Taita Dios mana llullac cashcatami ricuchincuna.

³⁴ Taita Diosllatacmi pai cachashca cai pachaman shamucmanca, paipac Espiritutaca yallita cushca. Chaimantami paica Taita Diosmanta huillan.

³⁵ Taita Diosca paipac Churita c'uyashpami, tucuita pai mandachun cushca.

³⁶ Maijanpish paita cricca huiñai causaita charinmi. Maijanpish paita mana cricca mana huiñai causaita charinchu, ashtahuanpish paitaca Taita Diosca p'iñacungallami.