SAN JUAN 2 - Nuevo Testamento en Quichua Cañar 1996

Jesús yacumanta vinota ruhuashcamanta

¹ Quimsa punzha q'uipaca, Galilea llactapi tiyac Caná pueblopimi shuc cazarana boda tiyarca. Chai bodapimi, Jesuspac mamapish carca.

² Chai bodamanmi Jesuspish, paipac yachacuccunapish c'ayashca carca.

³ Chai bodapi vino tucuricpimi, Jesuspac mamaca: —Vinoca ñami tucurishca— nirca.

⁴ Shina nicpi Jesusca: —Mamita, ¿ima nishpatac chashnaca nicungui? Ñuca imatapish ruhuana pachaca manarac chayamunchu— nirca.

⁵ Shina nicpi, serviccunata paipac mamaca: —Tucui pai ima nishcata ruhuanguichic— nirca.

⁶ Chaipica, rumimanta ruhuashca sucta tinajacunami tiyarca. Chai tinajacunaca, israelcuna*f** Taita Diospac ñaupapi alli ricuringapac armarina yacuta churanami carca. Chai tinajacunaca ishcai puñu yalli yacutami apac carca.

⁷ Jesusca chai tinajacunapimi, yacuta jundachichun chai serviccunataca mandarca. Chashna mandacpica, paicunaca tinaja shimicamanmi jundachircacuna.

⁸ Chashna ruhuacpi Jesusca: —Cunanca ashata llucchishpa, mizapi ricuc aulajanuman cugrichic— nirca. Chashna nicpi, paicunaca aulajanupacmanmi aparcacuna.

⁹ Shina apacpi, yacumanta ruhuashca vinota mizapi ricuc aulajanu mallishpaca, maimanta llucchishcata mana yacharcachu, ashtahuanpish yacuta tinajapi jundachic serviccunallami chaitaca yacharca. Mizapi ricuc aulajanu noviota c'ayashpaca:

¹⁰ —Pipish alli vinotaracmi, c'ayashcacunamanca ubiachincuna. Ña yallita ubiashca q'uipami, yangalla vinotaca ubiancuna. Chashna cashpapish, canca alli vinotami cunancaman huacaichishpa charicushcangui— nirca.

¹¹ Galilea llactapi tiyac Caná pueblopi Jesús chashna ruhuashpami, pipish mana ruhuaipaccunataca ruhuanata callarirca. Chashna ruhuashpami, paica pi mana ruhuaipaclla cashcata ricuchirca. Chashna ruhuacpimi, paipac yachacuccunaca pai Diosmanta shamushca cashcata crircacuna.

¹² Chai q'uipami, Jesusca paipac mamahuan, huauquicunahuan, shinallatac yachacuccunahuanpish Capernaum puebloman rirca. Chaipica, tauca punzhacunatami carca.

Diosman mañana huasipi c'atuccunata Jesús llucchishpa cachashcamanta

¹³ Israelcunapac pascua*f** fiesta ña chayamucucpimi, Jesusca Jerusalén puebloman rirca.

¹⁴ Chaiman chayashpaca, Diosman mañana huasi ucupi huagrata c'atuccunahuan, ovejata c'atuccunahuan, palomata c'atuccunahuan, shinallatac cullquita cambiashpa tiyacuccunahuanmi tuparirca.

¹⁵ Chaita ricushpaca, anguta patarishpami tucui chaipi c'atuccunataca ovejandic, huagracunandic llucchishpa cacharca. Shinallatac cullquita cambiaccunatapish, mizacunata tigrachishpami shiguashpa shitarca.

¹⁶ Shinallatac palomata c'atuccunatapish: —¡Caimanta palomacunata llucchichic! ¡Ñuca Taitapac huasitaca ama randina, c'atuna huasita ruhuaichicchu!— nirca.

¹⁷ Chaita ruhuacta ricushpami, Jesuspac yachacuccunaca “cambac huasimantaca punzhantami llaquicuni” nishpa, Dios quillcachishcapi David nishcata yuyarircacuna.

¹⁸ Jesús chashna ruhuacpica, maijan mandac israelcunaca:*f** —Canta cai tucuita ruhuachun Taita Dios cachashcata ricungapacca, ¿imatatac pi mana ruhuaipactaca ruhuashpa ricuchinguiyari?— nircacuna.

¹⁹ Chashna nicpi Jesusca: —Diosman mañana cai huasita urmachishpa saquichic. Quimsa punzhapica cutin shayachishallami— nirca.

²⁰ Shina nicpi mandac israelcunaca: —Diosman mañana cai huasitaca chuscu chunga sucta huatapimi shayachircacuna. ¿Ima shinatac canca ‘quimsa punzhallapi shayachisha’ ningui?— nircacuna.

²¹ Diosman mañana huasimanta Jesús nishpaca, paillamantatacmi nicurca.

²² Chaimantami paipac yachacuccunaca Jesús causaricpica, pai chashna nishcata yuyarishpa Dios quillcachishcatapish, Jesús ima nishcatapish crircacuna.

Tucuipac shunguta Jesús yachashcamanta

²³ Pascua*f** fiesta punzhacunapimi, Jesusca Jerusalén pueblopi cashpa, pi mana ruhuaipaccunata ruhuarca. Chashna ruhuacta ricushpami, achcacuna paita crircacuna.

²⁴ Chashna cacpipish paicunapac shungu imata yuyacushcata yachashpami, Jesusca paicunataca mana crirca.

²⁵ Jesusca paicuna ima laya cashcata pi mana huillacpipish, ña paicunapac shungu imata yuyacushcataca yacharcami.