SAN JUAN 17 - Nuevo Testamento en Quichua Cañar 1996

Paipac yachacuccunamanta Jesús Taita Diosman mañashcamanta

¹ Chaicunata nishca q'uipaca jahua pachata huichailla ricushpami, Jesusca cashna nirca: —Ñuca Taitalla, ñucata japichina pachaca ñami chayamushca. Chaimanta cambac Churipish canta sumacyachichunca, cambac Churitapish sumacyachiyari.

² Canca huiñai causaita ñucaman cushcacunaman cuchunmi, tucui gentecunataca ñuca maquipi churashcangui.

³ Cai huiñai causaica, shuclla Taita Dios can cashcata, shinallatac can cachashca Jesucristota ricsinami.

⁴ Ñucaca cai pachapica canta sumacyachishcanimi, shinallatac imata ruhuachun nishcatapish ña tucuchishcanimi.

⁵ Cunanca ñuca Taitalla, cai pacha manarac tiyacpi, ima shinami cambac ladopi sumacyachishca carcani, shinallatac cunanpish sumacyachiyari.

⁶ Can cai pachapi causac gentecunamanta acllashpa ñucaman cushcacunamanca, can ima shina cashcataca huillashcanimi. Cambacmi carcacuna, shinallatac canmi ñucaman curcangui. Paicunaca can rimashca shimitaca cazushcacunami.

⁷ Cunanca can ñucaman tucui cushcacunaca, canmanta shamushca cashcatami yachancuna.

⁸ Can huillachun nishcata ñuca huillacpica, paicunaca chasquircacunami. Shinallatac Taita Diosmantatac ñuca shamushcata yachac chayashpami, can cachashcata crincuna.

⁹ Ñucaca paicunamantami mañani. Cai pachapaclla causaccunamantaca mana mañanichu, ashtahuanpish ñucaman cushcacunaca cambac cashcamantami paicunamantaca mañani.

¹⁰ Tucui cambac cashcacunaca ñucapacmi, ñucapac cashcacunaca cambacmi. Shinallatac paicunami ñuca sumaimana cashcataca ricuchincuna.

¹¹ Ñucaca ña mana cai pachapi cagrinichu, cambacman shamugrinimi. Shina cacpipish, paicunaca cai pachapi saquirincunami. Jucha illac Taitalla, ñucapish canpish ima shinami shuclla canchic, shinallatac can ñucaman cushcacuna shuc shinalla cachun, can imatapish ruhuaclla cashcata ricuchishpa huacaichiyari.

¹² Cai pachapi ñuca paicunahuan cashpaca, can imatapish ruhuaclla cashcata ricuchishpami huacaichircani. Can cushcacunataca tucuitami huacaichircani. Shucllapish mana chingarircachu, ashtahuanpish chingaringapac cashca runallami can quillcachishcapi nishca shina pactachun chingarirca.

¹³ Cunanca can maipi cashcamanmi rini. Ñuca cushi cashca shinallatac paicunapish yallita cushicuchunmi, ñucaca cai pachapi cashparac cashnaca mañani.

¹⁴ Can rimashca shimitaca paicunaman huillashcanimi. Paicuna mana cai pachapaclla cashcamantami, cai pachapaclla causaccunaca p'iñancuna. Ñucapish mana cai pachamantachu cani.

¹⁵ Cai pachamanta paicunata anchuchichunca mana mañanichu, ashtahuanpish tucui millaimanta huacaichichunmi mañani.

¹⁶ Ima shinami ñucaca mana cai pachapaclla cani, chashnallatacmi paicunapish mana cai pachapaclla cancuna.

¹⁷ Paicunata cambaclla cachun cambac rimashca shimihuan tucui millaimanta huacaichingui. Cambac rimashca shimica cashcata rimac shimimi.

¹⁸ Ima shinami ñucata cai pachapi causaccunaman huillachun cacharcangui, chashnallatacmi ñucapish paicunataca cai pachapi causaccunaman huillachun cachacuni.

¹⁹ Paicunapish cashcata nic cambac rimashca shimihuan cambaclla tucuchunmi, ñucapish paicunapac allipac cambaclla tucuni.

²⁰ Ñucaca mana paicunallamantachu mañani, ashtahuanpish paicunapac huillashcata uyashpa, q'uipata ñucata criccunamantapish mañanimi.

²¹ Taitalla, ima shinami ñucaca canhuan, canca ñucahuan shuc shinalla canchic, shinallatac paicunapish ñucanchichuan shuc shinalla cachunmi mañani. Cai pachapi causaccuna ñucata can cachashca cashcata crichunmi, chashnaca mañani.

²² Canca ñucata sumacyachishcanguimi. Ñucanchic ima shinami shuc shinalla canchic, chai shinallatac paicunapish shuc shinalla cachunmi paicunatapish ñucaca sumacyachini.

²³ Ñucaca paicunahuan, canca ñucahuan cacpimi, paicunaca shuc shinalla canga. Shina cacpimi, cai pachapi causaccunaca can cachashcata, shinallatac ñucata ima shinami c'uyangui, chashnallatac paicunatapish c'uyac cashcata yachangacuna.

²⁴ Taitalla, cai pacha manarac tiyacpimi, ñucataca c'uyashpa sumacyachishcangui. Chaimantami can cushcacunaca ñuca sumacyachishca cashcata ricuchunca, ñuca maipimi cani chaillapitac paicunapish cachun munani.

²⁵ Imatapish cashcata ruhuac Taitalla, cai pachapaclla causaccuna canta mana ricsicpipish, ñucaca ricsinimi. Shinallatac cai ñucapac caccunapish, can ñucata cachashca cashcata yachancunami.

²⁶ Can ñucata c'uyac shinallatac paicunapish c'uyanacuchun, shinallatac ñucahuan shuc shinalla cachunmi, can ima shina cashcataca ricsichini, shinallatac ricsichishpa c'atishami— nirca.