SAN JUAN 20 - Nuevo Testamento en Quichua Cañar 1996

Jesús causarishcamanta

¹ Semana callari domingo punzha manarac alli achicyamucucpimi, Magdala pueblomanta Mariaca maipi Jesusta enterrashcaman rirca. Pai chaiman chayashpaca, enterrashca pungupi churashca rumita anchuchishcatami ricurca.

² Chaita ricushpaca, Simón Pedropacman, shinallatac Jesús c'uyashca caishuc yachacucpacmanmi huillangapac callpashpa rirca. Chashna rishpa paicunapacman chayashpaca: —Apunchic Jesuspac cuerpotaca, maimanchari apashcacunami. Maipi churashcataca mana yachanichu— nirca.

³ Chaita uyashpaca Pedropish, caishuc yachacucpish maipi enterrashcapimi ricungapac rirca.

⁴ Ishcai tucushpami, ricungapacca yallita callparcacuna. Shina callpashpapish, caishuc yachacucmi ashtahuan callpashpa Pedrota atishpa, maipi enterrashcamanca chayarca.

⁵ Ña chayashpaca, mana yaicushpami, canzhallamanta cumurishpa cuerpota pillushca liensocunallata siricucta ricurca.

⁶ Chai q'uipata Pedro chayashpaca, yaicuctami rirca. Paipish cuerpota pillushca liensocuna siricucllatami ricurca.

⁷ Shinallatac Jesuspac umata pillushca liensopish mana caishuc liensocunahuan cashcata, ashtahuanpish ch'ican pillushca siricuctami ricurca.

⁸ Sepulturaman utca ñaupashpa chayac yachacucpish ucuman yaicushpami, tucui ima tucushcata ricushpa crirca.

⁹ Shina cacpipish, paicunaca Dios quillcachishcapi: “Paica causaringatacmi” nishpa huillashcataca manarac entendircacunachu.

¹⁰ Chai q'uipaca, yachacuccunaca huasimanmi rirca.

Magdala pueblomanta Mariaman Jesús ricurishcamanta

¹¹ Mariaca enterrashca pungullapitacmi huacashpa saquirishca carca. Chaipi huacashpa shayacushpami, cumurishpa ucuta ricurca.

¹² Chashna ricushpami, ishcai angelcunata shucca Jesuspac cuerpota churashca uma ladoman, shucca chaqui ladoman yuranlla churashca tiyacucta ricurca.

¹³ Chai angelcuna tapushpaca: —¿Ima nishpatac huacacungui?— nicpi paica: —Ñucata Mandac Apunchic Jesuspac cuerpotami maimanchari apashcacuna. Maipi churashcata mana yachanichu— nirca.

¹⁴ Chashna nishcahuan huashata ricucpica, Jesusmi chaipi shayacushca carca. Shina ricushpapish, Jesús cashcataca mana yacharcachu.

¹⁵ Jesusca chai huarmitaca: —¿Ima nishpatac huacacungui? ¿Pitatac mashcacungui?— nirca. Shina nicpi, chai huarmica “huertata cuidacmi canga” yuyashpami: —Amito, can maipi churangapac apashca cashpaca huillai, ñuca mashcangapac ringapac— nirca.

¹⁶ Chashna nicpi Jesusca: —¡María!— nirca. Shina nicpi pai tigrarishpaca, hebreo*f** rimaipimi: “¡Raboni!” nirca. “Raboni” nishpaca, “yachachic” nisha ninmi.

¹⁷ Shina nicpi Jesusca: —Ñucaca manarac ñuca Taitapacman huichiyanichu. Chaimanta ama ashtahuan tuparichu. Shina cacpipish ri, ñuca yachacuccunamanca: ‘Ñucaca ñucapacpish, cancunapacpish Taitapacman, shinallatac ñucapacpish, cancunapacpish Diospacmanmi huichiyagrini’ ninmi, nishpa huillagri— nirca.

¹⁸ Chashna nicpi, Magdala pueblomanta María rishpaca, Apunchic Jesusta ricushcatapish, imata pai nishcatapish tucuimi paipac yachacuccunamanca huillarca.

Yachacuccunaman Jesús ricurishcamanta

¹⁹ Semana callari chai domingo punzhapitacmi ña tutayamugricucpi, yachacuccunaca mandac israelcunata*f** manchashcamanta pungucunata huichcarishpa, tucui tandarishpa tiyacurcacuna. Chashna cacpimi, Jesús paicunapacman chayashpa, chaupipi shayarishpaca: —Cushicuichic, ama manchaichicchu— nirca.

²⁰ Chashna nishca q'uipami, paipac maquicunatapish, costillas quinraitapish ricuchirca. Chashna ricuchicpica, Apunchic Jesusta ricushpami cushicurcacuna.

²¹ Cutinllatac Jesusca: —Cushicuichic, ama manchaichicchu. Ima shinami ñuca Taita ñucata cacharca, chashnallatacmi cancunataca ñucaca cachani— nirca.

²² Chashna nishpa paicunata p'ucushpami: —Diospac Espirituta chasquichic.

²³ Pipish cancunata mana allita ruhuacpi perdonacpica, paicuna juchata ruhuashcamanta perdonashcami canga. Shinallatac pipish cancunata mana allita ruhuacpi mana perdonacpica, paicuna juchata ruhuashcamantaca mana perdonashcachu canga— nirca.

Jesús causarishcata Tomás ricushcamanta

²⁴ Chashna cacpipish, chunga ishcai yachacuccunapuramanta ishcaipura huacharishca Tomasca, Jesús chayacpica mana paicunahuanchu carca.

²⁵ Tomás chayamucpi, caishuc yachacuccunaca: —Apunchic Jesustami ricurcanchic— nircacuna. Chashna nicpi Tomasca: —Paipac maquicunapi clavocuna yaicushcata mana ricushpa, chai clavo yaicushcapi ñuca dedota mana satishpa, shinallatac paipac costillas quinraipi chugririshcata ñuca maquihuan mana tuparishpaca, manatac crishachu— nirca.

²⁶ Pusac punzha q'uipami, cutin yachacuccunaca chai ucullapitac tandanacushca carcacuna. Shinallatac Tomaspish chaipimi carca. Huasi pungucuna huichcashca cacpimi, Jesusca cutin paicunapacman chayashpa chaupipi shayarishpaca: —Cushicuichic, ama manchaichicchu— nirca.

²⁷ Chashna nishca q'uipami Tomastaca: —Cambac dedota ñuca maqui chugripi satishpa ricui, shinallatac cambac maquita ñuca costillas quinrai chugripi satishpa ricui. Ama mana crishpa puricuichu, ashtahuanpish criyari— nirca.

²⁸ Chashna nicpi Tomasca: —¡Ñucata Mandac Apunchic Jesuslla, ñuca Dioslla!— nirca.

²⁹ Chashna nicpi Jesusca: —Tomás, canca ricushpatacmi cringui. Mana ricushpapish criccunaca, mai cushicuimi cancuna— nirca.

Imamanta cai librota quillcashcamanta

³⁰ Jesuspac yachacuccuna ricucucpica, ashtahuan achca pi mana ruhuaipaccunatami ruhuarca. Chaicunaca mana tucuichu cai libropica quillcashca.

³¹ Chashna cacpipish cancuna Jesusta Quishpichic Cristo cashcatapish, Diospac Churi cashcatapish crichun, shinallatac paita crishpa huiñai causaita charichunmi, caicunataca quillcani.