SAN JUAN 19 - Nuevo Testamento en Quichua Cañar 1996

¹ Chaimantami Pilatoca Jesusta macachun mandarca.

² Soldadocunaca “mandacmi cangui” nic tucushpalla, casha angumanta ahuashpa shuc coronata umapi churachishpa, morado churanatapish Jesusmanca p'achallichirca.

³ Shina ruhuashpaca, paipac cuchuman cutinpish cutinpish chayashpami: —Israelcunata Jatun Mandac, canca allimari cangui— nishpa, ñahuipi huactarcacuna.

⁴ Chaimanta Pilato cutin llucshishpaca: —Riquichic. Ima juchayucta mana tarishcata cancuna ricuchunmi, cashna apamuni— nirca.

⁵ Chashnami Jesusca casha coronata umapi churashca, shinallatac morado churanatapish p'achallishca llucshimurca. Chashna llucshimucpimi Pilatoca: —Caipimi chai runaca— nirca.

⁶ Chashna llucshimucta ricushpami, curacunata mandac curacunapish, Diosman mañana huasita cuidaccunapish: —¡Paitaca chacatailla, chacatailla!— nishpa, capari callarircacuna. Shina caparicpimi Pilatoca: —Shinashpaca, cancunallatac apashpa chacatagrichic. Ñucaca ima mana allitaca paipica mana tarinichu— nirca.

⁷ Shina nicpi israelcunaca: —Ñucanchicca shuc mandashcata charinchicmi. Chai mandashcapi nishca shinaca, paica ‘Diospac Churimi cani’ nishcamantaca huañunami can— nircacuna.

⁸ Pilato chaita uyashpacarin ashtahuan mancharishpami,

⁹ mandashpa tiyana ucuman yaicushpa, cutin Jesusman tapushpaca: —¿Maimantatac cangui?— nirca. Shina tapucpipish, Jesusca imata mana nircachu.

¹⁰ Shina upalla cacpimi Pilatoca: —Shinashpaca, ¿manachu imata ñucamanca huillagringui? Ñuca mandacpimi, chacatana cacpipish chacatanga, cacharina cacpipish cacharinga. Chaitaca, ¿manachu yachangui?— nirca.

¹¹ Shina nicpi Jesusca: —Taita Dios imatapish ruhuana cashcata cucllapimi, ñucataca imatapish ruhuai pudingui. Shina cacpica, canman apamushpa cucmi, canta atishpa yalli juchayucca can— nirca.

¹² Chaita uyashcamanta pachami Pilatoca, ima shinapish Jesusta cacharinata munarca. Shina cacpipish israelcunaca: —¡Cai runata cacharishpaca, jatun mandac Cesarmanca*f** mana allita ruhuanguichu! ¡Maijanpish ‘jatun mandacmi cani’ niricca, jatun mandac Cesarhuanca mana apanacunchu!— nishpa caparircacuna.

¹³ Pilato chaita uyashpaca, Jesusta canzhaman llucchishpami pai mandashpa tiyanapi tiyarirca. Chai tiyanaca Gabata nishca pambapimi carca. Hebreo*f** rimaipica “Gabata” nishpaca, “rumihuan ruhuashca pamba” nisha ninmi.

¹⁴ Pascua*f** punzhapac allichirina punzha ña chaupiyamucucpimi Pilatoca: —Riquichic, caipimi cancunata Jatun Mandacca— nishpa, israelcunataca nirca.

¹⁵ Shina nicpipish paicunaca: —¡Chacatashpa huañuchilla!— nishpami, cutin cutin caparircacuna. Shina caparicpi Pilatoca: —¿Cancunata Jatun Mandactachu chacatachun ninguichic, imatacyari?— nishpa tapurca. Shina nicpi, curacunata mandac curacunaca: —Ñucanchicca jatun mandac Cesarllatami charinchic. Shuctac mandactaca mana charinchicchu— nircacuna.

¹⁶ Shina nicpimi, Pilatoca Jesús chacatashca cagrichun paicunaman cushpa cacharca. Chashna cucpica, Jesusta apashpa rircacunami.

Jesusta cruzpi chacatashcamanta

¹⁷ Jesusca paita chacatana cruzta aparishpami, Gólgota urcuman llucshirca. Hebreo*f** rimaipi “Gólgota” nishpaca, “uma tullu” nisha ninmi.

¹⁸ Chai urcupimi, Jesustaca ishcai runacunandic chacatarcacuna. Chaipica shuctaca shuc ladoman, shuctaca shuc ladoman chacatashpami, Jesustaca chaupipi chacatarcacuna.

¹⁹ Chaipimi Pilatoca shuc quillcashcata cruz jahuapi churarca. Chai quillcashcapica: “Israelcunata Jatun Mandac, Nazaret pueblomanta Jesusmi” nishpami quillcashca carca.

²⁰ Jesusta chacatashcaca Jerusalén pueblo cuchullapi cashcamantami, achca israelcuna chai quillcashcata ricurca. Chai quillcashcaca hebreo rimaipi, latín*f** rimaipi, shinallatac griego*f** rimaipi quillcashcami carca.

²¹ Chai quillcashcata curacunata mandac curacuna ricushpacarin Pilatotaca: —Ama chashna ‘Israelcunata Jatun Mandacmi’ nishpa quillcaichu, ashtahuanpish ‘Israelcunata Jatun Mandacmi cani’ nirishcata quillcai— nircacuna.

²² Pilato chaita uyashpaca: —Ñuca ima shina quillcashcaca, chashnatacmi cana can— nirca.

²³ Ña cruzpi chacatashca q'uipaca, soldadocunaca Jesuspac churanacunataca chaupishpami chuscupura japinacurca. Jesuspac ucu churanaca mana sirashca, shuclla cashcamantami

²⁴ soldadocunaca: “Ama lliquishpa suerteta ruhuashunchic, maijanmanmi urman ricungapac” ninacurcacuna. Soldadocuna chashna ruhuacpica, Dios quillcachishcami pactarca. Chai quillcachishcapica: “Ñuca churanacunataca chaupinacushpa, ucu churanataca suertetami ruhuarca” ninmi.

²⁵ Jesusta chacatashca cruz cuchupica paipac mamapish, paipac mamapac ñañanpish, Cleofaspac huarmi Mariapish, shinallatac Magdala pueblomanta Mariapish carcami.

²⁶ Chashna cacpimi, Jesusca paipac mamata, shinallatac paipac c'uyashca yachacucta ricushpa paipac mamataca: —Riqui, mama. Paimi cambac huahuaca— nirca.

²⁷ Chai q'uipaca, paipac yachacuctapish: —Riqui. Paimi cambac mamaca— nirca. Chaimanta pachami chai yachacucca paipac huasipi Jesuspac mamataca causachun pusharca.

Jesús huañushcamanta

²⁸ Chai q'uipami, Jesusca tucuita pactachishcata ña yachashpa, Dios quillcachishcapi nishca pactachun “yacunayanmi” nirca.

²⁹ Chaipica, jayac vinagre jundachishca shuc mangami tiyacurca. Chaipimi shuc hisopo caspi puntapi esponjata huatashpa satishpa, Jesuspac shimiman chayachircacuna.

³⁰ Chai vinagreta Jesús ubiashpaca: “Ña tucuchishcami” nircami. Chashna nishpaca, umata huarcushpa, paipac espirituta Diosman mingashpaca huañurcallami.

Lanzahuan Jesusta shuc soldado chugrichishcamanta

³¹ Cayandicca ña pascua*f** punzha cagricucpimi, israelcunaca*f** samana punzhapi huañushcacuna cruzpi cainachunca mana munarcacuna. Chai punzhaca israelcunamanca jatun punzhami carca. Chaimantami chacatashcacunapac changacunata p'aquishpa, chaimanta anchuchichun nishpa Pilatoman mañarcacuna.

³² Chashna mañacpimi, soldadocuna rishpaca, caishuctapish chaishuctapish Jesushuan chacatashcacunataca changacunata p'aquircacuna.

³³ Ashtahuanpish Jesuspacman chayashpaca, ña huañushcapi tuparishpami, changacunata mana p'aquircacuna.

³⁴ Shina cashpapish shuc soldadoca lanzahuan tucsishpami, Jesuspac costillasta chugrichirca. Chashna chugrichincami, chai chugrimantaca yacupish, yahuarpish llucshirca.

³⁵ Tucui caicunataca ñuca ricushpami, mana llullashpa parlani. Cai parlashcaca mana llullachu. Cancuna crichunmi, imatapish cashcata yachashpa parlani.

³⁶ Caicunaca Dios quillcachishcapi nishca pactachunmi, chashnaca tucurca. Chaipica: “Shuc tullullatapish paitaca mana p'aquingachu” ninmi.

³⁷ Shinallatac shuctac quillcachishcapipish: “Lanzahuan chugrichishcatami ricungacuna” ninmi.

Jesusta enterrashcamanta

³⁸ Chai q'uipami, Arimatea pueblomanta José runaca Pilatopacman rishpa, Jesuspac cuerpota enterrangapac mañagrirca. Chai Joseca mandac israelcunata*f** manchashcamantami, pacalla Jesusta c'aticurca. Pilato “apashpa enterragri” nicpica, Jesuspac cuerpotaca aparcami.

³⁹ Shinallatac shuc tuta Jesushuan parlanacuc Nicodemo runapish mirrahuan,*f** aloehuan*f** chapushca shuc quintal shina mishquilla ashnacuctami apamurca.

⁴⁰ Chashnami Jesuspac cuerpota apashpa, mishquilla ashnacucta churashpa, liensohuan pillurcacuna. Chashnami israelcunaca enterrangapac ruhuac carcacuna.

⁴¹ Maipimi Jesusta chacatashca cashcapica, shuc huertami tiyarca. Chai huertapica shuc mushuc sepulturami tiyarca. Chaipica pitapish manarac enterrashcami carca.

⁴² Israelcuna pascuapac*f** allichirina punzha chayamucushcamanta, shinallatac chai sepultura cuchullapi cashcamantami, Jesuspac cuerpotaca utca chaillapi churarcacuna.